अधिवक्ता परिषदेतर्फे जामीन व अटकपूर्व जामिनावर अभ्यासपूर्ण व्याख्यान

आधुनिक केसरी न्यूज 

चंद्रपूर, दि. ६ सप्टेंबर : अखिल भारतीय अधिवक्ता परिषद, चंद्रपूरच्या वतीने नवोदित तसेच ज्येष्ठ अधिवक्त्यांच्या ज्ञानवृद्धी आणि न्यायालयीन कौशल्यविकासाच्या उद्देशाने “फौजदारी न्यायशास्त्रातील जामीन व अटकपूर्व जामिनाचे बारकावे” या विषयावर विशेष व्याख्यानाचे आयोजन जनता महाविद्यालय, चंद्रपूर येथे करण्यात आले.

कार्यक्रमाचे प्रमुख व्याख्याते ज्येष्ठ अधिवक्ता श्री. सत्यनारायण जोशी, अकोला यांनी आपल्या प्रदीर्घ न्यायालयीन अनुभवातून जामीन व अटकपूर्व जामिनाच्या विविध कायदेशीर व व्यावहारिक पैलूंचे अत्यंत अभ्यासपूर्ण मार्गदर्शन केले. PowerPoint Presentation व Slide Showच्या माध्यमातून त्यांनी गुंतागुंतीच्या कायदेशीर संकल्पना सोप्या व सहज भाषेत स्पष्ट केल्या.

जामीन हा आरोपीला शिक्षा देण्याचा उपाय नसून न्यायालयीन प्रक्रियेत त्याची उपस्थिती सुनिश्चित करण्यासाठीची कायदेशीर व्यवस्था आहे, हा मूलभूत सिद्धांत स्पष्ट करताना त्यांनी Arnesh Kumar, Satender Kumar Antil, Gurbaksh Singh Sibbia आणि Siddharam Satlingappa Mhetre यांसारख्या महत्त्वपूर्ण सर्वोच्च न्यायालयीन निर्णयांचा संदर्भ दिला.

व्यक्तिस्वातंत्र्य, संविधानातील अनुच्छेद २१, समाजहित, तपासातील सहकार्य तसेच न्यायालयीन विवेक यांचा समतोल राखण्याचे महत्त्व त्यांनी अधोरेखित केले. जामीन अर्ज करताना कोणतीही महत्त्वाची वस्तुस्थिती न्यायालयापासून लपवू नये, जामिनाच्या अटींचे पालन करावे आणि न्यायालयीन प्रक्रियेला अडथळा निर्माण करू नये, असा मौलिक संदेशही त्यांनी दिला.

“कायद्याचे ज्ञान आणि वकिलीचे संस्कार दोन्ही आवश्यक”

व्याख्यानाच्या समारोपाच्या वेळी श्री. जोशी यांनी अत्यंत नम्रतेने सांगितले की, “I may not be in a position to advise, but definitely a guideline from Mauli can be useful for every member of our fraternity.”

संत ज्ञानेश्वर माऊलींच्या—

“तैसे साच आणि मवाळ । मितले आणि रसाळ । जैसे कल्लोळ अमृताचे ॥”

या ओवीचा संदर्भ देत त्यांनी अधिवक्त्यांनी सत्य, संयम, सौजन्य आणि प्रभावी भाषेचा अंगीकार करावा, असे आवाहन केले. अधिवक्त्याचे शब्द केवळ युक्तिवाद करणारे नसून आपल्या अशिलाला न्याय मिळवून देण्याचे सामर्थ्य त्यांच्यात असते; त्यामुळे कायद्याच्या ज्ञानाबरोबरच भाषेची शालीनता व प्रभावी मांडणी महत्त्वाची आहे, असे त्यांनी स्पष्ट केले.

या विचारांनी कार्यक्रमाला केवळ कायदेशीर ज्ञानाची नव्हे, तर वकिलीच्या संस्कारांचीही प्रेरणादायी दिशा मिळाली.

ज्युनिअर-सिनियर सर्वांसाठी ज्ञानवर्धक व्यासपीठ

अखिल भारतीय अधिवक्ता परिषद ही केवळ संघटनात्मक व्यासपीठ न राहता अधिवक्त्यांच्या सातत्यपूर्ण ज्ञानवृद्धी, व्यावसायिक कौशल्यविकास, न्यायनिष्ठा आणि सामाजिक बांधिलकीसाठी विविध उपक्रम राबविणारे व्यासपीठ म्हणून कार्यरत आहे. ज्युनिअर असो किंवा सीनियर, प्रत्येक अधिवक्त्याला बदलत्या कायद्यांचा अभ्यास, न्यायनिर्णयांचे विश्लेषण आणि प्रत्यक्ष न्यायालयीन कामकाजातील अनुभव मिळावा, हा अशा उपक्रमांचा प्रमुख उद्देश आहे.

विशेषतः नवोदित अधिवक्त्यांना अनुभवी ज्येष्ठ अधिवक्त्यांच्या ज्ञानाचा आणि अनुभवाचा लाभ मिळावा, तसेच त्यांच्यामध्ये आत्मविश्वास, अभ्यासाची सवय आणि न्यायालयीन कौशल्य विकसित व्हावे, यासाठी परिषद सातत्याने अशा व्याख्यानमाला, चर्चासत्रे आणि प्रशिक्षणात्मक कार्यक्रमांचे आयोजन करीत आहे.

कार्यक्रमास श्री. घट्टूवार सर, चंद्रपूर महानगर अध्यक्ष, अधिवक्ता श्री. विक्रम टंडन, अध्यक्ष चंद्रपूर जिल्हा बार असोसिएशन, अधिवक्ता श्री. गिरीश मार्लीवार, जिल्हा उपाध्यक्ष अखिल भारतीय अधिवक्ता परिषद, प्राचार्य डॉ. अशोकभाऊ जीवतोडे, सचिव शिक्षण प्रसारक मंडळ तसेच प्राचार्य डॉ. आशिष महातळे यांची प्रमुख उपस्थिती होती.

कार्यक्रमाचे सूत्रसंचालन अधिवक्ता श्री. अभिजीत किन्हीकर यांनी केले, तर आभार अधिवक्ता श्री. मुरलीधर बावनकर यांनी मानले.

कार्यक्रमानंतर झालेल्या प्रश्नोत्तर सत्रात अधिवक्त्यांनी विविध कायदेशीर व न्यायालयीन प्रश्न उपस्थित केले. श्री. जोशी यांनी त्यांचे कायदेशीर तरतुदी, न्यायनिर्णय आणि अनुभवाच्या आधारे निरसन केले.

कार्यक्रमाच्या यशस्वी आयोजनासाठी परिषदचे जिल्हा व महानगर पदाधिकारी, कार्यकर्ते, ज्युनिअर व सीनियर अधिवक्ते तसेच जनता महाविद्यालयाचे प्राचार्य, प्राध्यापकवृंद व कर्मचारी यांनी विशेष सहकार्य केले.

यावेळी पुढील काळात “Medical Jurisprudence” आणि “Forensic Science” या महत्त्वपूर्ण विषयांवर व्याख्यानांचे आयोजन करण्यात येणार असल्याची घोषणा करण्यात आली.

कार्यक्रमाची सुरुवात **‘वंदे मातरम्’**ने तर समारोप राष्ट्रगीताने करण्यात आला. त्यामुळे संपूर्ण कार्यक्रमात कायदेविषयक ज्ञान, न्यायनिष्ठा, राष्ट्रभावना, संस्कार आणि संघटनशक्तीचा सुंदर संगम अनुभवास आला.

“ज्ञानातून आत्मविश्वास, अनुभवातून कौशल्य आणि संस्कारातून सक्षम वकील” या भावनेतून अखिल भारतीय अधिवक्ता परिषदेची चंद्रपूर जिल्ह्यातील वाटचाल अधिक व्यापक करण्याचा निर्धार यानिमित्ताने व्यक्त करण्यात आला.