पंढरपूरहून परतताना भिगवणमध्ये दुचाकीला अज्ञात टँकर वाहनाची धडक, दुचाकीस्वार जागीच ठार तर पत्नीचा उपचारादरम्यान मृत्यू

आधुनिक केसरी न्यूज

निलेश मोरे

पुणेः सोलापूर राष्ट्रीय महामार्गावर इंदापूर तालुक्यातील भिगवण मध्ये दुचाकीला पाठीमागून भरधाव वेगाने आलेल्या टँकरने धडक दिल्याने झालेल्या अपघातात दुचाकीस्वाराचा जागीच मृत्यू झाला तर पाठीमागे बसलेली पत्नीचा उपचारादरम्यान मृत्यू झाला आहे. मृत दुचाकीस्वाराचे नाव मल्हारी बाजीराव पवार (वय-५७वर्षे) तर पत्नी चे नाव पंखाबाई मल्हारी पवार (वय ५० वर्षे) दोघेही (रा. येळपणे पोलीस वाडी, ता.श्रीगोंदा, जि. अहिल्यानगर) असे आहे.
धडक दिल्यानंतर मृत मल्हारी पवार हे दुचाकीवरून खाली पडल्यानंतर त्यांच्या डोक्यावरून टँकरचे चाक गेल्याने त्यांचा जागीच मृत्यू झाला तर त्यांच्या पत्नी पंखाबाई पवार या गंभीर जखमी झाल्या होत्या. अपघातानंतर टँकर चालक हा जखमींना मदत करण्याऐवजी तिथून आपल्या ताब्यात टँकर घेऊन पसार झाला. अपघाताची माहिती कळताच आपुलकीची सेवा अॅम्बुलन्सचे मालक केतन वाघ यांनी आपल्या अॅम्बुलन्समधून जखमी पंखाबाई पवार यांना लाईफ लाईन दवाखान्यामध्ये दाखल केले होते पण त्यांच्या उजव्या पायाच्या मांडीचे हाड, गुडघा व डाव्या हाताचे मनगट मोडले होते व अंतर्गत रक्तस्राव झाला होता तसेच डोळ्यासमोर पतीचा झालेला मृत्यू त्यामुळे त्यांचा वाढलेला रक्तदाब हा कमी न झाल्याने त्यांचा उपचारादरम्यान मृत्यू झाला आहे. अपघातानंतर टँकरचालक पळून गेला असुन, भिगवण पोलिस त्याचा तपास करीत असल्याची माहिती सहाय्यक पोलिस निरीक्षक विनोद महांगडे यांनी दिली. दरम्यान  मृत दाम्पत्यावर येळपणे येथे शोकाकुल वातावरणात अंत्यसंस्कार करण्यात आले. पवार यांच्या मागे एक मुलगा, दोन मुली असा परिवार आहे.