दणदणीत विजयानंतर मुंबईत पोहोचताच आमदार किशोर जोरगेवार यांचा देवेंद्र फडणवीस यांनी केला सत्कार

आधुनिक केसरी न्यूज 
 
चंद्रपूर : विधानसभा क्षेत्रात मोठ्या मताधिक्याने निवडून येत आमदार किशोर जोरगेवार यांनी भारतीय जनता पक्षाला पुन्हा एकदा चंद्रपूरचा गड परत मिळवून दिला आहे. आज मुंबई येथील शासकीय निवासस्थानी उपमुख्यमंत्री देवेंद्र फडणवीस यांनी शॉल व श्रीफळ देत आमदार किशोर जोरगेवार यांचा  सत्कार केला.
 नुकत्याच झालेल्या विधानसभेच्या निकालात महायुतीला स्पष्ट बहुमत मिळाले आहे. चंद्रपूर विधानसभा क्षेत्रात आमदार किशोर जोरगेवार यांनी काँग्रेसचे उमेदवार प्रवीण पडवेकर यांचा २२,००० हून अधिक मतांनी पराभव केला. आमदार जोरगेवार सलग दुसऱ्यांदा चंद्रपूर विधानसभेचे आमदार म्हणून विधानसभेत पोहोचले आहेत. भाजपचा गड मानल्या जाणाऱ्या चंद्रपूर मतदारसंघात मागील निवडणुकीत आमदार किशोर जोरगेवार यांनी अपक्ष उमेदवार म्हणून भाजपा उमेदवाराचा पराभव केला होता. यंदा भाजपच्या चिन्हावर निवडणूक लढवत त्यांनी मोठ्या विजयाची नोंद केली. त्यामुळे चंद्रपूर मतदारसंघात भारतीय जनता पक्षाचे बळ पुन्हा वाढले आहे.

दरम्यान, आज मुंबईत असताना उपमुख्यमंत्री देवेंद्र फडणवीस यांनी आपल्या शासकीय निवासस्थानी आमदार जोरगेवार यांचा शॉल श्रीफळ देत त्यांचा सत्कार केला.या वेळी बोलताना आमदार जोरगेवार म्हणाले, "पक्षाने दाखविलेल्या विश्वासाला कुठेही तडा जाऊ देणार नाही. पक्ष संघटना बळकट करण्यासाठी पूर्ण ताकदीने प्रयत्न करू. येणाऱ्या प्रत्येक स्थानिक स्वराज्य संस्थांच्या निवडणुकांमध्ये भाजपचा झेंडा फडकेल, यासाठी मी प्रयत्नशील राहील. तसेच, चंद्रपूरातील विकासकामे मार्गी लावणार असल्याचेही यावेळी ते म्हणाले आहे.