पाचोरा–भडगाव परिसरात पावसाची संततधार; कापूस, मका, मूग, उडीद, सोयाबीन, तूर पिकांना फटका बसण्याची भीती

आधुनिक केसरी न्यूज 

पाचोरा : दि. 31 जुलै 2026 (शुक्रवार) पाचोरा व भडगाव तालुक्यात गेल्या काही दिवसांपासून पावसाची संततधार सुरू असून शेतकऱ्यांची चिंता वाढली आहे. शेतांमध्ये मोठ्या प्रमाणावर पाणी साचल्याने कापूस, मका, मूग, उडीद, सोयाबीन आणि तूर या खरीप पिकांवर प्रतिकूल परिणाम होण्याची शक्यता व्यक्त केली जात आहे.

सततच्या पावसामुळे अनेक शेतांमध्ये पाण्याचा निचरा होत नसल्याने पिकांच्या मुळांना हवा मिळत नाही. त्यामुळे पिके पिवळी पडणे, वाढ खुंटणे, मुळे कुजणे तसेच रोगराई वाढण्याचा धोका निर्माण झाला आहे. विशेषतः सोयाबीन आणि कापूस पिकांवर या परिस्थितीचा अधिक परिणाम होण्याची शक्यता कृषी जाणकारांनी व्यक्त केली आहे.

शेतकऱ्यांनी पावसाची उघडीप मिळताच शेतातील अतिरिक्त पाण्याचा निचरा करण्यावर भर द्यावा, तसेच कृषी विभागाच्या मार्गदर्शनानुसार आवश्यक उपाययोजना कराव्यात, असे आवाहन करण्यात येत आहे.दरम्यान, जर पुढील काही दिवसही मुसळधार पाऊस कायम राहिला तर खरीप हंगामातील पिकांचे मोठे नुकसान होण्याची भीती व्यक्त होत आहे. त्यामुळे प्रशासनाने तातडीने पंचनामे करून नुकसानग्रस्त शेतकऱ्यांना आर्थिक मदत द्यावी, अशी मागणी परिसरातील शेतकऱ्यांकडून करण्यात येत आहे.