लोह्यात टँकरच्या चाकाखाली चिरडून वृद्ध महिलेचा जागीच मृत्यू 

आधुनिक केसरी न्यूज 

लोहा :  शहरातील नांदेड रस्त्यावरील शासकीय विश्रामगृहासमोरील पेट्रोल पंपासमोर नांदेडकडे जाणाऱ्या दुधाने भरलेल्या टँकरच्या मागील चाकाखाली येऊन एकोणसत्तर वर्षीय महिलेचा जागीच मृत्यू झाल्याची दुर्दैवी घटना दि. ११ रोजी सकाळी सात वाजताच्या सुमारास घडली. पोलिसांनी टँकर चालकासह ताब्यात घेतला. 

लोहा शहरातील सायाळ रोड भागातील रहिवाशी भागीरथाबाई रामदास पुदिंगे (वय ६९) ही वृद्ध महिला सकाळी सात वाजताच्या दरम्यान घरून निघून नांदेड रस्त्याने पायी जात असताना शासकीय विश्रामगृहासमोरील पेट्रोल पंपासमोर लोह्याकडून नांदेडकडे भरधाव वेगात जाणाऱ्या दुधाने भरलेला टँकर क्र. टीएस ०८ यूएल ०१७१ च्या पाठीमागील चाकाखाली भागीरथाबाई आल्याने चिरडून त्यांचा जागीच मृत्यू झाला. अपघात एवढा भीषण होता की त्यांच्या शरीराच्या खालील भाग चेंदामेंदा झाल्याने रस्त्यावर रक्त मासाचा सडा पडला होता. घटनेची माहिती मिळताच लोहा पोलिसांनी घटनास्थळी धाव घेऊन स्थानिक नागरिकांच्या मदतीने प्रेत उत्तरीय तपासणीसाठी लोहा उपजिल्हा रुग्णालयात हलविले. पोलिसांनी अपघातग्रस्त टँकर चालकासह ताब्यात घेतला. सदर मयत वृद्ध महिला ही सकाळच्या समयी फुले व दूध आणण्यासाठी गेली असल्याचे त्यांच्या नातेवाईकातून सांगण्यात आले. याप्रकरणी लोहा पोलिसात गुन्हा नोंदविण्याची प्रक्रिया सुरू होती.