आधुनिक केसरी न्यूज
पेठ : पेठ आगाराची भरधाव बस शुक्रवारी सायंकाळी वळणावर चालकाचे नियंत्रण सुटल्याने झाडावर आदळली. या भीषण अपघातात बारा विद्यार्थीनींसह काही प्रवासी किरकोळ जखमी झाले असून मोठा अनर्थ टळला. पेठ आगाराची बस (एमएच १४ बीटी ३५९८) सायंकाळी साडेपाचच्या सुमारास पेठहून आडगावकडे जात होती. मात्र चालकाने नित्याच्या मार्गाऐवजी बस अंधुटे-मागनि या मार्गे नेली. भरधाव गतीने जात असताना एका वळणावर नियंत्रण सुटले आणि बस लगतच्या सागाच्या झाडासह दगडावर आदळली. धडकेनंतर बस जागीच थांबली. या अपघातात आरती जनार्दन महाले (१७), मोनिका विलास दरोडे (१६), अंकिता बाळू गुजर (१८) रा. हनुमंतपाडा, भुवन) या विद्यार्थीनींच्या डोक्याला व चेहऱ्यावर मार लागला. इतर विद्यार्थ्यांसह प्रवासी किरकोळ जखमी झाले. अचानक झालेल्या धडकेने प्रवासी व विद्यार्थीनी लोखंडी बाकांवर आपटल्याने जखमी झाले. घटनास्थळी परिसरातील नागरिकांनी मदत केली. जखमींना भुवन प्राथमिक आरोग्य केंद्राच्या रुग्णवाहिकेतून पेठ ग्रामीण रुग्णालयात दाखल करण्यात आले. या प्रकरणी पेठ पोलिस ठाण्यात अपघाताची नोंद करण्यात आली आहे.
Comment List