नाशिक–छत्रपती संभाजीनगर महामार्गावर पुन्हा भीषण अपघात मद्यधुंद; कंटेनर चालकाकडून दोन वाहनांना धडक, तिघे जखमी, एकाची प्रकृती चिंताजनक

आधुनिक केसरी न्यूज 

जनार्दन चव्हाण 

विंचूर (ता. निफाड) : नाशिक–छत्रपती संभाजीनगर महामार्गावर अपघातांची मालिका सुरूच असून आज पुन्हा एक भीषण अपघात घडल्याची घटना समोर आली आहे. मद्यधुंद अवस्थेत असलेल्या कंटेनर चालकाने दोन वाहनांना जोरदार धडक दिल्याने तिघेजण जखमी झाले असून त्यापैकी एकाची प्रकृती चिंताजनक असल्याची माहिती सूत्रांकडून मिळाली आहे.

ही घटना दुपारी साधारण २ वाजून ३ मिनिटांच्या सुमारास विंचूर नाशिक मार्गांवरील  खांदोडे वस्ती परिसरात घडली. मिळालेल्या माहितीनुसार, विंचूरकडून नाशिकच्या दिशेने जाणारी एक स्कोर्पिओ कार व एक मोटारसायकल मार्गावरून जात असताना, समोरून येणाऱ्या भरधाव कंटेनरने अचानक नियंत्रण गमावून दोन्ही वाहनांना जोरदार धडक दिली.

अपघाताचा धक्का इतका भीषण होता की, दोन्ही वाहनांचे मोठ्या प्रमाणात नुकसान झाले. घटनेनंतर परिसरात काही काळ भीतीचे वातावरण निर्माण झाले होते. स्थानिक नागरिकांनी तत्काळ धाव घेत जखमींना बाहेर काढून उपचारासाठी जवळच्या रुग्णालयात हलवले.जखमींपैकी दुचाकीस्वार याची प्रकृती गंभीर असल्याचे समजते, तर उर्वरित दोघांवर उपचार सुरू आहेत. अपघातानंतर काही काळ वाहतूक विस्कळीत झाली होती.दरम्यान, संबंधित कंटेनर चालक मद्यधुंद अवस्थेत असल्याचा प्राथमिक अंदाज व्यक्त केला जात असून, पोलीस घटनास्थळी दाखल झाले असून पुढील तपास सुरू आहे.महामार्गावरील सुरू असलेली कामे, बेदरकार वाहनचालक आणि नियमांचे उल्लंघन यामुळे अशा अपघातांची संख्या वाढत असल्याने नागरिकांमध्ये तीव्र संताप व्यक्त केला जात आहे. प्रशासनाने तातडीने उपाययोजना कराव्यात, अशी मागणीही यावेळी करण्यात येत आहे.