संत चोखासागराचे तीन वक्रद्वार  उघडले  २८.३४ दलघमी विसर्ग,१९ गावांना सतर्कतेचा इशारा 

आधुनिक केसरी न्यूज

 देऊळगाव राजा  : तालुक्यातील महत्त्वाकांक्षी प्रकल्प असलेल्या संत चोखासागर खडकपूर्णा प्रकल्पाचे तीन वक्रद्वार १० से.मि ने उघडण्यात आले असून खडकपूर्णा नदी पात्रात २८.३४ दशलक्ष घनमीटर पाण्याचा विसर्ग केला जात आहे. प्रकल्पाच्या संचय पातळीत होणारी पाण्याची आवक बघता द्वार कमी जास्त प्रमाणात उघडण्यात येणार असून नदीकाठीच्या १९ गावांना सतर्कतेचा इशारा देण्यात आला आहे.

 बुलढाणा जिल्ह्याचा महत्वकांक्षी प्रकल्प असलेल्या या मोठ्या प्रकल्पाचा संचलित साठा ९३.४० दशलक्ष घनमीटर असून पूर्ण संचय पातळी ५२०.५० मीटर आहे. प्रकल्पात सद्यस्थितीत ५२९  मीटर असून आजची टक्केवारी ८४.४५% आहे. सद्यस्थितीत उपयुक्त जलसाठा ७८.८८ दलघमी असून आजचा पाऊस २६ मिलिमीटर आहे. या पावसाळ्यात आज पर्यंत एकूण ५१२ मिलिमीटर पावसाची नोंद प्रकल्प क्षेत्रात झाली असून सोमवारी दुपारी प्रकल्पाचे तीन वक्रद्वार १० सेंटीमीटरने उघडण्यात आले आहे. काही दिवसापासून जाफराबाद भोकरदन भागात जोरदार पाऊस सुरू असल्याने खडकपूर्णा प्रकल्पाच्या पाणलोट क्षेत्रात पाण्याची आवक वाढली आहे. पाणलोट क्षेत्रात सद्यस्थितीत सुरू असलेला पाण्याचा वेग असाच कायम राहिला तर कोणत्याही क्षणी पूर नियंत्रणासाठी कल्पाचे द्वार उघडण्यात येणार आहे. अशा परिस्थितीत खडक पूर्णा नदीला पूर येण्याची शक्यता असून बुलढाणा पाटबंधारे विभाग व पूर नियंत्रण विभागाने नदीकाठच्या १९ गावांना सतर्कतेचा इशारा दिला आहे. या गावांना सतर्कतेचा इशारा - पाटबंधारे प्रशासनाने दिलेल्या सूचनेनुसार नदीकाठच्या देऊळगाव राजा सिंदखेड राजा व लोणार तालुक्यातील गावांमध्ये सावंगी टेकाळे,निमगाव गुरु, दिग्रस खुर्द डिग्रस बुद्रुक, टाकरखेड वायाळ,टाकळखेड भागिले, निमगाव वायाळ, साठेगाव,हिवरखेड, राहेरीखुर्द,तडेगावराहेरीबुद्रुक,ताडशिवनी,देवखेड,पिंपळखुटा,लिंगा,खापरखेडा, रायगाव, सावरगाव तेली या गावांचा समावेश आहे.