मुंबई : मनसे अध्यक्ष राज ठाकरे यांनी मशिदींवरील भोंग्यांबाबत मांडलेल्या भूमिकेवरून देशभरात वाद
निर्माण झाला आहे. यासंदर्भात आता राज ठाकरेंनी मुख्यमंत्री उद्धव ठाकरे यांना खुले पत्र आपल्या
ट्विटर हँडलवरून शेअर केले आहे. या पत्रात मुख्यमंत्री उद्धव ठाकरे यांना थेट इशारा दिला आहे.

राज ठाकरे पत्रात म्हणतात, “सरकारला माझं एकच सांगणं आहे की, राज्य सरकारने आमच्या
सहनशीलतेचा अंत पाहू नये. सत्ता येत जात असते कुणीही सत्तेचा ताम्रपट घेऊन आलेला नाही.
उद्धव ठाकरे, तुम्हीही नाही!” असे म्हणत राज ठाकरेंनी मुख्यमंत्री उद्धव ठाकरे यांना थेट इशारा
दिला आहे.

राज्य सरकारला माझं एकच सांगणं आहे;
आमच्या सहनशीलतेचा अंत पाहू नका.
सत्ता येत- जात असते.
कुणीही सत्तेचा ताम्रपट घेऊन आलेला नाही.
उद्धव ठाकरे, तुम्हीही नाही!@CMOMaharashtra pic.twitter.com/M0hpLg7sfP

— Raj Thackeray (@RajThackeray) May 10, 2022

सर्व देशबांधवांना मशिदींवरील भोंगे उतरवण्यासाठी मी पत्राद्वारे आवाहन केल्यानंतर महाराष्ट्र राज्य
सरकार बेभान होऊन अंगात आल्यासारखं वागत आहे. देशाचे सर्वोच्च न्यायालय आणि विविध
राज्यातील उच्च न्यायालये यांनी दिलेल्या निर्णयांची अंमलबजावणी व्हावी यासाठी माझ्या महाराष्ट्र
सैनिकांनी 4 मे रोजी ‘भोंगे उतरवा’ आंदोलन सुरु करण्यापूर्वी ठिकठिकाणी त्यांची धरपकड
करण्यात आली. तब्बल 28 हजार महाराष्ट्र सैनिकांना पोलिसांनी प्रतिबंधात्मक नोटिसा बजावल्या,
हजोरोंना तडीपार केलं आणि अनेकांना तुरुंगात डांबलं, कशासाठी? ध्वनिप्रदूषण करणारे, लोकांना त्रास
देणारे मशिदींवरचे अनअधिककृत भोंगे उतरवले जाऊ नयेत यासाठी!

गेला आठवडा महाराष्ट्र सैनिकांची दडपणूक करण्यासाठी सरकार ज्या पद्धतीने पोलीस बळाचा वापर
करत आहे हे पाहता मला प्रश्न पडला आहे की, मशिदींमध्ये लपवून ठेवलेली शस्त्रास्त्रे आणि
अतिरेकी शोधून काढण्यासाठी अशी ‘धरपडक मोहीम’ राज्य सरकारने किंवा पोलिसांनी कधी
राबवली होती का? आमचा संदीप देशपांडे आणि इतर अनेक कार्यकर्त्यांना पोलीस असे काही शोधत
आहेत जणू, ते पाकिस्तानातून आलेले अतिरेकी किंवा निजामाच्या हैद्राबाद संस्थानातले ‘रझाकार’
आहेत! अर्थात, महाराष्ट्र सैनिकांविरोधात ही अत्याचारी, दमनकारी कठोर कारवाई करण्याचे आदेश
पोलिसांना कुणी दिलेत हे समस्त मराठीजन, तमाम हिंदूजन उघड्या डोळ्यांनी बघत आहेत.

त्यामुळे राज्य सरकारला माझं एकच सांगणं आहे; आमच्या सहनशीलतेचा अंत पाहू नका, सत्ता
येत-जात असते. कुणीही सत्तेचा ताम्रपट घेऊन आलेला नाही. उद्धव ठाकरे, तुम्हीही नाही!, असे राज
ठाकरे यांच्या पत्रात नमुद आहे.

नवी दिल्ली : १३ दिवसांचा तुरुंगवास भोगून बाहेर आलेल्या अमरावतीच्या अपक्ष खासदार नवनीत
राणा आणि त्यांचे आमदार पती रवी राणा यांनी सोमवारी सायंकाळी लोकसभेचे अध्यक्ष ओम बिर्ला
यांची भेट घेतली. राज्य सरकार आणि महाराष्ट्र पोलिसांनी केलेल्या छळाची तक्रार त्यांनी यावेळी
केली. तसेच शिवसेना खासदार संजय राऊत यांनी पत्रकार परिषद घेऊन मला २० फुट जमीनीत
गाडण्याची धमकी दिल्याने त्यांच्याविरोधात पोलिसांत गुन्हा नोंदविणार असल्याचे सांगितले.
लोकसभेचे अध्यक्ष या नात्याने ते आपल्याला न्याय देतील, अशी आशा नवनीत राणा यांनी भेटीनंतर
व्यक्त केली.

दिल्लीत आल्यानंतर नवनीत राणा यांनी मुख्यमंत्री उद्धव ठाकरे, शिवसेनेचे खासदार संजय राऊत
तसेच मुंबईचे पोलीस आयुक्त संजय पांडे यांच्यावर टीका केली. सायंकाळी साडेपाच वाजता राणा
दाम्पत्याने लोकसभा अध्यक्ष बिर्ला यांच्या निवासस्थानी भेट घेतली. ‘अटकेपासून तुरुंगापर्यंत
पोलिसांनी कसा छळ केला, याची तपशीलवार माहिती आपण लोकसभा अध्यक्षांना दिली. २३ मे रोजी
लोकसभेच्या विशेषाधिकार समितीची बैठक होणार असून त्यात आपला लेखी व तोंडी जबाब नोंदवून
घेण्यात येणार आहे’, असे नवनीत राणा यांनी सांगितले.

पुणे : राज्य महिला आयोगाच्या अध्यक्षा रुपाली चाकणकर यांनी राष्ट्रवादी काँग्रेस पक्ष कार्यालयात
भेट दिली. यावेळी त्यांनी नवनीत राणा यांच्यावर निशाणा साधला आहे. अपक्ष खासदार नवनीत राणा
हे जर केंद्रात प्रतिनिधित्व करत आहे तर त्यांना माझा एक प्रश्न आहे. जेव्हा महाराष्ट्र अडचणीत
होता, तेव्हा त्यांनी केंद्राकडे राज्याबाबत मदत मागितली असती तर ती लोकांच्या लक्षात आली असती.
हे जे काही चाललं आहे, ते शांत महाराष्ट्र अशांत करण्याचा प्रयत्न काही विकृत मनोवृत्तीकडून होत
आहे, अशी घणाघाती टीका यावेळी रुपाली चाकणकरांनी नवनीत राणांवर केली.

राज्यातील ठाकरे सरकारविरोधात नवनीत राणा या केंद्रीय गृहमंत्री अमित शहा यांच्याकडे तक्रार
करणार आहेत. यावर राज्य महिला आयोगाच्या अध्यक्षा रुपाली चाकणकर यांना विचारलं असता त्या
म्हणाल्या, कोरोनाच्या महामारीतून अत्ताच महाराष्ट्र बाहेर आला आहे. महागाई, बेरोजगारी,
अर्थव्यवस्था, शेतकरी कष्टकऱ्यांचे प्रश्न असे खूप मोठे प्रश्न राज्यासमोर आहे. अनेक संकटे या
राज्यात आली. विरोधकांनी महाराष्ट्र सावरण्यासाठी मदत करावी, याउलट या राज्यात कसा वाद
निर्माण होईल याकडे काहींचे लक्ष आहे, असा टोलाही रुपाली चाकणकरांनी यावेळी लगावला.

औरंगाबाद : महसूल राज्यमंत्री आणि शिवसेना नेते अब्दुल सत्तार यांनी खासदार नवनीत राणा आणि आमदार रवी
राणा यांना थेट आव्हान दिले आहे. “मुख्यमंत्री उद्धव ठाकरे यांनी मला आदेश दिला, तर मी अमरावतीत जाऊन
खासदार नवनीत राणा आणि आमदार रवी राणा यांच्याविरोधात शिवसेनेच्या धनुष्यबाणावर निवडणूक लढेल,” असे
अब्दुल सत्तार म्हणाले, ते रविवारी (८ मे) बीडमध्ये बोलत होते.

सत्तार पुढे म्हणाले, राणे चार आण्यांसारखी गोष्ट करत आहेत. चारआणेवाला इतक्या मोठ्या डोंगराला आव्हान
देत आहे. मुख्यमंत्री उद्धव ठाकरे जे जे बोलले ते ते त्यांनी करुन दाखवले आहे. त्यांचे नाव लोकप्रिय मुख्यमंत्री म्हणून देशभर आहे. काही लोकांना बोलण्यासाठी माईक पाहिजे, काही तरी विषय पाहिजे. म्हणून ते अशा विषयांवर बोलतात. मुख्यमंत्र्यांनी मला आदेश दिला तर मी अमरावतीत जाऊन नवनीत राणा आणि रवी राणा यांच्याविरोधात शिवसेनेच्या धनुष्यबाणावर निवडणूक लढेल.

छत्रपती शिवाजी महाराज महाराष्ट्राचे राजे होते तेव्हाही दुष्काळ पडला, पण महाराजांनी त्यावेळी गुजरातमधील
सुरतहून महाराष्ट्रात पैसा आणला. आज संपूर्ण देशाचा पैसा गुजरातला चालला आहे. त्याचा रावसाहेब दानवे यांनी
हिशोब घेतला आणि महाराष्ट्राला, बीड जिल्ह्याला न्याय दिला तर त्यांनी काही कर्तव्य केलं असं म्हणता येईल.
त्यांनी कमीत कमी जालना ते जळगाव रेल्वे आणावी, असं म्हणत सत्तार यांनी खासदार रावसाहेब दानवेंवर टीका केली.

मुंबई : मुख्यमंत्री उद्धव ठाकरे यांच्या ‘मातोश्री’ निवासस्थानासमोर हनुमान चालीसा पठणचे आव्हान देणाऱ्या खासदार
नवनीत राणा यांना पोलिसांनी अटक केली होती. त्यानंतर आता त्या जामिनावर बाहेर असून त्यांनी पुन्हा एकदा मुख्यमंत्री
ठाकरे यांना आव्हान देणारे वक्तव्य केले आहे. जामिनाच्या अटींचे उल्लंघन केल्याप्रकरणी सरकारी वकील प्रदीप घरत
यांनी याबाबत न्यायालयात जाणार असल्याचे म्हटले आहे.

दरम्यान, न्यायालयाने नवनीत राणा यांना जामीन देताना प्रसारमाध्यमांना कोणतीही प्रतिक्रिया न देण्याची अट ठेवली
होती. मात्र नवनीत राणा यांनी प्रसारमाध्यमांना प्रतिक्रिया देत, तसेच मुख्यमंत्र्यांना आव्हान देऊन न्यायालयाच्या
आदेशाचा अवमान केल्याचे आम्ही न्यायालयाच्या निदर्शनास आणून देऊ. सरकारी वकील प्रदीप घरत यांनी सांगितले आहे.
त्यामुळे पुन्हा एकदा नवनीत राणा अडचणीत येण्याची शक्यता आहे.

कारागृहातून सुटका झाल्यानंतर प्रकृती बरी नसल्याने नवनीत राणा यांना मुंबईतील लिलावती रुग्णालयात दाखल करण्यात
आले होते. रुग्णालयातून डिस्चार्ज मिळाल्यानंतर प्रसार माध्यमांशी संवाद साधताना नवनीत राणा म्हणाल्या की, “मी
मुख्यमंत्री उद्धव ठाकरे यांना आव्हान देते की जनतेमधून निवडणूक लढून विजयी होऊन दाखवा. महाराष्ट्रातील कोणताही
जिल्हा निवडा, तुमच्यासमोर एक महिला उभी राहून लढून दाखवेल.’ तसेच रामाच्या आणि हनुमानाच्या नावावर
सरकारने ज्याप्रकारे माझ्यावर अत्याचार केला त्याचे उत्तर महाराष्ट्राची जनता यांना नक्की देईल.” असे नवनीत राणा
म्हणाल्या आहेत.

नागपूर : मातोश्रीसमोर हनुमान चालिसा पठण प्रकरणी आमरावतीच्या खासदार नवनीत राणा यांना अटक झाली होती. त्यांची जामीनावर सुटका झाल्यानंतर त्यांना मुंबईतील लिलावती रुग्णालयात दाखल करण्यात आले आहे. विरोधीपक्षनेते देवेंद्र फडणवीस, भाजप आमदार आशिष शेलार यांनी लिलावती रुग्णालयात त्यांची भेट घेतली. त्यानंतर देवेंद्र फडणवीस यांनी नागपुरात प्रसारमाध्यमांशी संवाद साधला.

फडणवीस म्हणाले, आता नवनीत राणा यांची तब्येत बरी होतं आहे पण त्यांना जी वागणूक दिल्या गेली ते गंभीर आहे. नवनीत राणा यांची तब्येत स्थिर होत आहे. पण ज्याप्रकारे त्यांना वागणूक देण्यात आली ती अतिशय गंभीर आहे. गुन्हेगारांनीही जी वागणूक दिली जात नाही तशाप्रकारची वागणूक त्यांना देण्यात आली आहे. या सरकारने क्रौर्याच्या सर्व सीमा ओलांडल्या असे माझे मत असल्याचं देवेंद्र फडणवीस यांनी म्हटलं आहे.

नवनीत राणा यांची तुरुंगातून सुटका झाल्यानंतर त्यांना रुग्णालयात दाखल करण्यात आलं. सध्या त्यांच्यावर मुंबईतील लिलावती रुग्णालयात उपचार सुरू आहेत. न्यायालयीन कोठडी सुनावण्यात आल्यानंतर खासदार नवनीत राणा भायखळा येथील तुरूंगात होत्या. जामीन मिळाल्यानंतर 5 मे रोजी त्यांची जामीनावर सुटका करण्यात आली. मात्र, प्रकृती बरी नसल्यानं त्यांना मुंबईतील लिलावती रुग्णालयात दाखल करण्यात आलं आहे.

पिंपरी चिंचवड : राज्यात मनसे अध्यक्ष राज ठाकरे यांनी उपस्थित केलेला भोंग्याचा मुद्दा सध्या प्रचंड गाजत आहे.  यावरुन राजकारण मोठ्या प्रमाणात तापलं आहे. तसेच आगामी महापालिका निवडणूका लक्षात घेता राजकीय नेत्यांच्या सभा सुरु झाल्या आहेत. शिवसेना खासदार संजय राऊत यांचा सध्या पुणे दौरा सुरु आहे. यावेळी पत्रकारांशी बोलताना संजय राऊत यांनी राष्ट्रवादीचे आमदार अमोल कोल्हेवर निशाणा साधला आहे.

राऊत म्हणाले, माझा आत्मविश्वास तुम्हाला माहीतच आहे, इकडची दुनिया तिकडे करू,  हे दार नाही तर ते दार, ते दार नाही तर पलीकडचं दार आपण कुठं ही जाऊ, पण शिवाजी आढळराव पाटील संसदेत जाणारच. शिवाजी आढळराव पाटील हे 24 बाय 7 ऍक्टिव्ह असतात. पण शिरूरचे खासदार कधी दिसतात का तुम्हाला असं म्हणत राऊतांनी राष्ट्रवादीचे खासदार अमोल कोल्हेंवर निशाणा साधला.

राऊत पुढे म्हणाले, मी क्रिकेट खेळत नसलो तरी मला त्यातलं ज्ञान आहे. मला सगळ्या गुगल्या टाकता येतात. कारण मला बाळासाहेबांची शिकवण आहे आणि पवार साहेब सोबतीला आहेत. मला दोन गुरू आहेत त्यामुळे मैदानात बघा, असं वक्तव्य संजय राऊत यांनी केलं आहे. ते पुढे म्हणाले, आता महाविकास आघाडी असल्याने मला काही पथ्य, बंधनं पाळावी लागतायेत. जी माझ्या तत्वात बसत नाहीत, नाहीतर हा राऊत गप बसला असता का? असा सवाल ही त्यांनी उपस्थित कार्यकर्त्यांना केला.

जळगाव : महाराष्ट्रातील स्थानिक स्वराज्य संस्थांच्या निवडणुकीत ओबीसी आरक्षणावरून राजकारण चांगलेच तापले आहे. सुप्रीम कोर्टाने राज्य निवडणूक आयोगाला स्थानिक स्वराज्य संस्थांच्या निवडणुकांचे वेळापत्रक दोन आठवड्यात अधिसूचित करण्याचे निर्देश दिले आहेत. त्यामुळे आता या निवडणुका पुन्हा एकदा ओबीसी आरक्षणाशिवाय होण्याची शक्यता आहे. यावरुन आता भाजपाने महाविकास आघाडी सरकारला घेरले आहे. यावर राष्ट्रवादी काँग्रेसचे नेते तथा राज्याचे सामाजिक न्याय मंत्री धनंजय मुंडे यांनी विरोधीपक्षनेते देवेंद्र फडणवीस यांना प्रत्युत्तर दिले आहे.

धनंजय मुंडे जळगावमध्ये बोलताना म्हणाले, ओबीसी आरक्षणाविषयी कोणताही निर्णय न घेता महाविकास आघाडी सरकारवर टीकेचे बाण चालवणार्‍या देवेंद्र फडणवीस यांना जनाची नाही तर मनाची लाज वाटली पाहिजे. ओबीसी आरक्षणाला आम्ही विरोध केला किंवा हे सरकारचे अपयश आहे म्हणणार्‍यांना खरंतर जनाची नाही तर मनाची तरी लाज वाटली पाहिजे. कारण ज्यांच्या विचारधारेतच आरक्षण नाही त्या विचारधारेने आम्हाला सांगावं की आम्ही ओबीसी आरक्षणाच्या विरोधात आहोत.

माझं हे स्पष्ट मत आहे की मागच्या पाच वर्षांच्या काळात भाजपाच्या राज्यातील आणि केंद्रातील सरकारने आरक्षणासंदर्भात सर्वोच्च न्यायालयात केस चालू होती त्यावेळी जो इम्पेरिकल डेटा देणं अपेक्षित होतं तो दिला गेला नाही. हा ओबीसींचा डेटा केंद्र सरकारने दिला नाही. त्यामुळे हे त्यांचं अपयश आहे. आज आम्हाला ते जबाबदार धरत आहेत. निकाल लागल्यानंतर ते आमच्यावर जबाबदारी टाकत आहेत हे चुकीचं आहे. लोकांचा बुद्धीभेद करणं ही भाजपाची पद्धत आहे आणि आत्ताही ते आरक्षणाच्या मुद्द्यावर तेच करत आहेत. भाजपाने आता महाराष्ट्राच्या 12 कोटी जनतेचा विश्वास पूर्णपणे गमावला आहे. त्यामुळे ओबीसी असेल किंवा इतर आरक्षणाचा विषय असेल, जातीपातीचं राजकारण, धर्मांमध्ये तेढ निर्माण करणं असेल काहीही केलं तरीही भाजपाला महाराष्ट्रातली जनता ओळखून आहे. त्यांना ही जनता कधीही खपवून घेणार नाही, असे धनंजय मुंडे यांनी म्हटले आहे.

मुंबई येथे भाजपा ओबीसी मोर्चाच्या बैठकीत विरोधी पक्षनेते देवेंद्र फडणवीस ठाकरे सरकारवर टीका केली होती. आरक्षणाची जबाबदारी केंद्र सरकारची आहे असे म्हणतात. मग तुम्ही कशाला सरकारमध्ये आहात, द्या केंद्र सरकारच्या हातात द्या. ते सरकार चालवून ही दाखवेल आणि करुनही दाखवेल. तुम्हाला इथे वसुली करण्यासाठी निवडून दिले आहे का?, असा सवाल देवेंद्र फडणवीसांनी केला होता.

मुंबई : ओबीसी आरक्षणासंदर्भात राज्य सरकारने केलेला कायदा फेटाळून लावत 15 दिवसांमध्ये स्थानिक स्वराज्य संस्थांच्या निवडणुका जाहीर करा, असा आदेश हायकोर्टाने राज्य सरकारला दिला आहे. दरम्यान सर्वोच्च न्यायालयाच्या या निर्णयामुळे ओबीसी आरक्षणाशिवाय यंदाच्या निवडणुका होतील. यावर आता भाजप नेते आशिष शेलार यांनी महाविकासआघाडी सरकारला जबाबदार धरत जोरदार हल्लाबोल केला आहे.

शेलार म्हणाले, ओबीसी आरक्षणाला नख लावण्याचे आघाडी सरकारचे षडयंत्र होते, हे आम्ही वारंवार सागत होतो. ओबीसी राजकीय आरक्षणासंदर्भात गेल्या अडीच वर्षातील घटनाक्रम पाहिला, तर हे एक नियोजनबद्द षडयंत्र होते, हे आता उघड झाले आहे. या बाबत न्यायालयात जाणारा याचिकाकर्ता हा काँग्रेसचा कार्यकर्ता आहे. तो प्रदेशाध्यक्षांचा जवळचा आहे. देवेंद्र फडणवीस यांनी अडीच वर्षापूर्वी सरकारला सांगितले होते की, मागासवर्गीय आयोग गठीत करा. ट्रिपल टेस्ट करा. पण, सरकारने काही ऐकलं नाही. अलीकडेच आयोग गठीत करण्यात आला. जो अंतिम अहवाल दिला तो न्यायालयाने फेकून दिला. त्यामुळे ओबीसी आरक्षणाला नख लावण्याचे आघाडी सरकारचे षडयंत्र होते, असा आरोप आशिष शेलार यांनी केला.

दरम्यान सर्वोच्च न्यायालयाच्या आदेशानंतर आगामी निवडणुका ओबीसी आरक्षणाशिवाय घ्याव्या लागणार आहे. ओबीसी समाजाला न्याय देण्यासाठी भाजप पक्षांतर्गत तोडगा काढणार, असं आशिष शेलार यांनी सांगितलं. ओबीसी आरक्षणाशिवाय निवडणुका होणे आम्हाला मान्य नाही. जर ओबीसी आरक्षणाशिवाय निवडणुका झाल्या तर भाजपने पक्षांतर्गत तोडगा काढला आहे. आरक्षणाएवढ्या किंबहुना त्याही पेक्षा जास्त जागा ओबीसी समाजाला देऊ, असे आशिष शेलार म्हणाले.

मुंबई : भोंग्याच्या संदर्भात केंद्रातील सरकारनेच संपूर्ण देशासाठी एक धोरण आणावे, असे मत राज्याचे गृहमंत्री दिलीप वळसे पाटील यांनी व्यक्त केले आहे. राज्यात सध्या भोंग्यांवरून राजकीय वातावरण तापले आहे. मनसे अध्यक्ष राज ठाकरे यांनी 3 मे रोजीपर्यंतच अल्टिमेटम दिल्यानंतर 4 मे रोजी अनेक मशिदींवरील भोंगे बंद होते. तसेच, मंदिरांवरील भोंग्यांना आता या आंदोलनाचा फटका बसताना दिसला. याबाबत राज्य सरकार काही निर्णय घेणार का असा प्रश्न होता. मात्र, राज ठाकरेंचे आंदोलन फ्लॉप झाल्यानंतर आता गृहमंत्र्यांनी भोंगे विषयावर केंद्राने निर्णय घ्यावा असे म्हटले आहे.

गृहमंत्री वळसे पाटील म्हणाले, मी याविषयी सर्व वरिष्ठ अधिकार्‍यांशी बोललो, सर्व पक्षांच्या नेत्यांशी बोललो. खरंतर यासंदर्भातील एक धोरण हे केंद्र सरकारनेच पूर्ण देशासाठी आणायला पाहिजे. ज्या काही घटना घडल्या त्यामध्ये मी हिंदू-मुस्लिम सर्वांनाच मनापासून धन्यवाद देईल, त्यांचे आभार मानेल, त्यांनी सहकार्य केले म्हणूनच अतिशय शांततेने हा प्रश्न मार्गी लागला, असेही ते म्हणाले.

मशिदीवरील भोंग्यांसोबतच आता राज्यातील मंदिरांवरील भोंगेही अडचणीत आले आहेत. आता मशिदीसह मंदिरांवरील भोंग्यासाठीही पोलिसांची परवानगी घ्यावी लागणार आहे. तर, रात्री 10 ते सकाळी 6 वाजेपर्यंत भोंगे बंद ठेवावे लागणार आहेत. तसेच, आवाजाची मर्यादाही पाळावी लागणार आहे. असेही गृहमंत्री म्हणाले.

अकोला : आगामी निवडणूक मी भोंग्याविना लढविणार आहे. केवळ सभेसाठी एक दिवस भोंग्याचा वापर करेल, अशी घोषणा राज्यमंत्री तथा अकोला जिल्ह्याचे पालकमंत्री बच्चू कडू यांनी केली आहे. ते अकोल्यात प्रसारमाध्यमांशी संवाद साधताना बोलत होते.

यावेळी बोलत असतांना बच्चू कडू म्हणाले की, येत्या निवडणुकीत मी फक्त सभेच्या दिवशीच भोंगे वाजवील, सभेशिवाय भोंगा वाजवणार नाही. कारण त्याचा सगळ्यात जास्त त्रास आहे. तसेच भोंग्याच्या आवाजामुळे निश्चितच प्रदुषण होते, मग ते भोंगे मंदिराचे असू दे, मशिदीवरील असू दे, बुद्ध विहार किंवा राजकीय लोकांचे भोंगे असू दे. निवडणुकीत भोंगे का वाजवायचे? आम्हाला मतं द्या, आम्हाला मतं द्या असं भोंग्यावर सांगण्याची काय गरज आहे. ते देखील बंद व्हावेत. यासाठी आम्ही देखील प्रयत्न करणार आहोत, असेही कडू यावेळी म्हणाले.

मुंबई : मुख्यमंत्री उद्धव ठाकरे यांच्या मातोश्री या निवास्थानासमोर हनुमान चालीसा पठण करण्याचा इशारा दिल्याप्रकरणी अमरावतीच्या अपक्ष खासदार नवनीत राणा आणि वडनेरा मतदार संघाचे आमदार रवी राणा यांना मुंबई पोलिसांनी अटक केली होती. मुंबई सत्र न्यायालयाच्या विशेष कोर्टाने अखेर बारा दिवसांनी त्यांना जामीन मंजूर केला. आज सकाळी भायखळा तुरुंगातून सुटका झाल्यानंतर नवनीत राणा थेट लीलावती रुग्णालयात उपचारासाठी दाखल झाल्या. यावेळी भाजप नेते किरीट सोमय्या यांनी राणा दाम्पत्याची भेट घेत विचारपूस केली. त्यानंतर सोमय्या यांनी प्रसारमाध्यमांशी संवाद साधला.

किरीट सोमय्या म्हणाले, रवी राणांचा तुरुंगातील अनुभव ऐकला आणि इंग्रजांची आठवण झाली. इंग्रजांच्या काळातील जेलर कैद्यांसोबत काय करायचे? याचा स्वप्नातही विचार केला नव्हता. पण रवी राणा यांना याचा प्रत्यक्ष अनुभव आला आहे. रवी राणा यांना रुग्णालयात दाखल करण्याची गरज नसली तरी, त्यांना मोठा मानसिक धक्का बसला आहे. त्यांना भेटलो तेव्हा त्यांच्या डोळ्यात अश्रू होते, असंही सोमय्या यावेळी म्हणाले.

नवनीत राणा यांना मणक्याचा जुना आजार होता. या आजाराबाबत सांगूनही प्रशासनाकडून त्यांना वाईट वागणूक देण्यात आली. त्यांना खाली बसवण्यात आले. सात-सात तास रांगेत उभे केले. त्यामुळे त्यांचा मणक्याचा त्रास वाढला आहे. डॉक्टरांनी त्यांची तपासणी केली असून त्यांच्यावर उपचार सुरू आहेत. उद्याही काही तपासण्या केल्या जातील. पत्नीला भेटल्यानंतर रवी राणा यांच्या डोळ्यात अश्रू होते. हे अश्रू पत्नीबाबत असलेल्या चिंतेचे होते, असे किरीट सोमय्या माध्यमांशी बोलताना म्हणाले.