मनोज जरांगे पाटील यांच्या समर्थनार्थ लोहा कडकडीत बंद!

आधुनिक केसरी न्यूज 

लोहा : मराठा आरक्षणाच्या मागणीसाठी संघर्षयोद्धा मनोज जरांगे पाटील यांनी सुरू केलेल्या आमरण उपोषणाचा गुरुवारी सहावा दिवस पूर्ण झाला. त्यांच्या प्रकृतीबाबत चिंता व्यक्त होत असताना, त्यांच्या आंदोलनाला पाठिंबा देण्यासाठी सकल मराठा समाज, लोहा तालुका यांच्या वतीने गुरुवार, दि. ३ सप्टेंबर २०२६ रोजी लोहा शहर बंदचे आवाहन करण्यात आले होते. या आवाहनाला शहरातील व्यापारी, व्यावसायिक आणि नागरिकांनी उत्स्फूर्त प्रतिसाद देत शंभर टक्के बंद पाळला. सकाळपासूनच लोहा शहरातील बाजारपेठेत बंदचे चित्र दिसून आले. शहरातील विविध भागांतील किरकोळ व घाऊक दुकाने, व्यावसायिक प्रतिष्ठाने तसेच अन्य आस्थापना बंद ठेवण्यात आल्या. सकल मराठा समाजाच्या आवाहनाला व्यापारी वर्गाने सकारात्मक प्रतिसाद देत आपापली प्रतिष्ठाने स्वयंस्फूर्तीने बंद ठेवली.

बंदची पोलिसांना पूर्वसूचना
लोहा बंदबाबत सकल मराठा समाजाच्या वतीने लोहा पोलीस ठाण्याचे पोलीस निरीक्षक यांना लेखी निवेदन देऊन पूर्वसूचना देण्यात आली होती. आंदोलनाच्या पार्श्वभूमीवर कोणताही अनुचित प्रकार घडू नये आणि कायदा व सुव्यवस्था अबाधित राहावी, यासाठी पोलीस प्रशासनाकडून आवश्यक खबरदारी घेण्यात आली. पोलीस निरीक्षक अरविंद घोडके यांच्या मार्गदर्शनाखाली शहरातील प्रमुख चौक, बाजारपेठ आणि संवेदनशील ठिकाणी पोलिसांचा बंदोबस्त तैनात करण्यात आला होता. पोलिसांकडून परिस्थितीवर बारकाईने लक्ष ठेवण्यात आले.

शांततेच्या मार्गाने बंद; अनुचित प्रकार नाही
लोहा शहरातील बंद शांततापूर्ण आणि लोकशाही मार्गाने पार पडला. बंददरम्यान कोणताही अनुचित प्रकार घडला नाही. नागरिकांनीही संयम राखत बंदला सहकार्य केले. व्यापारी व नागरिकांच्या सहकार्यामुळे शहरातील वातावरण शांत आणि नियंत्रणात राहिले. मराठा आरक्षणाच्या मागणीसाठी सुरू असलेल्या आंदोलनाच्या पार्श्वभूमीवर मनोज जरांगे पाटील यांच्या समर्थनार्थ लोहा शहरातील व्यापाऱ्यांनी दाखविलेल्या एकजुटीची चर्चा दिवसभर शहरात होती.

प्रशासनाची खबरदारी नागरिकांचे सहकार्य
बंदच्या पार्श्वभूमीवर नागरिकांना कोणताही त्रास होऊ नये तसेच कायदा व सुव्यवस्था अबाधित राहावी, यासाठी प्रशासन आणि पोलीस यंत्रणेने आवश्यक ती खबरदारी घेतली. पोलिसांच्या उपस्थितीमुळे शहरातील परिस्थितीवर नियंत्रण राहिले.
सकल मराठा समाजाच्या आवाहनाला व्यापाऱ्यांनी दिलेला शंभर टक्के प्रतिसाद आणि शांततेत पार पडलेला बंद यामुळे लोहा शहरात आंदोलनाला पाठिंबा देणारी एकजूट स्पष्टपणे दिसून आली.