घरकुलाचा दुसरा हप्ता काढण्यासाठी लाच घेताना कंत्राटी गृहनिर्माण अभियंता रंगेहाथ पकडला

आधुनिक केसरी न्यूज

घनसावंगी : तालुक्यातील राणीउंचेगाव सर्कल मधील कंत्राटी गृहनिर्माण अभियंता विलास लक्ष्मणराव कनोजे (वय ३८) यांनी पंतप्रधान आवास योजनेतील मंजूर लाभार्थ्यांचा घलरकुलाचा दुसरा हप्ता काढण्यासाठी चाळीस हजार रूपये लाचेची मागणी केली.तडजोडी अंती तीस हजार रूपयांची लाच घेताना त्यास लाचलूचपत प्रतिबंधक विभागाच्या पथकाने रंगेहाथ पकडले.

तक्रारदार यांची पत्नी सरपंच असून तक्रारदार यांची आई व गावातील इतर ३९ लाभार्थी यांचे पंतप्रधान आवास योजनेअंतर्गत मंजूर घरकुलाचा पहिला हप्ता कंत्राटी गृहनिर्माण अभियंता विलास लक्ष्मणराव कनोजे यांनी (ता २४) रोजी लाभार्थ्यांच्या खात्यात जमा केले होते.दरम्यान तक्रारदार यांनी त्यांच्या आई गावातील इतर नावाने मंजूर असलेल्या घरकुलाचा दुसरा हप्ता काढण्यासाठी त्यांच्या घरी जाऊन  विनंती केली.कंत्राटी गृहनिर्माण अभियंता चाळीस लाभार्थ्यांचे दुसरा हप्ता काढण्यासाठी चाळीस हजारांच्या लाचेची मागणी केली.तक्रारदार यांना लाच देण्याची इच्छा नसल्याने त्यांनी लाचलूचपत प्रतिबंधक विभाग जालना येथे तक्रार केली यावरून पथकाने पंचासमक्ष लाच मागणी पडताळणी केली असता असता बुधवारी (ता २७) सकाळी पावणे बारा वाजेच्या सुमारास कंत्राटी गृहनिर्माण अभियंता यांनी त्यांच्या गंगाधरवाडी जालना येथील राहत्या निवासस्थानी तीस हजार रूपयांची लाचेची रक्कम स्वीकारली.त्यास लाचलूचपत प्रतिबंधक विभागाचे पोलिस निरीक्षक कोमल शिंदे यांनी व त्यांच्या पथकाने ताब्यात घेतले.अंगझडती घेतली असता तीस हजार रूपये व एक मोबाईल आढळून आला.त्यांच्यावर पोलिस ठाणे तालुका जालना येथे गुन्हा दाखल करण्यात आला.ही कारवाई सापळा अधिकारी पोलिस निरीक्षक कोमल शिंदे, अंमलदार गजानन खरात, श्रीनिवास गहूर, पोलिस अंमलदार गजानन कांबळे, शिवलिंग खुळे, अमोल चेके, मनोहर भुतेकर, भालचंद्र बिणारेकर यांनी केली.