आधुनिक केसरी न्यूज
सांगली : मिरज आणि कुपवाड महापालिकेच्या वार्ड क्र. ९ मधील आनंद पार्क व गणलक्ष्मी पार्क परिसरातील कचरा कंटेनर व कचरा डेपो तात्काळ अन्यत्र स्थलांतरित करावा, अन्यथा सहा दिवसांत महानगरपालिका मुख्यालयासमोर धरणे आंदोलन करण्यात येईल, असा इशारा स्थानिक पदाधिकाऱ्यांनी महानगरपालिका प्रशासनाला दिला आहे.
गेल्या चार ते पाच वर्षांपासून प्रभाग समिती क्र. ३ मधील विविध वार्डांचा कचरा या ठिकाणी जमा केला जात असल्याने परिसरात तीव्र दुर्गंधी, मच्छर, माशा व भटक्या कुत्र्यांचा त्रास वाढला आहे. त्यामुळे नागरिकांच्या आरोग्याचा गंभीर प्रश्न निर्माण झाला असून हा डेपो तात्काळ हटवून येथे केवळ घंटागाडीमार्फत नियमित कचरा संकलनाची व्यवस्था करावी, अशी मागणी करण्यात आली आहे. येत्या सहा दिवसांत कचरा डेपो हटविण्यात आला नाही, तर छत्रपती शिवाजी महाराज पुतळा (महापालिका मुख्यालय) येथे धरणे आंदोलन करण्यात येईल, असा इशारा स्थायी समिती सभापती अतुल माने, नगरसेवक संतोष पाटील, नगरसेविका रोहिणी पाटील, नगरसेविका वर्षा सरगर यांनी दिला आहे.
Comment List