अतिवृष्टीनंतर तूर पिकावर रोगांचा वाढता प्रादुर्भाव; शेतकऱ्यांनी तातडीने घ्यावीत प्रतिबंधात्मक उपाययोजना

आधुनिक केसरी न्यूज 

फकिरचंद पाटील

पाचोरा : जळगाव जिल्ह्यासह राज्यातील अनेक भागांत झालेल्या सलग अतिवृष्टीमुळे तूर पिकावर विविध बुरशीजन्य रोग आणि किडींचा प्रादुर्भाव वाढण्याची शक्यता कृषी तज्ज्ञांनी व्यक्त केली आहे. सतत ढगाळ वातावरण, शेतात साचलेले पाणी आणि वाढलेली आर्द्रता यामुळे तूर पिकाच्या वाढीवर विपरीत परिणाम होत असून, योग्य वेळी उपाययोजना न केल्यास उत्पादनात मोठी घट होऊ शकते.

कृषी विभागाच्या माहितीनुसार, शेतकऱ्यांनी सर्वप्रथम शेतात साचलेले पाणी त्वरित बाहेर काढावे. पिकामध्ये हवा खेळती राहील याची काळजी घ्यावी. पिवळी पडलेली, रोगट किंवा कुजलेली झाडे तातडीने काढून नष्ट करावीत, जेणेकरून रोगाचा प्रसार कमी होईल. तूर पिकावर मर रोग, मुळकुज, करपा तसेच पाने गुंडाळणारी अळी, शेंगा पोखरणारी अळी आणि मावा यांसारख्या किडींचा प्रादुर्भाव दिसून आल्यास कृषी तज्ज्ञांच्या सल्ल्यानुसार योग्य बुरशीनाशक किंवा कीटकनाशकाची फवारणी करावी. फवारणी करताना हवामान स्वच्छ असावे आणि पाऊस नसल्याची खात्री करूनच फवारणी करावी.

अतिवृष्टीनंतर पिकाला त्वरित रासायनिक खतांचा मोठा डोस देण्याऐवजी पिकाची स्थिती पाहूनच खत व्यवस्थापन करावे. पिकाला ताण कमी करण्यासाठी आवश्यक सूक्ष्म अन्नद्रव्यांची फवारणीही फायदेशीर ठरू शकते. कृषी तज्ज्ञांनी शेतकऱ्यांना नियमित शेत पाहणी करण्याचे आवाहन केले आहे. पानांवर डाग, पाने वाळणे, अळीचा प्रादुर्भाव किंवा इतर कोणतीही असामान्य लक्षणे दिसताच विलंब न करता कृषी सहाय्यक किंवा कृषी विज्ञान केंद्राशी संपर्क साधावा.
"वेळीच निरीक्षण, योग्य निचरा आणि शास्त्रशुद्ध फवारणी केल्यास तूर पिकाचे मोठे नुकसान टाळता येऊ शकते," असे आवाहन कृषी तज्ज्ञांनी केले आहे.

 शेतकऱ्यांसाठी महत्त्वाच्या सूचना
शेतात पाणी साचू देऊ नका.रोगट झाडे त्वरित काढून नष्ट करा.
नियमित शेताची पाहणी करा.कृषी तज्ज्ञांच्या सल्ल्यानेच फवारणी करा.पाऊस थांबल्यानंतरच फवारणी व खत व्यवस्थापन करा."वेळीच काळजी घेतली तरच तूर पिकाचे उत्पादन आणि गुणवत्ता सुरक्षित राहील," असा इशाराही कृषी विभागाने दिला आहे.