बिस्किटांवर विष टाकून १० कुत्रे मारले; पहाडसिंगपुऱ्यातील घटना..!

आधुनिक केसरी न्यूज 

छत्रपती संभाजीनगर : मैदानावर विषारी बिस्किटे टाकून अज्ञाताने महिला उपनिरीक्षकाच्या पाळीव कुत्र्यासह चार मोकाट कुत्रे आणि चार पिल्ले असे १० कुत्रे ठार मारले. ही संतापजनक घटना गुरुवारी (३० जानेवारी) सकाळी पावणेसातच्या सुमारास पहाडसिंगपुरा भागात घडली.

फिर्यादी उषा राजू घाटे (५२, रा. शुभनगर, पहाडसिंगपुरा) या पोलिस कल्याण विभागात उपनिरीक्षक म्हणून नोकरीला आहेत. त्यांनी सकाळी पावणेसातच्या सुमारास त्यांचा लेब्राडॉर जातीचा पाळीव कुत्रा मैदानावर सोडला. पंधरा मिनिटाने त्याला घरात आणून सोडले. त्यानंतर उषा घाटे या पतीसह मॉर्निंग वॉकसाठी गेल्या. साडेआठच्या सुमारास परत आल्यानंतर त्यांचा कुत्रा उलट्या करत असल्याचे दिसले. तेव्हा शेजारच्या छगन सलामपुरे यांनी त्यांना सांगितले की, मैदानावर कुणीतरी विषारी बिस्किटे टाकली होती. ते त्याने खाल्ली असतील. त्याला पशुवैद्यकीय रुग्णालयात नेले, मात्र तो मरण पावला. त्याच्यासोबत मोकाट चार कुत्रे आणि चार पिल्लेदेखील ती बिस्किटे खाऊन ठार झाल्याचे उघड झाले. याप्रकरणी बेगमपुरा पोलिसात अज्ञातांविरुद्ध बीएमएस ३२५ कलमानुसार गुन्हा दाखल केला.