हरवलेल्या 11 वर्षीय मुलाचा 12 तासांत सुगम शोध; तेलंगणामधून सुरक्षित परतवला

आधुनिक केसरी न्यूज

लक्ष्मीकांत मुंडे 

किनवट :  पोलीस ठाण्यात दाखल गुन्हा क्रमांक 172/2025, कलम 137(2) भा.दं.सं. (BNS) अंतर्गत हरविलेल्या मुलाचा शोध घेण्यात पोलीस प्रशासनाला यश आले असून, केवळ 12 तासांत सदर मुलगा तेलंगणा राज्यातून शोधून काढण्यात आला आहे. हरविलेल्या मुलाचे नाव राजेश उर्फ सोनू रामचंद्र कटारे (वय 11 वर्षे, रा. बोधडी खुर्द, ता. किनवट) असे आहे. सदर घटनेबाबत माहिती मिळाल्यानंतर माननीय पोलीस निरीक्षक देविदास चोपडे  यांच्या आदेशानुसार व मार्गदर्शनाखाली तात्काळ शोधमोहीम राबविण्यात आली.

या तपासकार्याची जबाबदारी पोलीस हेडकॉन्स्टेबल सिद्धार्थ वाघमारे व  प्रदीप आत्राम यांच्याकडे सोपविण्यात आली होती. त्यांनी तांत्रिक विश्लेषण, गोपनीय माहिती व तत्पर कारवाईच्या आधारे तेलंगणा राज्यात तपास सुरू ठेवत संबंधित मुलास शोधून काढले.शेवटी, सदर मुलास त्याचे वडील श्री. रामचंद्र शिवराम कटारे यांच्याकडे सुखरूप ताब्यात देण्यात आले असून, संपूर्ण कार्यवाहीत पोलिसांनी तत्परता व कार्यक्षमतेचे उत्तम उदाहरण सादर केले आहे.या कामगिरीबद्दल नागरिकांतून पोलीस दलाचे कौतुक करण्यात येत आहे.