आधुनिक केसरी न्यूज
नयन डुंबरे
आळेफाटा : ता. जुन्नर पुणे जिल्ह्याच्या सरहद्दीवरील जुन्नर तालुक्यातील आळेफाटा परिसरात माणुसकीला काळिमा फासणारी घटना घडली आहे. मोशी,ता.हवेली येथील २९ वर्षीय बाप सागर सदाशिव शिंदे याने आपल्याच ३वर्षीय मुलीचा आणि ५ वर्षीय मुलाचा गळा दाबून त्यांना आळेखिंडीच्या जंगलात फेकून दिले. या क्रूर कृत्यात चिमुकलीचा मृत्यू झाला, तर मुलगा बचावला असून तो मृत्यूशी झुंज देत आहे. पोलिसांनी आरोपी बापाला अटक केली आहे.
मंगळवारी रात्री सागर शिंदे याने आपली मुले हर्षदा वय ३ वर्ष आणि आर्यन वय ५ वर्ष यांना फिरायला घेऊन जात असल्याचे सांगून घरातून नेले. पुणे-नाशिक महामार्गाने नाशिककडे गेलेल्या सागरने रात्रीच्या सुमारास संतवाडी आळेखिंडी परिसरातील जंगलात येऊन दोन्ही मुलांचा गळा दाबला आणि त्यांना तिथेच फेकून दिले. बुधवारी ६ मे रोजी सकाळी सागर पुन्हा मोशी येथील घरी परतला. आई-वडिलांनी मुले कुठे आहेत असे विचारले असता,त्याने चाकण येथे रूम घेतली असून मुले तिथेच आहेत असे खोटे सांगितले. त्यानंतर तो अंघोळ करून मुलांची कपडे घेऊन निघून गेला.दुसऱ्या दिवशी बुधवारी सकाळी ५ वर्षीय आर्यन शुद्धीवर आला.तो रडत रडत महामार्गावर आला असता स्थानिक ग्रामस्थांच्या नजरेस पडला. ग्रामस्थांनी तातडीने वडगाव आनंद आणि आळे पोलीस पाटील यांच्याशी संपर्क साधला.पोलिसांनी आर्यनला आळेफाटा पोलीस स्टेशनमध्ये आणले.चौकशीत त्याने आपले नाव आर्यन सागर शिंदे असून तो मोशी येथील रहिवासी असल्याचे सांगितले. त्याच्या माहितीच्या आधारे पोलिसांनी घटनास्थळी धाव घेत ३वर्षीय हर्षदा हिचा मृतदेह ताब्यात घेतला. पोलिसांनी नातेवाईकांसह भोसरी एमआयडीसी पोलीस ठाण्यात तक्रार दाखल केली.तपासाची चक्रे फिरवत पोलिसांनी सागर शिंदे याला चाकण येथून ताब्यात घेतले. चौकशीत त्याने मुलांना आळेखिंड येथील जंगलात गळा दाबून टाकल्याचे कबूल केले.आळेफाटा पोलिसांनी सागर शिंदे याला आळे घटनास्थळी आणले.बुधवारी रात्रीच्या वेळेस हर्षदाचा मृतदेह मिळून आला.सागर शिंदे यास अटक करण्यात आली असून पुढील तपास पोलीस निरीक्षक विश्वास जाधव यांच्या मार्गदर्शनाखाली सहाय्यक पोलीस निरीक्षक अमोल पन्हाळकर करत आहेत.या घटनेमुळे आळेफाटा परिसरात हळहळ व्यक्त होत असून नागरिकांमध्ये संतापाची लाट पसरली आहे.आरोपीवर कठोर कारवाई करावी,अशी मागणी ग्रामस्थांकडून होत आहे.
Comment List