प्रतिबंधित सुगंधी तंबाखू, पानमसाला आणि गुटख्याची तस्करी ; ५ संशयित ताब्यात तर १८ लाखांचा मुद्देमाल हस्तगत; महात्मा गांधी चौक पोलिसांची कामगिरी

आधुनिक केसरी न्यूज

 सुधीर गोखले 

सांगली : राज्यामध्ये विक्रीसाठी प्रतिबंधित असलेली सुगंधी तंबाखू, गुटख्याची कर्नाटक राज्यातून तस्करी करणाऱ्या ६ जणांना महात्मा गांधी चौक पोलीस ठाण्याने ताब्यात घेऊन तब्बल १८ लाखांचा मुद्देमाल जप्त केला. याबाबत महात्मा गांधी चौक पोलीस ठाण्याचे पोलीस निरीक्षक संदीप शिंदे यांनी आमच्या प्रतिनिधींशी बोलताना सांगितले कि पोलीस अधीक्षक संदीप घुगे आणि अप्पर पोलीस अधीक्षक कल्पना बारवकर तसेच मिरज विभागीय पोलीस अधिकारी प्राणिल गिल्डा यांनी नशामुक्त सांगली अभियान अंतर्गत नशेच्या पदार्थांची विक्री करणाऱ्या व्यक्तीवर सक्त कारवाई करण्याचे आदेश दिले होते त्याप्रमाणे संशयित मुख्तार मेहबूब मुजावर (रा बिसूर) यास ताब्यात घेऊन यांच्याकडून प्रतिबंधित सुगंधी तंबाखू आणि पान मसाल्याचा ८२हजार ६०० रु किमतीचा मुद्देमाल हस्तगत केला होता. यावेळी अण्णा आणि औषध प्रशासन सुरक्षा अधिकारी यांच्या फिर्यादीनुसार गुन्हा दाखल करण्यात आला होता मुजावर याच्याकडे अधिक चौकशी केली असता हा साठा कर्नाटक राज्यातून आणून सांगली जिल्ह्यातील पानपट्टी चालकांना चढ्या दराने विक्री करत असल्याचे निष्पन्न झाले. पुढील कारवाई साठी महात्मा गांधी चौक पोलीस ठाण्याचे प्रभारी सहा पोलीस निरीक्षक संदीप शिंदे यांनी पथक तयार करून या प्रकरणातील मुख्य सूत्रधार सलीम गुरुसाब आवटी (रा शाहूनगर बेळगाव) तसेच हि सुगंधित तंबाखू सांगली जिल्ह्यात वितरित करणारा उमेश शंकर पाटील (रा कुडाची ता अथणी) आणि सांगली जिल्ह्यातील वितरक नयूम दिलावर शेख (रा आटपाडी) भरतेश सिद्धाराम कुंडाचे (रा नदीवेस मिरज) याना ताब्यात घेतले. या पाच संशयितांकडून तब्बल १८ लाखांचा मुद्देमाल हस्तगत करण्यात यश मिळाले आहे.