आधुनिक केसरी न्यूज 

शेगाव दि.२९  आज २९ जुलै रोजी गुरुपौर्णिमा  तिथीला राज्यातील कानाकोपऱ्यातून आलेल्या हजारो भाविकांनी श्री संत गजानन महाराज मंदिरात श्रींचे दर्शन घेतले.हिंदू धर्मियांमध्ये धार्मिकदृष्ट्या अत्यंत महत्त्वपूर्ण समजल्या जाणाऱ्या गुरुपौर्णिमा तिथीला गुरुची आराधना करण्यात येते श्री संत गजानन महाराजांना गुरु मानणाऱ्या हजारो भाविकांनी आज बुधवार दि. २९ जुलै रोजी श्री संत गजानन महाराज मंदिरात श्रींच्या चरणी नतमस्तक झाले.

गुरुपौर्णिमेच्या दिवशी आराध्य दैवत असलेल्या श्री संत गजानन महाराजांच्या चरणी नतमस्तक होण्याकरिता हजारो भाविक शेकडो किलोमीटर अंतर पायी चालून श्रींच्या मंदिरात पोहोचले होते श्री संत गजानन महाराज मंदिर संस्थानच्यावतीने भाविकांच्या दर्शनासाठी मंदिर परिसरामध्ये भक्तांच्या सेवेसाठी शेकडो सेवाधारी सेवा देत आहे. गुरु पौर्णिमेनिमित्त श्रींच्या दर्शना करिता मंदिरात आलेल्या शेकडो भाविकांनी पारायण हॉलमध्ये सहा ते सात तास बसून श्री दासगणू महाराज लिखित श्री गजानन विजय ग्रंथाच्या पारायण केले.तर मलकापूर येथील दोन हजार भाविकांनी गुरुपौर्णिमा निमित्ताने पायदळ वारीत सहभागी होऊन आज गुरुवार रोजी भाविक गण गण गणात बोते चार मंत्रोच्चार,टाळ मृदुंगाच्या गजर,करीत भाविक सहभागी झाले आहे 

गुरुपौर्णिमेच्या निमित्ताने राज्यातील भाविक आपआपल्या गुरुच्या दर्शनसाठी विविध धार्मिक ठिकाणी जातात त्यातील शिर्डी येथील श्री साँईबाबा, कारजा येथील श्री दत्त मदिर, अकलकोट येथील श्री स्वामी समर्थ तर शेगांव येथील श्री गजानन महाराज यांचे दर्शन घेतात.या सर्व ठिकाणी भाविकांनी दर्शनासाठी गर्दी दिसत आहे.

आधुनिक केसरी न्यूज 
 

माणिक सुर्यवंशी.

देगलूर येथील उपजिल्हा रुग्णालयामध्ये शासकीय निधीचा मोठा अपहार झाल्याची धक्कादायक बाब समोर आली असून, तब्बल ८९ लाख ७० हजार १५० रुपयांचा अपहार केल्याप्रकरणी वैद्यकीय अधीक्षकांसह पाच जणांविरुद्ध देगलूर पोलीस ठाण्यात गुन्हा दाखल करण्यात आला आहे. 'सेवार्थ' प्रणालीचा गैरवापर करून हा आर्थिक घोटाळा घडवून आणल्याचे निष्पन्न झाल्याने संपूर्ण राज्याच्या आरोग्य वर्तुळात आणि प्रशासनात तीव्र खळबळ उडाली आहे.
जिल्हा शल्यचिकित्सकांच्या फिर्यादीवरून कारवाई
जिल्हा शल्यचिकित्सक डॉ. संजय पेरके यांनी दिलेल्या तक्रारीवरून हा गुन्हा दाखल करण्यात आला आहे. पोलीस निरीक्षक सूर्यमोहन बोलमवाड या प्रकरणाचा सखोल तपास करत आहेत.
गुन्हा दाखल झालेल्या आरोपींची नावे:
 1. **डॉ. नरेश देवणीकर** (वैद्यकीय अधीक्षक, उपजिल्हा रुग्णालय, देगलूर)
 2. **रावसाहेब मोरे** (वरिष्ठ लिपिक)
 3. **दिगंबर मोरे** (प्रयोगशाळा सहाय्यक)
 4. **शिवाजी पवार** (पुरुष अधिपरिचारक)
 5. **माधव मगर** (कनिष्ठ लिपिक)
### **असा उघडकीस आला 'सेवार्थ' घोटाळा**
जिल्हा कोषागार कार्यालयामध्ये जुन्या व नव्या 'सेवार्थ' (Sevarth) प्रणालीतील माहितीचे डेटा मायग्रेशन (Data Migration) करण्याचे काम सुरू होते. या संगणकीय प्रक्रियेदरम्यान रुग्णालयाच्या वेतनावरील व्यवहारांमध्ये मोठी अनियमितता आणि संशयास्पद नोंदी निदर्शनास आल्या. त्यानंतर उपसंचालक, आरोग्य सेवा (लातूर मंडळ) यांच्या स्तरावर या प्रकरणाची उच्चस्तरीय चौकशी समितीमार्फत चौकशी करण्यात आली. या चौकशीत शासकीय निधीचा बेकायदेशीररीत्या अपहार झाल्याचे स्पष्ट निष्पन्न झाल्यानंतर संबंधित पाचही जणांवर फौजदारी गुन्हा दाखल करण्याचे आदेश देण्यात आले.
### **घोटाळ्याची कार्यपद्धती (Modus Operandi)**
फिर्यादीत नमूद केल्यानुसार, आरोपींनी आपापसात संगनमत करून 'सेवार्थ' प्रणालीमध्ये बेकायदेशीर फेरफार केले. प्रणालीमध्ये नियमबाह्यरीत्या मूळ वेतन व 'बेसिक एरिअर्स'ची (Basic Arrears) चुकीची नोंद करण्यात आली. या आधारे बनावट वेतन देयके (Fake Salary Bills) तयार करून ती सहायक कोषागार कार्यालयात मंजुरीसाठी सादर केली गेली. देयके मंजूर होताच आरोपी कर्मचाऱ्यांच्या वैयक्तिक बँक खात्यांमध्ये लाखो रुपयांची रक्कम वर्ग करण्यात आली.
### **आरोपींच्या खात्यावर वर्ग झालेली रक्कम:**
 * **रावसाहेब मोरे (वरिष्ठ लिपिक):** ₹३०,३८,१५०/-
 * **दिगंबर मोरे (प्रयोगशाळा सहाय्यक):** ₹३७,३१,७५०/-
 * **शिवाजी पवार (अधिपरिचारक):** ₹१८,५०,२५०/-
 * **माधव मगर (कनिष्ठ लिपिक):** ₹३,५०,०००/-
**एकूण अपहार रक्कम:** **₹८९,७०,१५०/-** (८९ लाख ७० हजार १५० रुपये)
पोलीस तपासात आणखी खुलासे होण्याची शक्यता
शासकीय रुग्णालयासारख्या संवेदनशील विभागात एवढ्या मोठ्या प्रमाणावर आर्थिक गैरव्यवहार झाल्याने प्रशासकीय यंत्रणा हादरली आहे. या प्रकरणात केवळ हेच पाच जण सहभागी आहेत की यामागे आणखी कोणाचा हात आहे, याचा शोध पोलीस घेत आहेत. तपासाअंती या प्रकरणाचे संपूर्ण चित्र स्पष्ट होईल आणि दोषींवर कठोर कायदेशीर कारवाई केली जाईल, अशी माहिती पोलीस सूत्रांनी दिली आहे.

आधुनिक केसरी केसरी 

चंद्रपूर : दि.28 भारतीय हवामान खात्याने दिलेल्या अंदाजानुसार 29 जुलै रोजी चंद्रपूर जिल्ह्याला रेड अलर्ट दिला असून काही ठिकाणी अत्यंत मुसळधार पाऊस पडण्याची शक्यता वर्तवण्यात आली आहे. अतिवृष्टीमुळे आपत्कालीन परिस्थिती निर्माण झाल्यास त्याचा परिणाम शालेय विद्यार्थ्यांवर होऊ नये, तसेच जिल्ह्यात कोणत्याही प्रकारची अनुचित घटना घडू नये, यासाठी 29 जुलै रोजी चंद्रपूर जिल्ह्यातील सर्व अंगणवाड्या, पूर्व प्राथमिक, प्राथमिक व माध्यमिक शाळा, विद्यालय, महाविद्यालये तसेच खाजगी कोचिंग क्लासेसला सुट्टी जाहीर करण्यात आली आहे. 
सदर आदेश जिल्हाधिकारी वसूमना पंत यांच्या स्वाक्षरीने निर्गमित झाले असून नागरिकांनी सतर्क राहून आवश्यक खबरदारी घ्यावी. तसेच आपत्कालीन परिस्थितीत जिल्हा आपत्ती व्यवस्थापन नियंत्रण कक्ष जिल्हाधिकारी कार्यालय 07172 - 250077 या क्रमांकावर संपर्क साधावा, असेही आदेशात नमूद आहे.

आधुनिक केसरी न्यूज 

गोंदिया :  गोंदिया शहरातील सूर्याटोला परिसरातील बांध तलाव येथे मॉर्निंग वॉकसाठी गेलेल्या एका ज्येष्ठ नागरिकावर भरदिवसा प्राणघातक हल्ला झाल्याची धक्कादायक घटना घडली आहे. हल्लेखोरनी लूट करून फरार होण्यापूर्वी व्यक्तीच्या डोक्यावर धारदार शस्त्राने वार केले. या घटने शहरात भीतीचे वातावरण पसरले आहे. हद्दीतील सूर्याटोला येथील बांध तलावाच्या परिसरात नेहमीप्रमाणे आज २३ जुलै गुरुवारी सकाळी 7 वाजता प्रदीप अपाले वय 68 वर्ष हे मॉर्निंग वॉक करून घरी परत होते. याच वेळी मागून आलेल्या एका अज्ञात व्यक्तीने अचानक त्यांच्यावर हल्ला केला. हल्लेखोराने प्रदीप अपाले यांच्या डोक्यावर धारदार शस्त्राने दोन वार केले. जखमी अवस्थेत खाली पडलेल्या व्यक्तीच्या गळ्यातील सोन्याची चेन आणि बोटातील सोन्याची अंगठी हिसकावून आरोपी घटनास्थळावरून पसार झाला. हल्ल्यानंतर गंभीर जखमी झालेल्या प्रदीप अपाले यांना तातडीने खाजगी रुग्णालयात दाखल करण्यात आले आहे. त्यांच्यावर उपचार सुरू आहेत. घटनेची माहिती पोलिसांना मिळताच घटनास्थळी धाव घेत पंचनामा केला. अज्ञात व्यक्तीविरुद्ध गुन्हा दाखल करून आरोपीचा शोध घेण्यासाठी पोलिसांचे पथक तपास करत आहे. परिसरातील CCTV फुटेज तपासले जात आहेत.

नागरिकांमध्ये भीती
सकाळी मॉर्निंग वॉकला जाणाऱ्या नागरिकांसाठी बांध तलाव परिसर सुरक्षित समजला जातो. मात्र भरदिवसा झालेल्या या हल्ल्यामुळे स्थानिक नागरिकांमध्ये दहशत पसरली आहे. पोलिसांनी लवकरात लवकर आरोपीला अटक करून परिसरात गस्त वाढवावी, अशी मागणी नागरिक करत आहेत.

आधुनिक केसरी न्यूज 

सचिन सरतापे 

म्हसवड : माण तालुक्यातील एका तरुणीला लग्नाचे आमिष दाखवून, तिचे फोटो व्हायरल करण्याची धमकी देत तिच्या इच्छेविरुद्ध वारंवार लैंगिक अत्याचार केल्याप्रकरणी म्हसवड पोलीस ठाण्यात दोन जणांविरुद्ध गंभीर स्वरूपाचा गुन्हा दाखल करण्यात आला आहे. म्हसवड पोलीस ठाण्यात दाखल झालेल्या फिर्यादीनुसार, २४ जून २०२६ ते १३ जुलै २०२६ या कालावधीत माण तालुक्यातील परांती गावातील फिर्यादीच्या राहत्या घरी तसेच पुणे–जेजुरी मार्गावर एका मारुती स्विफ्ट (MH-53-B-0546) कारमध्ये ही घटना घडल्याचा आरोप करण्यात आला आहे.

पोलीसांनी दिलेल्या माहितीनुसार, नागेश महादेव खांडेकर (रा. खडकी, ता. माण, जि. सातारा) याने फिर्यादीशी गोड बोलून लग्नाचे आमिष दाखवले. तसेच जेजुरी येथे दोघांचे काढलेले फोटो व्हायरल करण्याची धमकी देऊन, योगेश कर्चे (पूर्ण नाव व पत्ता अद्याप निष्पन्न नाही) यांच्या मदतीने फिर्यादीच्या इच्छेविरुद्ध वारंवार शारीरिक संबंध ठेवल्याचा आरोप फिर्यादीने केला आहे. कोणास ही बाब सांगितल्यास कुटुंबीयांना जीवे मारण्याची धमकीही दिल्याचे फिर्यादीत नमूद आहे. या प्रकरणी म्हसवड पोलीस ठाण्यात गुन्हा रजिस्टर क्रमांक १९९/२०२६ अन्वये भारतीय न्याय संहिता (BNS) कलमे 64, 64(2)(m), 65(1), 96, 351(2)(3), 3(5) तसेच पॉक्सो कायद्याच्या कलम 4, 6, 8, 12 आणि 17 अंतर्गत गुन्हा दाखल करण्यात आला आहे. या प्रकरणाचा पुढील तपास सहाय्यक पोलीस निरीक्षक पोमन हे करीत असून, संशयित आरोपींना अटक करण्याची कार्यवाही सुरू असल्याची माहिती पोलिसांनी दिली आहे.

आधुनिक केसरी न्यूज 

गंगापूर : गंगापूर–वैजापूर रोडवरील जाखमाथा परिसरात सोमवारी सकाळी झालेल्या भीषण अपघातात स्कुटीस्वाराचा उपचारादरम्यान मृत्यू झाला, तर पल्सरस्वार गंभीर जखमी झाला आहे. या घटनेमुळे परिसरात हळहळ व्यक्त होत आहे. सूत्रांकडून मिळालेल्या माहितीनुसार, दीपक हरीभाऊ डोंगरे (वय ४०) हे सोमवारी सकाळी सुमारे १० वाजण्याच्या सुमारास गंगापूर शहरातून स्कुटीने वैजापूरच्या दिशेने जात होते. विठ्ठल आश्रमाजवळील जाखमाथा परिसरात त्यांच्या स्कुटीला मागून भरधाव वेगाने येणाऱ्या टू-ट्वेंटी पल्सर दुचाकीने जोरदार धडक दिली.

या भीषण धडकेत दोन्ही दुचाकीस्वार गंभीर जखमी झाले. स्थानिकांच्या मदतीने त्यांना तातडीने उपचारासाठी रुग्णालयात दाखल करण्यात आले. दीपक डोंगरे यांच्या डोक्याला गंभीर दुखापत झाल्याने त्यांना पुढील उपचारासाठी छत्रपती संभाजीनगर येथे हलविण्यात येत होते. मात्र, वाटेतच त्यांची प्राणज्योत मालवली.डोंगरे यांचा मृतदेह शवविच्छेदनासाठी गंगापूर उपजिल्हा रुग्णालयात आणण्यात आला असून, पल्सरस्वारावर गंगापूर येथील खासगी रुग्णालयात उपचार सुरू आहेत.

या प्रकरणी गंगापूर पोलीस ठाण्यात गुन्हा दाखल करण्याची प्रक्रिया सुरू असून, पुढील तपास पोलीस हेड कॉन्स्टेबल गणेश जाधव करीत आहेत. कुटुंबावर दुःखाचा डोंगर मृत दीपक हरीभाऊ डोंगरे यांच्या पश्चात आई, वडील, भाऊ, पत्नी, एक मुलगा व एक मुलगी असा परिवार असून, त्यांच्या अकाली निधनाने परिसरात शोककळा पसरली आहे.

आधुनिक केसरी 

नांद : हिमायतनगर पोटेड पोटा येथील एका शिक्षक गटशिक्षणाधिकारी, विस्तार अधिकारी व कार्यालयातील कर्मचारी यांच्या कामगार कंटाला गोदावरी नदीत कार आत्महत्या केली आहे. प्रधान शिक्षकाने आत्महत्ये पूर्वी व्हॉट्स ऍप टेटस ठेवऊन आत्महत्या केल्याने शिक्षण स्थानिक पातळीवर खळबळ माजली आहे. 
हदगाव पंचायत समितीचे गटशिक्षणाधिकारी कि फोले, विस्तार अधिकारी सुर्यका बाचे, केंद्र प्रमुख शिवाजी सहकारी शिक्षक दता विश्वंभर यांच्या नावाने टेट ठेऊन आत्महत्या केली आहे. वरिष्ठांच्या जाला कंटाकला जिल्हा परिषद शिक्षकांनी व्हॉट्स अपवर एक प्रश्न आपल्या सदस्याला वरिष्ठांचा स्टेटस जबाबदार धरला आहे.

मयत शिक्षक सुनील मोरे असे आत्महत्या केलेल्या शिक्षकाचे नाव असून, ते माझे भोकर बेंबर गावचे रहिवासी होते. सध्या ते हिमायतनगर येथील पोटा बुद्रुक जिल्हा परिषद शिक्षक म्हणून कार्यरत होते. मुददेखडे आमदुर घाट त्यांनी आपली कार गोदावरी नदीच्या प्रवाहात भारले हे टोकाचे पाऊल उचलले. या भीषणत सुनील मोरे विरोधक त्यांची लढाऊ सारा आणि मुलगा या घटनेची भीषण समस्या.

सुनील मोरे यांनी आत्महत्येपूर्वी व्हॉट्सॲपवर एक स्टेटस ठेवले होते. या स्टेटसमध्ये हदगावचे गटशिक्षणाधिकारी किशन फोले, विस्तार अधिकारी सुर्यंत बाचे, केंद्र प्रमुख शिवाजी, सहकारी शिक्षक दता विश्वंभर आणि उल्लेख करीत आहेत. मयत अध्यापक सुनिल मोरे यांच्या विविध परिस्थितीमध्ये २०२५ मध्ये विविध चौकश्या त्यांचा माणूस छळला. तसेच त्यांची कुटूंबाची बदनामी केली. तो अपमान मी सहन करू शकत नाही असे टेटस आपल्या मोबाईलमध्ये ठेऊन हे टोकाचे पाऊल उचलले आहे. त्यांच्याकडून मानसिक त्रासाला कंटाले हे पाऊल उचलत म्हटले आहे. दरम्यान, दुरची माहिती देणे आम्हा येथील गोदावरी नदी शोधमोहीम सुरू केली. 'एसडीआरएफ' नदीच्या नदीने अथक प्रयत्नांनंतर पात्र काढले आणि त्यामधील तिघांचे कारही बाहेर काढले आहेत. या मूलभूत शिक्षण वर्तुळात खळबळ उडाली असून हळहळ व्यक्त होत आहे. या भागाचा पुढील सुरू केला आहे.

आधुनिक केसरी न्यूज 

चंद्रपूर : विधिमंडळ पक्षनेते आ. विजय वडेट्टीवार यांनी गोसेखुर्द धरणातून दोन दिवसांत सिंचनासाठी पाणी न सोडल्यास तीव्र जनआंदोलनाचा इशाराव शेतकऱ्यांच्या रोषाला प्रशासनालाच सामोरे जावे लागेल, असा स्पष्ट आणि आक्रमक इशारा दिला होता. त्यानंतर प्रशासनात मोठी खळबळ उडाली असून वरिष्ठ अधिकाऱ्यांनी तातडीने बैठक घेऊन पाणी सोडण्याचा निर्णय घेतल्याची माहिती समोर आली असून उद्या दि.१७ जुलै सकाळी १० वाजता गोसेखुर्द चे पाणी सोडणार असल्याचे कळविले आहे.

ब्रह्मपुरी, सिंदेवाही, नागभीड, सावली तसेच परिसरातील हजारो शेतकरी पाण्याअभावी संकटात सापडले आहेत. धानासह अन्य पिके करपत असल्याने शेतकऱ्यांमध्ये संतापाची भावना निर्माण झाली होती. या गंभीर परिस्थितीची दखल घेत आ. वडेट्टीवार यांनी प्रशासनाला थेट अल्टिमेटम दिला होता. त्यानंतर केवळ एका दिवसात प्रशासनाने निर्णय घेतल्याने शेतकऱ्यांमध्ये समाधानाचे वातावरण आहे.

यावेळी आ. विजय वडेट्टीवार यांनी सांगितले की, "हा विजय माझा नसून शेतकऱ्यांच्या एकजुटीचा आणि त्यांच्या हक्काच्या लढ्याचा आहे. प्रशासनाने योग्य वेळी निर्णय घेतल्यामुळे हजारो हेक्टर शेतीला दिलासा मिळणार आहे. मात्र, भविष्यात अशा प्रश्नांवर शेतकऱ्यांना आंदोलनाची वेळ येणार नाही, याची जबाबदारी प्रशासनाने घ्यावी."सोबतच गोसेखुर्द कालव्याची प्रलंबित विकासकामे तातडीने पूर्ण करून शेती हंगामात शेतकऱ्यांना शेती व्यवसायासाठी मुबलक पाणी पुरवठा व्हावा याची वेळोवेळी काळजी संबंधित विभागाने घेतली पाहिजे असेही ते म्हणाले.

गोसेखुर्दचे पाणी नियोजित वेळेत सोडले जाणार असल्याने सिंचनाचा प्रश्न मोठ्या प्रमाणात मार्गी लागणार असून हजारो शेतकऱ्यांना दिलासा मिळणार आहे. आ. विजय वडेट्टीवार यांच्या ठाम भूमिकेमुळे आणि आक्रमक पाठपुराव्यामुळे प्रशासनाला अखेर झुकावे लागल्याची चर्चा संपूर्ण परिसरात सुरू आहे. मतदार संघाचे प्रश्न असो अथवा राज्यातील कुठलेही प्रश्न असो आपल्या आक्रमक शैलीत न्याय मिळवून देण्यासाठी काँग्रेस विधिमंडळ पक्षनेते आ. विजय वडेट्टीवार हे नेहमीच हिरीरीने प्रयत्न करतात. प्रत्येक सामन्याला न्याय मिळवून देणे हे लोकप्रतिनिधींचे आद्य कर्तव्य असून लोकप्रतिनिधी हा जनतेचा सेवक असल्याने लोकप्रतिनिधींनी जनतेसाठी समर्पित भावनेने कार्य केले पाहिजे असे मत विधिमंडळ पक्षनेते आ. विजय वडेट्टीवार यांनी यावेळी व्यक्त केले.

आधुनिक केसरी न्यूज 

मुंबई : दि.१५ छत्रपती संभाजीनगर वासियांना पुरेपूर पाण्याचा पुरवठा करण्यासाठी जायकवाडी प्रकल्पातून पाणीपुरवठा योजनेचे काम सुरू आहे. या योजनेचे काम गतीने पूर्ण करून शहरवासीयांना शुद्ध व नियमित पाणीपुरवठा करावा, असे स्पष्ट निर्देश मुख्यमंत्री देवेंद्र फडणवीस यांनी वर्षा निवासस्थानी याबाबत आयोजित बैठकीत दिले.

बैठकीस सामाजिक न्याय मंत्री संजय शिरसाट, खासदार संदिपान भुमरे, आमदार सतीश चव्हाण, माजी खासदार डॉ. भागवत कराड उपस्थित होते तर दूरदृश्य संवाद प्रणालीद्वारे इमाव बहुजन कल्याण मंत्री अतुल सावे, पाणीपुरवठा व स्वच्छता मंत्री गुलाबराव पाटील यांनी बैठकीत सहभाग घेतला.
 
कंत्राटदाराने व संबंधित यंत्रणांनी पाणीपुरवठा योजनेचे काम पूर्णत्वास नेण्यासाठी टप्पे पाडण्याच्या सूचना देत मुख्यमंत्री देवेंद्र फडणवीस म्हणाले, योजनेची अर्धवट झालेली कामे कंत्राटदाराकरवी तातडीने पूर्ण करून घ्यावीत. पाण्याच्या टाकीची बांधकामे पूर्ण करण्यात यावीत. शहरातील वितरण प्रणालीचे कामही पूर्णत्वास न्यावे. अर्धवट कामांमुळे शहरवासीयांना पूर्ण क्षमतेने पाणीपुरवठा करता येत नाही. या योजनेच्या कामासाठी संबंधित विभागाने स्थळ पाहणी करून सद्यस्थितीबाबत कंत्राटदारासोबत स्वतंत्र बैठक घ्यावी. 

मुख्यमंत्री फडणवीस म्हणाले, कुठल्याही परिस्थितीत योजनेचे काम विहित कालावधीत पूर्ण करावे. शेवटच्या शहरवासीयाला नियमित व शुद्ध पाण्याचा पुरवठा करणे हे शासनाचे कर्तव्य आहे. त्यानुसार महापालिका, महाराष्ट्र जीवन प्राधिकरण व पाणीपुरवठा विभागाने समन्वयाने काम करून योजना पूर्णत्वास न्यावी. शहरातील नळ जोडण्या देण्याचे प्रमाण वाढवावे. कंत्राटदाराच्या कामाचे मूल्यांकन करून वेळोवेळी कामाचा आढावा घ्यावा. संबंधित कंत्राटदाराकडून पाणीपुरवठा वितरण प्रणालीचे 'हायड्रोलिक टेस्टिंग' पूर्ण करावे.

 कंत्राटदाराने योजनेचे विहित कालावधीत काम पूर्ण करण्यासाठी पुरेसे मनुष्यबळ उपलब्ध करून द्यावे. योजनेच्या कामाचे नियोजित टप्पेनिहाय आराखडा बनवून याबाबत पुढील बैठकीत सादरीकरण करावे, अशा सूचनाही मुख्यमंत्र्यांनी यावेळी दिल्या. जुन्या पाणीपुरवठा वितरण प्रणालीच्या  रेस्टोरेशनचे कार्य महाराष्ट्र जीवन प्राधिकरणाने करावे. रिस्टोरेशनचे कार्य गतीने पूर्ण करून खोदलेले रस्ते आणि खड्ड्यांची दुरुस्ती करावी. पावसाळ्याच्या दिवसांमध्ये शहरात कुठेही खड्ड्यांमुळे अपघात होणार नाही, याची दक्षता घ्यावी, असे निर्देशही मुख्यमंत्री फडणवीस यांनी यावेळी दिले. 

बैठकीत पाणीपुरवठा विभागाचे प्रधान सचिव पराग जैन यांनी सादरीकरण केले. बैठकीस संभाजीनगरचे महापौर समीर राजूरकर, उपमहापौर राजेंद्र जंजाळ, स्थायी समिती अध्यक्ष अनिल मकरिये, अपर मुख्य सचिव (नगर विकास) के. गोविंदराज, महाराष्ट्र जीवन प्राधिकरणाचे सदस्य सचिव नायक, महापालिका आयुक्त अमोल येडगे, छत्रपती संभाजीनगर महानगर प्रदेश विकास प्राधिकरण महानगर आयुक्त जी. श्रीकांत आदी उपस्थित होते. तसेच दूरदृश्य संवाद प्रणालीद्वारे छत्रपती संभाजी नगर जिल्हाधिकारी विनय गौडा यांनी बैठकीत सहभाग घेतला.

थोडक्यात पाणीपुरवठा योजना ...
छत्रपती संभाजी नगर शहराच्या २०५२ मध्ये असणाऱ्या लोकसंख्येला ६०४ एमएलडी (मिलियन लिटर पर डे) एवढा पाणीपुरवठा गृहीत धरून जायकवाडी प्रकल्पावरून पाणीपुरवठा योजनेचे काम सुरू आहे. पाणी वितरणासाठी शहरात ५९ पाण्याच्या टाक्या बांधण्यात येणार त्यापैकी २९ पाण्याच्या टाक्या पूर्ण झाल्या आहेत. शहरात १९११ किलोमीटर पाणी पुरवठा वितरण प्रणालीपैकी १२९१ किलोमीटर पाईपलाईनचे काम पूर्ण करण्यात आले आहे. तसेच ४६ हजार ५०० नळ जोडण्या देण्यात आल्या आहेत.

आधुनिक केसरी न्यूज 

शेगांव : दि. १४ येथील मंदिर परिसरातील बहुप्रतिक्षित भू-संपादनाची प्रक्रिया अखेर दुसऱ्या दिवशी शांततेत आणि यशस्वीरीत्या पूर्ण झाली. पहिल्या दिवशी निर्माण झालेला कोंडीचा प्रश्न आज (१४ जुलै) नगर परिषद प्रशासन आणि बाधित १७ दुकानदार /घरमालक यांच्यातील यशस्वी चर्चेनंतर सुटला. सर्वोच्च न्यायालयाच्या आदेशानुसार एक 'विशेष बाब' म्हणून प्रशासनाने दुकानदारांना मालकी हक्काने पर्यायी जागा देण्याचे मान्य केल्याने हा मार्ग मोकळा झाला आहे.

 पहिल्या दिवशी (१३ जुलै) १७ खाजगी मालकीच्या जागा संपादित करण्यात नगर परिषदेला यश आले नव्हते. त्यामुळे आज दुसऱ्या दिवशी सकाळीच नगर परिषदेचे पथक १५ पोलीस अधिकारी आणि १५० कर्मचाऱ्यांच्या प्रचंड पोलीस ताफ्यासह घटनास्थळी दाखल झाले होते. मात्र, दुपारी १२:३० वाजेपर्यंत घटनास्थळी ना मुख्याधिकारी पोहोचले होते ना दुकानदार. यामुळे कारवाई नेमकी कुठे रेंगाळली, याबद्दल परिसरात उलटसुलट चर्चा सुरू होत्या. या दरम्यान, बाधित दुकानदारांनी थेट शेगाव नगर परिषद गाठून मुख्याधिकाऱ्यांशी चर्चा सुरू केली होती. दुकानदारांची स्पष्ट मागणी होती की, जर नगर परिषद नवीन व्यापारी संकुलात आम्हाला मालकी हक्काने दुकाने खरेदी करून देत असेल, तर आम्ही स्वतःहून ही जागा मोकळी करून देऊ. सामान्यतः नगर परिषद आपली जागा कोणालाही मालकी तत्त्वावर देत नाही. परंतु, या प्रकरणात सर्वोच्च न्यायालयाच्या आदेशाचा मान ठेवून ही अट 'अपवाद' (एक्सेप्शनल केस) म्हणून मान्य करण्यात आली. दुपारच्या सत्रात या १७ दुकानदारांनी चर्चेसाठी वेळ मागितला आणि अखेर सर्व जण या प्रस्तावावर सहमत झाले. काही दुकानदारांनी याला पूर्ण संमती दिली, तर काहींनी बेमनस्कपणे (नाईलाजाने) होकार दिला

डोळ्यात पाणी, पण सहकार्याची भूमिका : करार निश्चित झाल्यानंतर नगर प्रशासनाचा ताफा घटनास्थळी दाखल झाला. प्रशासनाच्या निर्णयाचा मान ठेवत दुकानदारांनी स्वतःहून आपली दुकाने रिकामी करण्यास सुरुवात केली. नगर परिषदेच्या कर्मचाऱ्यांनीही संवेदनशीलता दाखवत त्यांना सामान सुरक्षितपणे हलविण्यास मदत केली. गेल्या ४ पिढ्यांपासून या ठिकाणी स्थायिक असलेल्या कुटुंबांमधील महिलांचा आक्रोश आणि भावनांचा कल्लोळ मात्र हृदय पिळवटून टाकणारा होता. वर्षानुवर्षांचे राहते घर आणि व्यवसाय सोडताना अनेकांच्या डोळ्यांत पाणी आले, परंतु कायद्याचा आणि न्यायालयाच्या आदेशाचा आदर करत सर्वांनी मूकपणे आपले साहित्य हलवले. गेल्या ४ पिढ्यांपासून या ठिकाणी स्थायिक असलेल्या कुटुंबांमधील महिलांचा आक्रोश आणि भावनांचा कल्लोळ मात्र हृदय पिळवटून टाकणारा होता. वर्षानुवर्षांचे राहते घर आणि व्यवसाय सोडताना अनेकांच्या डोळ्यांत पाणी आले, परंतु कायद्याचा आणि न्यायालयाच्या आदेशाचा आदर करत सर्वांनी मूकपणे आपले साहित्य हलवले.

मालकी हक्क हस्तांतरण प्रक्रिया सुरू : या संदर्भात नगर परिषदेचे मुख्याधिकारी डॉ. जयश्री काटकर-बोराडे यांनी अधिकृत पत्र जारी केले आहे. सर्वोच्च न्यायालयाच्या विविध रिट याचिका आणि आदेशांचा संदर्भ देऊन प्रशासनाने स्पष्ट केले आहे की, ज्या गाळेधारकांना न.प. समोरील दुकानसमुहात गाळे वाटप झाले आहेत, त्यांनी मालकी हक्क हस्तांतरण आणि नोंदणीकृत खरेदीखत करण्यासाठी दुय्यम निबंधक कार्यालयात हजर राहावे व तात्काळ प्रक्रिया पूर्ण करावी.

थोडक्यात महत्त्वाचे : मंदिर परिसराच्या विकासासाठी आवश्यक असलेले हे भू-संपादन अखेर कोणताही वाद न होता, सामोपचाराने पूर्ण झाले आहे. दुकानदारांच्या हक्काचे रक्षण करत प्रशासनाने घेतलेला हा संवेदनशील निर्णय या मोहिमेचे मोठे यश मानले जात आहे.

आधुनिक केसरी न्यूज 

मुंबई : दि. १३ जुलै २०२६ भारतीय जनता पक्षाच्या सरकारने असा एकही विभाग अथवा क्षेत्र सोडले नाही जेथे भ्रष्टाचार केला नाही. ‘जाऊ तिथे खाऊ’ या म्हणीप्रमाणे केवळ भ्रष्टाचारच केला आहे. राम मंदिरातील भक्तांच्या देणगीवर दरोडा टाकून भाजपा आरएसएसवाल्यांचे पोट भरले नाही म्हणून की काय त्यांनी ‘लाडकी बहिण’ योजनेवरही दरोडा टाकला आहे. सत्तेतील सावत्र भावांनी बहिणींनाही सोडले नाही. हे सरकार आहे का दरोडेखोरांची टोळी? असा घणाघाती हल्लाबोल महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांनी केला आहे.

यासंदर्भात बोलताना काँग्रेस प्रदेशाध्यक्ष पुढे म्हणाले की, भाजप महायुती सरकारने 'लाडकी बहीण योजने' अंतर्गत कोट्यवधी रुपयांची अनियमितता केली आहे. 'लाडकी बहीण योजने' च्या आर्थिक व्यवस्थापनात अनेक गंभीर त्रुटी आढळून आल्या आहेत. या योजनेसाठी २९,६९३ कोटी रुपयांची तरतूद करण्यात आली होती, तरीही सरकारने मंजूर बजेटपेक्षा ३,५४१ कोटी रुपये अधिक खर्च केले. या ३,५४१ कोटी रुपयांच्या अतिरिक्त खर्चाबाबत सरकारकडे कोणतेही रेकॉर्ड किंवा हिशोब उपलब्ध नाही. शिवाय, या योजने अंतर्गत निधीची प्रत्यक्षात काहीही गरज नसतानाही तो काढून घेण्यात आला. विविध योजनांच्या नावाखाली कोट्यवधी रुपयांचा भ्रष्टाचार हा भाजपा सरकारची सवय बनली आहे. ना खाऊंगा ना खाने दुंगा, म्हणणारे दिसेल तेथे खातच सुटले आहेत, असे सपकाळ म्हणाले.

महिलांच्या कल्याणकारी योजनांसाठी होणारा खर्च २६१.७८ कोटी रुपयांवरून २०२४-२५ मध्ये ३३ हजार ५५४ कोटी रुपयांवर गेला. महिला योजनावर खर्च वाढला असताना गृहनिर्माण विभागातील योजनांवरील खर्च तब्बल ५४ टक्क्यांनी कमी झाली असून पाणी पुरवठा व स्वच्छतेवरील खर्चात ३१.८१ टक्यांची घट झालेली आहे. पायाभूत सुविधांवरचा खर्च कमी करून लाडकी बहिण योजनेवर वाढलेल्या खर्चामुळे सेवा वितरणाच्या शाश्वततेवर विपरीत परिणाम होऊ शकतो, असे ताशेरेही कॅगने ओढले आहेत. आर्थिकदृष्ट्या मागास कुटुंबातील मुलींसाठी असलेल्या लेक लाडकी योजनेतून ३४९० कोटी रुपये लाडकी बहिणसाठी वळवण्यात आले. याआधी सामाजिक न्याय विभागाचा निधीही लाडकी बहिण योजनेसाठी वळवण्यात आल्याचे उघड झाले आहे. हा सर्व प्रकार आर्थिक बेशिस्तीचा आहे, असेही हर्षवर्धन सपकाळ म्हणाले. 

विधानसभा निवडणुकीच्यावेळी महिलांच्या मतांवर डोळा ठेवून कोणताही अभ्यास न करता लाडकी बहिण योजना सुरु केली, दरमहा १५०० रुपये देण्यात आले व सत्तेत आलो तर २१०० रुपये देण्याची घोषणा केली होती पण २१०० रुपये देणे दुरच राहिले उलट सरकारने ९२ लाख लाडक्या बहिणांनाच केवायसीच्या नावाखाली योजनेतून वगळले, हा लाडक्या बहिणांचा विश्वासघात आहे. भाजपा महायुती सरकारने लाडक्या बहिणांच्या नावावर स्वतःचे खिसे भरले. लाडक्या बहिणींचा विश्वासघात व फसवणूक करणे, लाखो बहिणींना योजनेतून वगळल्याने महाराष्ट्राची बदनामी होत नाही का? असा सवाल विचारून प्रत्येक रुपयाचा हिशोब द्यावा लागेल, असेही काँग्रेस प्रदेशाध्यक्ष हर्षवर्धन सपकाळ यांनी म्हटले आहे.

आधुनिक केसरी न्यूज 

हिमायतनगर : शिक्षण क्षेत्रात कार्यरत असलेले नामांकित खाजगी कोचिंग क्लासेसचे एन. टी. जाधव यांनी 10 जुलै रोजी शुक्रवारी सकाळी 3 वाजून 30 मिनिटांनी  धक्कादायक पाऊल उचलत आपल्या खाजगी ट्युशनच्या परिसरातील चिंचेच्या झाडाला गळफास घेऊन जीवन संपविल्याची घटना घडली. या घटनेमुळे संपूर्ण शहरात हळहळ व्यक्त होत असून विद्यार्थी, पालक आणि नागरिकांमध्ये शोककळा पसरली आहे.

  प्राथमिक माहितीनुसार, सकाळच्या सुमारास काही नागरिकांना ट्युशन परिसरातील चिंचेच्या झाडाला जाधव गळफास घेतलेल्या अवस्थेत दिसून आले. याची माहिती तात्काळ हिमायतनगर पोलीस ठाण्याला देण्यात आली. पोलिसांनी घटनास्थळी धाव घेत पंचनामा करून मृतदेह शवविच्छेदनासाठी पाठविला. घटनेची माहिती मिळताच मोठ्या संख्येने नागरिक, माजी विद्यार्थी, पालक आणि परिसरातील प्रतिष्ठित व्यक्तींनी घटनास्थळी गर्दी केली.एन. टी. जाधव हे अनेक वर्षांपासून शिक्षण क्षेत्रात कार्यरत होते. त्यांच्या मार्गदर्शनाखाली अनेक विद्यार्थ्यांनी विविध स्पर्धा परीक्षा तसेच शैक्षणिक क्षेत्रात यश मिळविले होते. शांत, संयमी आणि विद्यार्थ्यांप्रती आपुलकीची भावना जपणारे शिक्षक अशी त्यांची ओळख होती. त्यामुळे त्यांच्या आकस्मिक निधनाने सर्वत्र दुःख व्यक्त करण्यात येत आहे. दरम्यान, या आत्महत्ये मागील नेमके कारण अद्याप स्पष्ट झालेले नाही. घटनास्थळी उपस्थित असलेल्या काही नागरिकांनी भूखंड व्यवहाराशी संबंधित वाद असल्याचा संशय व्यक्त केला आहे. तसेच काही दिवसांपूर्वी त्यांच्या शाळेची मान्यता रद्द झाल्यामुळे ते मानसिक तणावात असल्याचीही चर्चा परिसरात सुरू आहे. मात्र या सर्व बाबींना अद्याप कोणतीही अधिकृत पुष्टी मिळालेली नाही पोलीस सूत्रांकडून मिळालेल्या माहितीनुसार, आत्महत्येचे खरे कारण शोधण्यासाठी सर्व शक्य त्या अंगांनी तपास सुरू करण्यात आला आहे. मयताच्या कुटुंबीयांचे जबाब, जवळील व्यक्तींची चौकशी, मोबाईल कॉल रेकॉर्ड, तसेच इतर संबंधित बाबींची पडताळणी केली जात आहे. शवविच्छेदन अहवाल आणि तपासातील निष्कर्षानंतरच मृत्यूमागील कारण स्पष्ट होणार असल्याचे सांगण्यात येत आहे. हिमायतनगर पोलीस ठाण्याचे पोलीस निरीक्षक लक्ष्मण केंद्रे यांच्या मार्गदर्शनाखाली या प्रकरणाचा सखोल तपास सुरू असून, अफवांवर विश्वास न ठेवता अधिकृत तपास पूर्ण होईपर्यंत संयम बाळगण्याचे आवाहन पोलिसांकडून करण्यात आले आहे. या घटनेने हिमायतनगर शहरातील शिक्षण क्षेत्राला मोठा धक्का बसला असून, विद्यार्थ्यांसह सर्व स्तरांतून एन. टी. जाधव सर यांना भावपूर्ण श्रद्धांजली अर्पण करण्यात येत आहे. तपास पूर्ण झाल्यानंतरच या दुर्दैवी घटनेमागील नेमके सत्य समोर येणार आहे.

आधुनिक केसरी न्यूज 

निलेश मोरे

भिगवण :  दि.१० पर्यटनासाठी महाबळेश्वरला गेलेल्या भिगवण येथील २५ वर्षीय तरुणाचा संशयाच्या भरात मारहाण करून निर्घृण खून करण्यात आल्याची धक्कादायक घटना उघडकीस आली आहे. या प्रकरणी पाचगणी पोलिसांनी अवघ्या काही तासांत कारवाई करत चार जणांना अटक केली असून, त्यांच्याविरुद्ध खुनाचा गुन्हा दाखल करण्यात आला आहे.

मृत तरुण अक्षय रमेश जाधव हा ८ जुलै रोजी मित्रांसमवेत महाबळेश्वर येथे फिरण्यासाठी गेला होता. भोसे गावातील एका लॉजमध्ये मुक्काम केल्यानंतर रात्री तो अचानक बेपत्ता झाला. मित्रांनी परिसरात शोध घेत असताना हॉटेलपासून काही अंतरावर तो गंभीर जखमी अवस्थेत आढळून आला. प्राथमिक तपासात, स्थानिकांच्या संशयातून अक्षयला अडवून लाकडी दांडे, काठ्या तसेच लाथाबुक्क्यांनी बेदम मारहाण करण्यात आल्याचे समोर आले आहे. गंभीर जखमी झालेल्या अक्षयला पाचगणी, वाई आणि त्यानंतर बारामती येथे उपचारासाठी हलविण्यात आले. मात्र, उपचारापूर्वीच डॉक्टरांनी त्याला मृत घोषित केले.

या घटनेनंतर बारामती शहर पोलीस ठाण्यात झिरो क्रमांकाने गुन्हा दाखल करण्यात आला. त्यानंतर हा गुन्हा पाचगणी पोलीस ठाण्याकडे वर्ग करण्यात आला. या प्रकरणी सूर्यकांत चंद्रकांत गोळे (रा. भोसे, ता. महाबळेश्वर), अविनाश सतीश भोसले (रा. बावधन, ता. वाई), राहुल जनार्दन राजपुरे (रा. कणूर, ता. वाई) आणि अमोल गंगादेव वाडकर (रा. चिखली, ता. वाई) यांच्याविरोधात खुनाचा गुन्हा दाखल करण्यात आला
या घटनेमुळे भिगवण परिसरात हळहळ व्यक्त होत असून, संशयाच्या आधारावर झालेल्या या अमानुष मारहाणीबाबत संतापाची लाट उसळली आहे. पोलीस या प्रकरणाचा अधिक तपास करत आहेत.

आधुनिक केसरी न्यूज 

 बालाजी वैजळे 

नांदेड : नांदेड, हिंगोली, परभणी जिल्ह्यात भुकंपाचे चार सौम्य धक्के मध्यरात्री जाणवले असून कोणतीही जिवित हानी झाली नसल्याची माहिती जिल्हा प्रशासनाच्या वतीने देण्यात आली आहे. भुकंपाचे केंद्र बिंदू हिंगोली जिल्ह्यातील शिरली या गावात असून  रिस्टर सकेलर त्यांची तीव्रता ४.६, ३.९, ३.६ इतकी आहे. दरम्यान दिवसभरात आणखी धक्के जाणवार असल्याचे जिल्हा प्रशासनाने कळविले आहे. 

मराठवाड्यातील हिंगोली, नांदेड, परभणी जिल्ह्यामधून 9 जुलै 2026 रोजी मध्यरात्री 1 वाजून 37 मी., 2 वाजून 15 मिनिटांनी व 2 वाजून 17 मिनिटांनी भूकंपाचे सौम्य धक्के जाणवले असल्याची माहिती जिल्हा आपत्कालीन कार्यकेंद्रास प्राप्त झाली आहे. 
अधिकृतरित्या दिलेल्या वृत्तानुसार या भूकंपची तीव्रता रिष्टर स्केल वर अनुक्रमे 4.6, 3.6 व 3.9 अशी नोंदविण्यात आलेली आहे.
भूकंपाचा केंद्रबिंदू हिंगोली जिल्ह्यातील वसमत तालुक्यातील शिरली या गावात असून या धक्क्यामुळे कुठलीही जीवित व वित्त हानी झाली नसल्याची प्राथमिक माहिती जिल्हा आपत्कालीन कार्यकेंद्रास प्राप्त झाली आहे. 

सदर भूकंपाचे धक्के हे मध्यरात्री जाणवले आहेत. धक्के बसले तेंव्हा बरेच लोक झोपेत होते. एकापाठोपाठ एक असे दोन धक्के जाणवले असल्यामुळे सकाळपर्यंत अजून धक्के बसण्याची शक्यता नाकारता येत नाही. तसेच भूकंपाची पूर्वकल्पना देणे शक्य नसल्यामुळे नागरिकांनी घाबरून न जाता सतर्क रहावे. भूकंपाचे धक्के जाणवताच घराबाहेर पडून मोकळ्या जागेत जमावे. असे आवाहन जिल्हाधिकारी राहुल कर्डिले यांनी केले आहे.
नांदेड, परभणी, हिंगोली जिल्ह्यात पहिला धक्का पहाटे १ वाजून ३७ मिनिटांनी सिर्ली-पांग्रा शिंदे गाव परिसरात जाणवला असून ४.६ रिश्टर स्केल त्यांची तीव्रता आहे. त्यांची खोली जमिनीखाली १० किलोमीटर इतकी होती. या धक्क्यामुळे नागरिक घाबरून घराबाहेर आले. दुसरा धक्का पहाटे २ वाजून १५ मिनिटांनी जाणवला काकडधाबा गावाच्या परिसरात ३.६ रिश्टर स्केल तीव्रतेचा दुसरा धक्का बसला. या धक्क्याची खोली देखील जमिनीखाली १० किमी होती. तिसरा धक्का पहाटे २ वाजून १७ मिनिटांनी जाणवला. दुसऱ्या धक्क्यानंतर अवघ्या दोनच मिनिटांत पुन्हा काकडधाबा परिसरात ३.९ रिश्टर स्केल तीव्रतेचा तिसरा धक्का नोंदवला गेला.
चौथा धक्का पहाटे ३ वाजून २३ मिनिटांला जाणवला.

सव्वातीनच्या सुमारास काकडधाबा गावातच ४.१ रिश्टर स्केल तीव्रतेचा चौथा धक्का बसला. हिंगोली जिल्ह्यातील औंढा नागनाथ, कळमनुरी आणि वसमत या तालुक्यांमध्ये गेल्या सहा वर्षांपासून सातत्याने भूगर्भातून गूढ आवाज येणे आणि सौम्य धक्के बसण्याचे सत्र सुरू आहे. आतापर्यंत या भागात ३७ पेक्षा जास्त वेळा अशा सौम्य धक्क्यांची नोंद झाली आहे. मात्र आज मध्यरात्री लागोपाठ आलेल्या चार धक्क्यांमुळे परिसरात चिंतेचे वातावरण आहे. नागरिकांनी घाबरून न जाता सतर्क राहावे, असे आवाहन प्रशासनाकडून करण्यात येत आहे.

नांदेड, परभणी, हिंगोली जिल्ह्यांत बुधवारी मध्यरात्रीनंतर अवघ्या दोन तासांच्या कालावधीत एकापाठोपाठ एक असे भूकंपाचे चार सौम्य धक्के बसले. भूगर्भातील या अचानक झालेल्या हालचालींमुळे नागरिकांमध्ये भीतीचे वातावरण पसरले आहे. मध्यरात्री ज्या नागरीकांना भुकंपाचे धक्के असल्याची जाणीव झाली. त्या अनेक नागरीकांनी घरातून मोकळ्या मैदानात धाव घेतली आहे. नांदेड शहर व ग्रामीण भागातील नागरीकांनी एकमेकांना मोबाइलवरुन भुकंपाची माहिती देऊन झोपेतून जागे केले आहे. या भुकंपाची अधिक माहिती एम जी एम विज्ञान केंद्रा'चे संचालक श्रीनिवास औंधकर यांनी दिली असून भूकंपाचे धक्के असल्याची अधिकृत माहिती दिली आहे.

आधुनिक केसरी न्यूज 

भोकर : शहरातील हनूमाननगर परिसरात लगत नगरपरिषदेचा कचरा डेपो (डम्पिंग ग्राउंड) आहे. मंगळवारी ता. (आठ) पहाटेच्या सुमारास सफाई कामगार कचरा टाकण्यासाठी गेले असता बिबट्या दिसुन आल्याने  घाबरगुंडी उडाली. वनविभागाला माहिती  मिळताच तात्काळ घटनास्थळी धाव घेऊन पाहणी केली . नागरीकानी सावधगिरी बाळगावी असे आवाहन करण्यात आले आहे.

तालुक्यात मागील अनेक वर्षांपासून रेणापूर,रिठ्ठा,मोघाळी,सिताखांडी भागात बिबट्याचा वावर आहे. सावजाच्या शोधात आलेल्या बिबट्यानी अनेकदा जनावराव हल्ला केल्याच्या घटणा घडल्या आहेत. शहरातील हनुमान नगर परिसरात  नगर परिषदेचा कचरा डेपो (डपींग ग्राउंड) असून  मंगळवारी  रात्री आठ वाजताच्या दरम्यान नियमित प्रमाणे सफाई कामगार कचरा टाकण्यासाठी गेले असता तीथेच बिबट्या दिसुन आला.वन्यप्राण्याला पाहून कामगारांची घाबरगुंडी उडाली. परिसरातील नागरिकांना  माहिती मिळताच घटनास्थळी  नगरसेवक यज्ञेश देशपांडे, सिताराम मेटकर यांनी सुतळी बाम उडवून त्यास पळवून लावले. वनविभागाचे कर्मचारी एस.टि घोरबांड,ए.पी.मुंडकर,एस.आर.वट्टमवार,एच.बी.धूळगूंडे,एस.डी.भोंगे यांनी  भेट देऊन पाहणी केली.वस्तीलगत बिबट्या आल्याने नागरीकात भितीचे वातावरण निर्माण झाले आहे.

कामगारानी घेतला फोटो

बिबट्या दिसतात  अंगावर शहारे उमटले आणि आपल्यावर हल्ला करील काय अशी मनात भीती निर्माण झाली असली तरी घाबरलेल्या अवस्थेत सफाई कामगार साईप्रसाद  चंद्रभान यांनी आपल्या मोबाईल कॅमे-यात बिबट्याचा फोटो  टिपला.
अन्नाच्या शोधात बिबट्या

तालुक्यात बिबट्या सह अन्य वन्यप्राण्याचा नेहमी वावर असतो.सध्या पावसामुळे जंगलात शिकार शोधणं कठीण झाल्याने  कच-याच्या ढिगा-यात मृत झालेल्या कोंबड्या,वराह,श्वान यासह  घाणकचरा असल्याने भुक भागवण्यासाठी अन्नाच्या शोधात बिबट्या आला असावा असा अंदाज वनविभागाने व्यक्त केला आहे.

पिंजरा बसविण्याची मागणी 

शहरातील हनूमाननगर परिसरात बिबट्या आढळून आल्याने नागरिकात भिंतीचे वातावरण निर्माण झाले आहे.वनविभागानी कचरा डेपो जवळ पिंजरा बसवावा अशी मागणी केली आहे.
तालुक्यात सूधाप्रकल्पा लगत रेणापूर परिसरात बिबट्या असून तो तीथे आला असावा.आमचे कर्मचारी घटनास्थळी भेट देऊन ठशाची पाहणी केली पण पाऊस झाल्याने ठसे आढळून आले नाहीत. नागरीकांनी सावधगिरी बाळगली पून्हा दिसल्यावर त्वरित आमच्याशी संपर्क करावा.पिंजरा बसविण्याची मागणी केली असून त्याबाबत वरिष्ठांशी चर्चा करून निर्णय घेतला जाईल.
( अंगद खटाणे:वनपरिक्षेत्र अधिकारी, भोकर)

आधुनिक केसरी न्यूज 

सांगली : शहरातील १४ वर्षीय वेदांत मारुती बंडगर खूनप्रकरणातील संशयित असलेल्या 'एन. जी. ग्रुप' या संघटित गुन्हेगारी टोळीविरुद्ध महाराष्ट्र संघटित गुन्हेगारी नियंत्रण अधिनियम (मोक्का) अंतर्गत कडक कारवाई करण्यात आली आहे. कोल्हापूर परिक्षेत्राचे विशेष पोलीस महानिरीक्षक रंजन कुमार शर्मा यांनी या प्रस्तावास मंजुरी दिली असून, टोळीप्रमुख निलेश गडदे याच्यासह एका विधीसंघर्षग्रस्त बालकासह एकूण नऊ संशयितांवर मोक्काची कारवाई करण्यात आली आहे. 

निलेश विठोबा गडदे (टोळीप्रमुख, रा. कुपवाड), किरण शंकर लोखंडे, विशाल बिरुदेव चौगुले, सागर ऊर्फ नानासो माणिक चौगुले, अतुल दादासो वायदंडे, संदेश ऊर्फ सँडी रामचंद्र घागरे, एक विधीसंघर्षग्रस्त बालक, मलिक सलीम शेख व कुख्यात गुंड महमंद जमाल नदाफ अशी मोक्का कायद्यांतर्गत कारवाई झालेल्यांची नावे आहेत. या टोळीविरुद्ध खून, खुनाचा प्रयत्न, अपहरण, खंडणी, विनयभंग, बेकायदेशीर अंमली पदार्थांची लागवड, घातक शस्त्रे बाळगणे अशा गंभीर स्वरूपाचे गुन्हे दाखल आहेत. सांगली, मिरज, कुपवाड, जत, मिरज ग्रामीण, कवठेमहांकाळ या पोलीस ठाण्यांच्या हद्दींसह कर्नाटकातील बेळगाव जिल्ह्यातील कागवाड आणि बागलकोट जिल्ह्यातील बनहट्टी परिसरातही या टोळीचे जाळे पसरले असल्याचे तपासात समोर आले आहे.

टोळीची वाढती गुन्हेगारी आणि दहशत लक्षात घेऊन मोक्का लागू करण्यासाठी सहाय्यक संचालक सरकारी अभियोक्ता श्रीमती ज्योती डाके यांचा कायदेशीर अभिप्राय घेण्यात आला. त्यानंतर एलसीबीचे पोलीस निरीक्षक संजीव झाडे यांनी प्रस्ताव पोलीस अधीक्षक तुषार दोशी यांच्याकडे सादर केला. पोलीस अधीक्षकांनी प्रस्तावाची छाननी करून अंतिम मंजुरीसाठी तो विशेष पोलीस महानिरीक्षक रंजन कुमार शर्मा यांच्याकडे पाठविला. शर्मा यांनी प्रस्तावास मंजुरी दिल्यानंतर आरोपींवर मोक्का अंतर्गत कारवाई करण्यात आली. या गुन्ह्याचा पुढील तपास शहर विभागाचे उपविभागीय पोलीस अधिकारी संदीप भागवत यांच्याकडे सोपविण्यात आला आहे.

चौकट : 

उजव्या डोळ्यात गोळी झाडून वेदांतचा खून

संजयनगर पोलीस ठाण्याच्या हद्दीत घडलेल्या वेदांत बंडगर खूनप्रकरणाचा तपास स्थानिक गुन्हे अन्वेषण शाखेचे (एलसीबी) पोलीस निरीक्षक संजीव झाडे करत होते. १४ वर्षीय वेदांतचा उजव्या डोळ्यात गोळी झाडून निर्दयीपणे खून करण्यात आला होता. पोलिस तपासादरम्यान निलेश विठोबा गडदे (रा. वाघमोडे नगर, कुपवाड) याने आपल्या साथीदारांसह 'एन. जी. ग्रुप' नावाची संघटित गुन्हेगारी टोळी स्थापन करून आर्थिक फायद्यासाठी आणि दहशत निर्माण करण्याच्या उद्देशाने विविध गंभीर गुन्हे केल्याचे निष्पन्न झाले आहे. वेदांतच्या खुनानंतर सांगलीतील राजकारण तापले होते. पालकमंत्री चंद्रकांतदादा पाटील यांनी संशयितांना मोक्का अंतर्गत कारवाई करू अशी ग्वाही दिली होती.

आधुनिक केसरी न्यूज 

लोहा : शहरातील शिक्षक कॉलनी परिसरात पत्नीवर कथितरित्या गावठी कट्ट्यातून गोळीबार करून तिचा खून करण्याचा प्रयत्न केल्याची धक्कादायक घटना घडली आहे. या प्रकरणी पतीविरुद्ध भारतीय न्याय संहिता (बीएनएस) आणि शस्त्र अधिनियमातील गंभीर कलमांखाली गुन्हा दाखल करण्यात आला असून, कथित गावठी कट्टा आरोपीकडे आला कुठून? याचा शोध पोलिसांनी सुरू केला आहे.

फिर्यादी अर्चना विशाल जाधव (वय १९, रा. शिक्षक कॉलनी, लोहा) यांनी दिलेल्या तक्रारीनुसार, ६ जुलै २०२६ रोजी रात्री १०.३० ते ११.०० वाजण्याच्या सुमारास आरोपी विशाल सुरेश जाधव (वय २२) याने चारित्र्यावर संशय घेत वाद घालत तिला थापडा, लाथा व बुक्क्यांनी मारहाण केली. त्यानंतर त्याच्याकडील कथित गावठी कट्ट्यातून तिच्यावर गोळीबार करून जीवे मारण्याचा प्रयत्न केल्याचा आरोप तक्रारीत करण्यात आला आहे. तक्रारीनुसार, आरोपीने फिर्यादीच्या वडिलांना दूरध्वनी करून, 'तुझ्या पोरीला गोळी घातली, आता तुझ्याकडे येतो,' अशी धमकीही दिल्याचा आरोप आहे. फिर्यादीच्या वैद्यकीय तपासणी (एमएलसी) अहवाल व जबाबाच्या आधारे लोहा पोलीस ठाण्यात गुन्हा दाखल करण्यात आला.

चारित्र्याच्या संशयावरून घटना घडल्याचा आरोप

प्राथमिक माहितीनुसार आरोपी विशाल जाधव हा मूळ गांधीनगर येथील रहिवासी असून लोह्यातील एका मद्यविक्री दुकानात माल पुरवठ्याचे काम करतो. त्याच्याविरुद्ध यापूर्वी चोरीसंदर्भातील काही गुन्हे नोंद असल्याची प्राथमिक माहिती असून त्याची अधिकृत पडताळणी सुरू आहे. या प्रकरणातील सर्वात महत्वाचा मुद्दा म्हणजे आरोपीकडे कथित गावठी कट्टा आला कुठून ? तो कोणी पुरविला ? त्यामागे आणखी कोणाचे जाळे आहे का? याचा तपास पोलिसांकडून केला जात आहे. घटनास्थळावरील फॉरेन्सिक पुरावे, न्यायवैद्यकीय अहवाल आणि शस्त्राच्या तपासणीनंतर पुढील कारवाईची दिशा स्पष्ट होणार आहे. या प्रकरणाचा तपास पोलीस निरीक्षक चंद्रकांत जाधव यांच्या मार्गदर्शनाखाली सहायक पोलीस निरीक्षक नुरशाहद पठाण करीत आहेत. तपासातून समोर येणाऱ्या पुराव्यांनुसार पुढील कारवाई करण्यात येईल, असे पोलिसांनी सांगितले.

आधुनिक केसरी न्यूज 

तुळजापूर  : महाराष्ट्राची कुलस्वामिनी, अखंड राज्याचे आराध्य दैवत आणि साडेतीन शक्तिपीठांपैकी प्रमुख पूर्णपीठ असलेल्या श्री तुळजाभवानी मातेच्या दरबारात भक्तांच्या अलोट भक्तीचा आणि दातृत्वाचा एक अनुपम सोहळा नुकताच पार पडला. लातूर जिल्ह्यातील औसा तालुक्यातील एकंबी येथील अत्यंत निष्ठावान आणि दानशूर भक्त यशवंत प्रल्हाद सावंत यांनी आपल्या सहकुटुंबासह आईसाहेबांचे दर्शन घेऊन, त्यांच्या चरणी 'एक तोळा वजनाचा सोन्याचा हार' अत्यंत भक्तिभावाने अर्पण केला आहे.

मंगळवार, दिनांक ७ जुलै रोजीच्या शांत आणि पवित्र सायंकाळी, साधारणतः रात्री नऊ वाजेच्या सुमारास सावंत कुटुंबीयांनी हे मौल्यवान सुवर्ण अलंकार मातेच्या चरणी अर्पण केले. यावेळी मुख्य गाभाऱ्यात पवित्र मंत्रोच्चारात आणि धार्मिक वातावरणात हा अर्पणविधी संपन्न झाला. भक्ताने अर्पण केलेला हा सुंदर सुवर्ण हार पाहताक्षणीच मनाला भावणारा आहे, ज्यामध्ये लहान गोलाकार पदकांची मालिका गुंफलेली आहे. 

सदर धार्मिक विधी आणि दर्शनाचे पौरोहित्य मंदिराचे सन्माननीय पुजारी नागेश अजित क्षीरसागर यांनी अत्यंत शास्त्रोक्त पद्धतीने पार पाडले. त्यांच्या मार्गदर्शनाखाली सावंत कुटुंबीयांना श्री तुळजाभवानी मातेचे मनोहारी दर्शन लाभले. यानंतर, पुजारी नागेश क्षीरसागर यांच्या हस्ते यशवंत सावंत आणि त्यांच्या समवेत आलेल्या समस्त कुटुंबीयांचा श्री तुळजाभवानी मातेची अत्यंत सन्माननीय प्रतिमा (फ्रेम) देऊन सत्कार करण्यात आला.

महाराष्ट्राच्या या कुलस्वामिनीवर सर्वच स्तरातील भक्तांची अढळ श्रद्धा आहे. आपल्या मनोकामना पूर्ण झाल्यावर किंवा केवळ निस्सीम भक्तीपोटी अनेक भक्त मातेला सुवर्ण, चांदी व अन्य मौल्यवान वस्तू अर्पण करत असतात. औसा तालुक्यातील एकंबी येथील सावंत कुटुंबीयांनी दाखविलेल्या या दानशूरपणाचे आणि त्यांच्या उत्कट भक्तीचे तुळजापूर नगरीत आणि राजकीय, सामाजिक वर्तुळात सर्वत्र कौतुक होत आहे. त्यांच्या या कृतीने भक्तीचा एक आदर्श इतरांसमोर ठेवला आहे.

आधुनिक केसरी न्यूज 

देगलूर माणिक सुर्यवंशी

नांदेड : जिल्ह्यातील अवैध धंद्यांविरुद्ध पोलीस प्रशासनाने मोठी मोहीम उघडली आहे. याच मोहिमेचा भाग म्हणून देगलूर पोलीस ठाण्याच्या पथकाने एका अवैध रेती वाहतूक करणाऱ्या हायवा टिप्परवर धडक कारवाई केली असून, एकूण २० लाख ४९ हजार रुपयांचा मुद्येमाल जप्त केला आहे.

गुप्त माहितीच्या आधारे रचला सापळा ६ जुलै २०२६ रोजी देगलूर पोलिसांना एका गुप्त माहितीदाराकडून अवैध रेती वाहतुकीबाबत खात्रीशीर माहिती मिळाली होती. या माहितीच्या आधारे पोलिसांनी देगलूर शहराजवळील खानापूर फाटा परिसरात तात्काळ सापळा रचला. संशयास्पद वाटणारा एक लाल रंगाचा हायवा टिप्पर (क्रमांक: TS-36-T-3865) या परिसरात आला असता पोलिसांनी तो अडवला.
२० लाख ४९ हजारांचा मुद्देमाल जप्त
पोलिसांनी वाहनाची बारकाईने तपासणी केली असता, त्यात कोणतीही वैध पावती किंवा परवाना नसताना अवैध रित्या लाल रेतीची वाहतूक केली जात असल्याचे उघड झाले. या कारवाईत पोलिसांनी खालील मुद्येमाल जप्त केला:
 ७ ब्रास लाल रेती(अंदाजे किंमत: ₹४९,०००/-)
 हायवा टिप्पर (अंदाजे किंमत: ₹२०,००,०००/-)
 एकूण जप्त मुद्देमाल: ₹२०,४९,०००/- (वीस लाख एकोणपन्नास हजार रुपये).

चालकावर गुन्हा दाखल 
याप्रकरणी पोलिसांनी हायवा चालक दीपक हणमंत लोणे (वय ४४ वर्षे, रा. मडगी, ता. देगलूर, जि. नांदेड) याला ताब्यात घेतले आहे. त्याच्याविरुद्ध देगलूर पोलीस ठाण्यात गु.र.नं. ३२६/२०२६ नुसार भारतीय न्याय संहिता कलम ३०३(२) तसेच महाराष्ट्र जमीन महसूल अधिनियम, १९६६ चे कलम ४८(७) व ४८(८) अन्वये गुन्हा नोंदवण्यात आला आहे. या प्रकरणाचा पुढील तपास देगलूर पोलीस करत आहेत. या अधिकाऱ्यांच्या मार्गदर्शनाखाली झाली कारवाई ही यशस्वी कारवाई नांदेडचे मा. पोलीस अधीक्षक डॉ. नीलाभ रोहन उपविभागीय पोलीस अधिकारी किरण पोपळघट यांच्या मार्गदर्शनाखाली पोलीस निरीक्षक सूर्यमोहन बोलमवाड, पोलीस उपनिरीक्षक हणमंत शिंदे आणि पोलीस अंमलदार बळीराम धुळे यांच्या पथकाने पार पाडली. नांदेड पोलिसांचे आवाहन जिल्ह्यातील जनतेला आवाहन करण्यात येते की, कुठेही अवैध गौण खनिज वाहतूक, साठवणूक किंवा बेकायदेशीर उत्खनन होत असल्याचे आढळल्यास तात्काळ जवळच्या पोलीस ठाण्याशी किंवा पोलीस नियंत्रण कक्षाशी संपर्क साधावा. अशा अवैध कृत्यांमध्ये सामील असलेल्यांवर कठोर कायदेशीर कारवाई केली जाईल, असा इशारा पोलीस प्रशासनाने दिला आहे.
>

आधुनिक केसरी न्यूज 

  माणिक सुर्यवंशी

देगलूर : खानापूरहून देगलूरकडे येणाऱ्या दुचाकीचा नियंत्रण सुटून लेंडी नदीच्या पुलावरील संरक्षण कठड्याला भीषण धडक बसली. या अपघातात एक २२ वर्षीय युवक जागीच ठार झाला असून, त्याचा १८ वर्षीय मित्र गंभीर जखमी झाला आहे. हा अपघात सोमवार, ६ जुलै रोजी पहाटेच्या सुमारास बागवान टाकळी जवळील लेंडी नदीच्या पुलावर घडला. अपघाताची सविस्तर माहिती

पोलिस सूत्रांनी दिलेल्या माहितीनुसार, देगलूर तालुक्यातील तडखेल येथील रहिवासी **अमोल बाबुराव चरकुलवार (वय २२)आणि मुखेड तालुक्यातील मोटरगा येथील रहिवासी ओम भरत आईलवाड (वय १८)** हे दोघे सोमवार दि. ६ जुलै रोजी पहाटेच्या सुमारास खानापूरहून देगलूरकडे दुचाकीने (क्र. MH 26 C S 9195) येत होते.

बागवान टाकळी जवळील लेंडी नदीच्या पुलावरून जात असताना, चालकाचा दुचाकीवरील ताबा सुटला आणि दुचाकी पुलाच्या सिमेंटच्या संरक्षण कठड्याला अत्यंत वेगाने धडकली. ही धडक इतकी भीषण होती की, अमोल चरकुलवार याचा गंभीर दुखापत झाल्याने **जागीच मृत्यू** झाला. तर, त्याचा साथीदार ओम आईलवाड याच्या डाव्या पायाचे हाड फॅक्चर होऊन तो गंभीर जखमी झाला. पोलिसांची तात्काळ धाव आणि मदतकार्य
अपघाताची माहिती मिळताच रात्रीच्या गस्तीवर असलेले देगलूर पोलिस ठाण्याचे पोलिस उपनिरीक्षक हनुमंत शिंदे, पोलिस उपनिरीक्षक महाजन म्हैसनवाड, जमादार बळीराम घुले आणि विशाल आटकुरे यांनी तात्काळ घटनास्थळी धाव घेतली. पोलिसांनी जखमी ओमला तात्काळ उपचारासाठी रुग्णालयात हलवले.

पुढील उपचारासाठी नांदेडला रवाना:
> जखमी ओमची प्रकृती चिंताजनक असल्याने प्राथमिक उपचारानंतर त्याला पुढील उपचारासाठी नांदेड येथील रुग्णालयात हलवण्यात आले आहे. दरम्यान, मृत अमोल चरकुलवार याचे शवविच्छेदन (Post-Mortem) देगलूर येथील उपजिल्हा ग्रामीण रुग्णालयात करण्यात आले असून, त्यानंतर मृतदेह नातेवाईकांच्या स्वाधीन करण्यात आला. या घटनेमुळे तडखेल गावात शोककळा पसरली आहे.

 पुढील कायदेशीर कारवाई
घटनास्थळाचा पंचनामा बीट जमादार ज्ञानोबा केंद्रे यांनी केला आहे. वृत्त लिहेपर्यंत याप्रकरणी देगलूर पोलिस ठाण्यात गुन्हा दाखल झाला नव्हता. अपघातात जखमी झालेल्या ओमचा जबाब नोंदवल्यानंतर पुढील कायदेशीर कारवाई करण्यात येईल, अशी माहिती पोलिसांनी दिली आहे.

आधुनिक केसरी न्यूज 

छत्रपती संभाजीनगर : सर्व वारकरी, भाविक व नागरिकांना नम्र आवाहन करण्यात येते की, इंद्रायणी नदीला मोठ्या प्रमाणात पूर आला असून आळंदी शहरात प्रवेश करणारे नदीवरील चारही पूल पाण्याखाली गेले आहेत. त्यामुळे सध्या आळंदी शहरात येणे सुरक्षित नाही.

ज्या वारकरी व भाविकांनी आळंदीच्या दिशेने प्रवास सुरू केला आहे, त्यांनी ज्या ठिकाणी आहात त्या ठिकाणीच सुरक्षित थांबावे व आळंदीमध्ये येण्याचा प्रयत्न करू नये. कृपया प्रशासन, पोलीस यंत्रणा व आपत्ती व्यवस्थापन विभागाच्या सूचनांचे काटेकोरपणे पालन करावे. अफवांवर विश्वास ठेवू नये तसेच नदीपात्र, घाट परिसर व बंद करण्यात आलेल्या पुलांकडे जाणे टाळावे.आपल्या सुरक्षिततेसाठी प्रशासन आवश्यक ती सर्व उपाययोजना करत आहे. सर्वांनी संयम बाळगून प्रशासनाला सहकार्य करावे, ही नम्र विनंती.

आधुनिक केसरी न्यूज 

नांदेड : भारतीय हवामान विभागाने नांदेड जिल्ह्यासह मराठवाड्यात पुढील काही दिवसांत मुसळधार ते अतिमुसळधार पावसाचा इशारा दिला आहे. या पार्श्वभूमीवर नागरिकांची सुरक्षा आणि संभाव्य पूरपरिस्थिती टाळण्यासाठी पालिका आयुक्त डॉ.महेशकुमार डोईफोडे यांनी नुकताच शहरातील विविध सखल, नदीकाठच्या आणि संवेदनशील भागांना प्रत्यक्ष भेटी देऊन पाहणी करून आपत्ती व्यवस्थापन सज्जतेचा सविस्तर आढावा घेतला.
मनपा आयुक्तांनी शहरातील पूरप्रवण क्षेत्र, मुख्य नाले आणि गोदावरी नदीकाठच्या सखल भागांची पाहणी केली. त्यात प्रामुख्याने उर्दू घरा नजिकचा नाला, असदवन ते लातूर फाटा नाला, रवि नगर ते कौठा पोलीस चौकी व शगून सिटी या भागांचा समावेश होता. यावेळी शगुन सिटी मधील नागरिकांसोबत पालिका आयुक्तांनी संवाद साधून त्यांच्या समस्या जाणून घेतल्या त्याचवेळी पालिका आयुक्तांनी नाल्यांची सफाई, पाणी वाहून जाण्याचे मार्ग आणि ज्या भागात पाणी साचण्याची शक्यता असते, अशा ठिकाणांना भेटी देऊन त्यांनी अधिकाऱ्यांना तात्काळ उपाययोजना करण्याचे निर्देश दिले. नाल्यांमध्ये कचरा अडकून पाणी तुंबू नये, यासाठी अतिरिक्त सफाई कर्मचारी आणि यंत्रसामग्री तैनात करण्याचे आदेश त्यांनी दिले. त्याचप्रमाणे आयुक्तांनी मनपाचा मुख्य आपत्ती व्यवस्थापन कक्ष तीन शिफ्टमध्ये २४ तास सुरू राहिल याची दक्षता घेण्यासह सर्व झोनल अधिकाऱ्यांनी व अभियंत्यांनी मुख्यालय न सोडण्याचे आदेश दिले आहेत. या पाहणी दौऱ्यावेळी मनपाचे अतिरिक्त आयुक्त गिरीश कदम, शहर अभियंता सुमंत पाटील, आपत्ती व्यवस्थापन अधिकारी डॉ. मिर्झा फरहतुल्ला बेग, कार्यकारी अभियंता दिलीप टाकळीकर, क्षेत्रिय अधिकारी रावण सोनसळे, कनिष्ठ अभियंता ठानेदार आदी उपस्थित होते.

आधुनिक केसरी न्यूज 

केदार शर्मा 

जालना : नांदेड समृद्धी महामार्गाच्या बांधकामादरम्यान अवैध मुरूम उत्खनन, तांत्रिक अनियमितता आणि शासनाच्या महसुलाच्या नुकसानीचे प्रकरण आता निर्णायक टप्प्यावर पोहोचले आहे. माजी मंत्री तथा परतूर विधानसभा मतदारसंघाचे आमदार बबनराव लोणीकर यांनी हा गंभीर मुद्दा महाराष्ट्र विधानसभेत उपस्थित करून महसूल मंत्री चंद्रशेखर बावनकुळे यांच्याकडे उच्चस्तरीय चौकशीची लेखी मागणी केल्यानंतर आता या प्रकरणाला नवे वळण मिळाले आहे. लघु पाटबंधारे विभागाच्या फिर्यादीवरून APCO Infratech Pvt. Ltd. या कंत्राटदार कंपनीविरुद्ध परतूर पोलीस ठाण्यात सार्वजनिक संपत्ती नुकसान प्रतिबंधक अधिनियमाच्या कलम ३ अंतर्गत गुन्हा दाखल करण्यात आला आहे.

लघु पाटबंधारे विभागाचे स्थापत्य अभियांत्रिकी सहाय्यक योगेश राजू वैद्य यांनी दिलेल्या फिर्यादीवरून FIR क्रमांक 0324/2026 नोंद करण्यात आला असून, पुढील तपास परतूर पोलिसांकडून सुरू आहे.

तलावाच्या भिंतीलगत १५ ते २० फूट खोल उत्खननाचा गंभीर आरोप

फिर्यादीनुसार, नागथास बृहत लघु पाटबंधारे प्रकल्प परिसरात मुरूम उत्खननासाठी परवानगी असताना रॉयल्टीचे प्रमाण संपल्यानंतरही तलावाच्या भिंतीलगत सुमारे १५ ते २० फूट खोल खड्डे खोदून मोठ्या प्रमाणात मुरूमाचे उत्खनन करण्यात आले. त्यामुळे तलावाच्या संरचनेला मोठे नुकसान झाल्याचा दावा करण्यात आला आहे.

तलावाची संरक्षणभिंत कमकुवत झाल्याने भविष्यात तलाव फुटण्याचा धोका निर्माण झाला असून, अशी घटना घडल्यास शेकडो हेक्टर शेती वाहून जाण्याबरोबरच मोठ्या प्रमाणात आर्थिक नुकसान व जीवितहानी होण्याची शक्यता असल्याचे फिर्यादीत नमूद करण्यात आले आहे.

कामाच्या गुणवत्तेवरही गंभीर प्रश्नचिन्ह

आमदार बबनराव लोणीकर यांनी महसूल मंत्री चंद्रशेखर बावनकुळे यांना दिलेल्या निवेदनात समृद्धी महामार्गाच्या कामात मंजूर भराव साहित्याऐवजी काळ्या मातीचा वापर करण्यात आल्याचा आरोप केला आहे. या मातीमध्ये दगड-गोटे मिसळून शेतातील बांधाप्रमाणे भराव टाकण्यात आल्याचे त्यांनी नमूद केले आहे.

नियमानुसार दोन ते तीन फुटांचे थर, प्रत्येक थरावर रोलरद्वारे दाबणी, घनता चाचणी आणि गुणवत्ता नियंत्रणाची प्रक्रिया आवश्यक असताना त्याचे पालन झाले नसल्याचा दावा करण्यात आला आहे. त्यामुळे भविष्यात रस्ता खचणे, भेगा पडणे आणि अपघात होण्याचा धोका निर्माण होऊ शकतो, असा इशारा त्यांनी दिला आहे.

एमएसआरडीसी अधिकाऱ्यांवर गंभीर आरोप

आमदार बबनराव लोणीकर यांनी एमएसआरडीसीचे अधीक्षक अभियंता, कार्यकारी अभियंता व उपअभियंता यांनी गुणवत्ता नियंत्रण, मुरूम उत्खनन, वाहनांची तपासणी, जीपीएस पडताळणी, प्रयोगशाळा चाचण्या आणि साइट निरीक्षण याकडे आवश्यक लक्ष दिले नसल्याचा आरोप केला आहे.

अधिकाऱ्यांनी वेळेवर कारवाई केली असती तर कथित अवैध उत्खनन रोखता आले असते. त्यामुळे संबंधित अधिकाऱ्यांवर फौजदारी गुन्हे दाखल करून त्यांना सेवेतून कायमस्वरूपी बडतर्फ करण्यात यावे तसेच शासनाच्या महसुलाचे नुकसान त्यांच्या मालमत्तेतून वसूल करण्यात यावे, अशी मागणी त्यांनी केली आहे.

मंठा व परतूर तालुक्यातील ETS मोजणीत अतिरिक्त उत्खननाचा दावा

उपलब्ध नोंदींनुसार मंठा तालुक्यातील १६ अल्पमुदत परवान्यांद्वारे ८१,८७५ ब्रास मुरूम उत्खननास परवानगी देण्यात आली होती. त्यापैकी नऊ प्रकरणांच्या ETS मोजणीत परवानगीपेक्षा अधिक उत्खनन झाल्याचा दावा करण्यात आला असून, दहिफळ भोंगाणे येथील नागथास प्रकल्पातून विनापरवाना उत्खनन झाल्याचाही आरोप आहे. या दोन्ही बाबी मिळून ८२,५८९.४७ ब्रास अतिरिक्त उत्खनन झाल्याचा दावा करण्यात आला आहे.

तर परतूर तालुक्यातील २५ अल्पमुदत परवान्यांद्वारे २,१७,४८० ब्रास मुरूम उत्खननास मंजुरी देण्यात आली होती. त्यापैकी २२ प्रकरणांच्या ETS मोजणीत परवानगीपेक्षा अधिक उत्खनन झाल्याचा दावा असून, हेलसवाडी येथील पाझर तलाव क्रमांक १ मधून परवाना आदेशाशिवाय उत्खनन झाल्याचाही आरोप करण्यात आला आहे. या दोन्ही बाबी मिळून २,०६,८३२ ब्रास अतिरिक्त उत्खनन झाल्याचा दावा करण्यात आला आहे.

विधानसभेत १० लाख ब्रास अवैध मुरूम उत्खननाचा मुद्दा केला आमदार लोणीकर यांनी उपस्थित

आमदार बबनराव लोणीकर यांनी विधानसभेत दावा केला की, सुमारे ७६ हजार ब्रास मुरूमाची रॉयल्टी भरल्यानंतरही सुमारे १० लाख ब्रास  अवैध मुरूम उत्खनन करण्यात आले. या प्रकारामुळे शासनाच्या महसुलाचे कोट्यवधी रुपयांचे नुकसान झाल्याचा आरोप करत त्यांनी संपूर्ण प्रकरणाची स्वतंत्र उच्चस्तरीय चौकशी करण्याची मागणी केली.

 परतुर पोलिसात गुन्हा दाखल; तपास सुरू

योगेश राजू वैद्य यांच्या फिर्यादीवरून APCO Infratech Pvt. Ltd. व संबंधित व्यक्तींविरुद्ध सार्वजनिक संपत्ती नुकसान प्रतिबंधक अधिनियमाच्या कलम ३ अंतर्गत गुन्हा दाखल करण्यात आला असून, पुढील तपास परतूर पोलीस करत आहेत.

*"दोषींवर कठोर कारवाई करा" – आमदार लोणीकर*

या संपूर्ण प्रकरणाची स्वतंत्र तांत्रिक, प्रशासकीय व आर्थिक चौकशी करून मंजूर परिमाणापेक्षा अधिक उत्खनन, शासनाच्या महसुलाची हानी, रॉयल्टीची चोरी किंवा संबंधित अधिकाऱ्यांची निष्काळजीपणा सिद्ध झाल्यास कंत्राटदार कंपनी व जबाबदार अधिकाऱ्यांवर कठोर प्रशासकीय, आर्थिक आणि फौजदारी कारवाई करण्यात यावी, अशी मागणी आमदार बबनराव लोणीकर यांनी केल्याने याबाबतीत महसूल मंत्री चंद्रशेखर बावनकुळे यांनी त्यांच्या दालनात या बैठकीचे आयोजन केले असून लवकरच ही बैठक संपन्न होणार आहे. या बैठकीस जालना जिल्हाधिकारी अप्पर जिल्हाधिकारी आणि विभागाचे मुख्य अभियंता व अधीक्षक अभियंता उपस्थित असणार आहेत. हजारो कोटी रुपयांच्या सार्वजनिक निधीतून उभारल्या जाणाऱ्या समृद्धी महामार्गाच्या गुणवत्तेशी आणि शासनाच्या महसुलाशी कोणतीही तडजोड होऊ नये. या प्रकरणाची निष्पक्ष चौकशी होऊन सत्य जनतेसमोर यावे आणि दोषींवर कायद्यानुसार कठोर कारवाई व्हावी, अशी अपेक्षा व्यक्त केली जात आहे.

आधुनिक केसरी न्यूज 

गडचिरोली : (गो. वि.) दिनांक 5जुलै 2026 गोंडवाना विद्यापीठाचे घटक महाविद्यालय मॉडेल कॉलेजमधील बी.बी.ए. (जंगले व्यवस्थापन )शाखेचा विद्यार्थी रोहीत राठोड याची इंग्लंड येथे होणाऱ्या काउंटी क्लब क्रिकेट स्पर्धेसाठी जाणाऱ्या भारतीय प्रतिनिधी संघात निवड झाली आहे. या निवडीमुळे महाविद्यालयासह गोंडवाना विद्यापीठाच्या   संपूर्ण परिसरात आनंदाचे वातावरण निर्माण झाले आहे.

रोहीत इंग्लंडमध्ये भारतीय संघाचे प्रतिनिधित्व करणार असून, त्याच्या या उल्लेखनीय यशाबद्दल महाविद्यालयाचे प्राचार्य  डॉ. विवेक जोशी यांच्या हस्ते त्याचा विशेष सत्कार करण्यात आला. यावेळी प्राचार्य, प्राध्यापक व विद्यार्थ्यांनी रोहितचे अभिनंदन करून त्याच्या आगामी स्पर्धेसाठी शुभेच्छा दिल्या आहेत . 
प्राचार्यांनी यावेळी रोहितच्या यशाचे कौतुक करत , रोहितने आपल्या मेहनती, जिद्द आणि क्रीडाप्रेमाच्या बळावर ही उल्लेखनीय कामगिरी साध्य केली असून, त्याचे यश इतर विद्यार्थ्यांसाठी प्रेरणादायी आहे अशा शब्दात त्याचे कौतुक केले .  आंतरराष्ट्रीय स्तरावर देशाचे प्रतिनिधित्व करण्याची संधी मिळणे ही अभिमानाची बाब असून, त्याने उत्कृष्ट कामगिरी करून महाविद्यालय व देशाचे नाव उज्ज्वल करावे, अशा शुभेच्छा गोंडवाना विद्यापीठाचे कुलगुरू डॉ. प्रशांत बोकारे , प्र- कुलगुरू डॉ. श्रीराम कावळे, कुलसचिव डॉ. अनिल हिरेखण   यांनीही त्याला शुभेच्छा दिल्या.

आधुनिक केसरी न्यूज

वरोडा : वडील हे प्रत्येकाच्या जीवनातील आधारस्तंभ असतात. ' एक पेड माँ के नाम ' या देशव्यापी वृक्षारोपण अभियानाला प्रतिसाद मिळत असतानाच, पितृस्मृती जपणारी ' एक पेड पिता के नाम ' ही अभिनव संकल्पना समाजात नवा आदर्श निर्माण करणारी आहे. हा उपक्रम केवळ पर्यावरण संवर्धनापुरता मर्यादित नसून सामाजिक बांधिलकी जपणारा आणि भावी पिढ्यांसाठी प्रेरणादायी ठरणारा आहे, असे प्रतिपादन वरोडा नगरपरिषदेच्या नगराध्यक्षा अर्चना ठाकरे यांनी केले.ओशनिक बहुउद्देशीय संस्था, आनंदवन मित्र मंडळ, आनंदम् मैत्रीसंघ,वरोडा-भद्रावती-चंद्रपूर रेल्वे प्रवासी संघ आणि जय हिंद सैनिक संस्था, स्मृती वृक्षारोपण आयोजन समिती यांच्या संयुक्त विद्यमाने दिवंगत पू. श्री. गुरुचरणजी अमरनाथजी मर्दाने यांच्या पावन स्मृतीप्रीत्यर्थ मालवीय वॉर्डातील आकाश नगर येथे 'पितृस्मृती वृक्षारोपण अभियान-२०२६' आयोजित करण्यात आले. 'एक वृक्ष, एक शाश्वत स्मृती, एक हरित भविष्य' या संकल्पनेवर आधारित कार्यक्रमात अध्यक्षीय मार्गदर्शन करताना त्या बोलत होत्या.

 यावेळी नगर परिषदेच्या उपाध्यक्षा तथा शिक्षण सभापती योगिता नेरकर, ख्यातनाम चित्रकार प्रल्हाद ठक आणि नगरसेवक तथा ओशनिक संस्थेचे उपाध्यक्ष बंडू देऊळकर हे प्रमुख पाहुणे म्हणून उपस्थित होते.अर्चना ठाकरे म्हणाल्या, की वडिलांच्या स्मृतीत लावलेले झाड जसजसे वाढेल, तसतसा त्याचा अभिमान प्रत्येक कुटुंबाला वाटेल. अशा उपक्रमांमधून पुढील पिढीही पर्यावरण संवर्धनाचा वारसा पुढे नेईल. वरोडा शहराला विविध क्षेत्रांत मानाचे स्थान मिळवून देणाऱ्या अनेक व्यक्तींचे कार्य आजही तळागाळातील समाजापर्यंत पोहोचलेले नाही. अशा व्यक्तिमत्त्वांचा शोध घेऊन त्यांचे योगदान समाजासमोर आणण्यासाठी स्वयंसेवी संस्थांनी पुढाकार घेण्याची गरज असल्याचे त्यांनी नमूद केले. शहराच्या सर्वांगीण विकासासाठी विधायक कार्यात नगर परिषद सर्वतोपरी सहकार्य करेल, अशी ग्वाहीही त्यांनी दिली.

  उपाध्यक्षा योगिता नेरकर म्हणाल्या, की झाडे ही निसर्गाची अमूल्य देणगी असून मानवाच्या अस्तित्वाचा आधार आहेत.' पितृस्मृती वृक्षारोपण ' ही अत्यंत स्तुत्य संकल्पना आहे. प्रत्येकाने किमान एक तरी वृक्ष लावून त्याचे संवर्धन करण्याची जबाबदारी स्वीकारली पाहिजे. वृक्षारोपण म्हणजे केवळ पर्यावरण संवर्धन नव्हे, तर भविष्यासाठी आशेचे बीज पेरणे होय.
     बंडू देऊळकर यांनी दिवंगत पू.गुरुचरणजी मर्दाने यांच्या कार्याचा गौरव करताना सांगितले, की ते अत्यंत अभ्यासू आणि विद्वान व्यक्तिमत्त्व होते. अमरावती येथे शिक्षण घेत असताना कविवर्य सुरेश भट हे त्यांचे रूममेट, तर माजी राज्यपाल रा. सू. गवई हे त्यांचे कनिष्ठ विद्यार्थी होते. प्रशासकीय सेवेत असताना त्यांनी चंद्रपूर, गडचिरोली आणि वर्धा जिल्ह्यांत उल्लेखनीय कार्य केले. त्यांच्या स्मृतीप्रीत्यर्थ अनेक वर्षांपासून वृक्षारोपणाची परंपरा सुरू असून संस्थेच्या विविध सामाजिक उपक्रमांचीही त्यांनी माहिती दिली.
      ख्यातनाम चित्रकार प्रल्हाद ठक यांनी 'स्मृती वृक्ष' अभियानाचे कौतुक करताना वाढते तापमान आणि घटणारी भूजल पातळी लक्षात घेता वृक्षसंवर्धनाची गरज अधोरेखित केली. गावातील ६ ते १४ वर्षे वयोगटातील विद्यार्थ्यांना सहभागी करून आतापर्यंत पाच हजारांहून अधिक वृक्षांची लागवड करून त्यांचे यशस्वी संवर्धन करण्यात आल्याची माहिती त्यांनी दिली. प्रास्ताविकात ओशनिक बहुउद्देशीय संस्थेचे अध्यक्ष तथा माजी नगरसेवक राजेंद्र मर्दाने यांनी उपक्रमामागील उद्देश, पर्यावरण संवर्धनाचे महत्त्व विशद करीत  दिवंगत पू. गुरुचरणजी मर्दाने यांच्या स्मृतींना अभिवादन केले. कार्यक्रमाच्या प्रारंभी दीप प्रज्वलन व पू.गुरुचरणजी मर्दाने यांच्या प्रतिमेचे पूजन करण्यात आले. विविध संस्थांच्या वतीने नगराध्यक्षा अर्चना ठाकरे यांचा सत्कार करण्यात आला. त्यानंतर त्यांच्या तसेच योगिता नेरकर, प्रल्हाद ठक आणि बंडू देऊळकर यांच्या हस्ते वृक्षारोपण करण्यात आले. कार्यक्रमाला उपस्थित मान्यवरांनी आपआपल्या वडिलांच्या स्मृतीप्रीत्यर्थ आंबा, मोह, अर्जुन, जांभूळ, आवळा, पिंपळ, बकुळ, पारिजात, चाफा,मधुमालती, बहावा आणि कडुनिंब यांसारख्या देशी वृक्षांची लागवड केली. कार्यक्रमाच्या शेवटी उपस्थितांनी पर्यावरण संवर्धनाची सामूहिक शपथ घेतली. कार्यक्रमाचे संचालन राजेंद्र मर्दाने यांनी तर आभार प्रदर्शन डॉ. प्रवीण मुधोळकर यांनी केले. याप्रसंगी माजी प्राचार्य बळवंतराव शेलवटकर, बीएसएनएल चंद्रपूरचे लेखा अधिकारी शरद नन्नावरे, सामाजिक कार्यकर्ते प्रशांत देशमुख, प्रकाश पोहाणे, भास्कर गोल्हर, दादाराव दडमल, शेख शफी, खेमचंद नेरकर, गजानन उमरे, अशोक बावणे तसेच सुमित्रा मर्दाने, पार्वती मर्दाने यांच्यासह विविध संस्थांचे पदाधिकारी, सदस्य आणि नागरिक मोठ्या संख्येने उपस्थित होते.
     कार्यक्रमाच्या यशस्वीतेसाठी न.प. चे वित्त व नियोजन सभापती राहुल देवडे, तुषार मर्दाने, आकाश पोहाणे, गोपाल पोंदे, अमोल देऊळकर, दिलीप पेंदोर, स्मृती वृक्षारोपण समितीचे पदाधिकारी, सदस्य आदींनी अथक परिश्रम घेतले.

आधुनिक केसरी न्यूज

​वरोडा :  विधानसभा मतदारसंघातील गरिबांतल्या गरीब माणसाला, शेतकरी आणि शेतमजुरांना न्याय मिळवून देण्यासाठी हे नूतन भाजप कार्यालय केवळ राजकीय केंद्र न राहता जनतेच्या सेवेचे पवित्र मंदिर ठरेल असा विश्वास राज्याचे आदिवासी विकास मंत्री व जिल्ह्याचे पालकमंत्री डॉ. उईके यांनी व्यक्त केला.
 वरोडा येथील सहकार महर्षी दादासाहेब देवतळे जिनिंग प्रेसिंग सोसायटी परिसरात आमदार करण संजय देवतळे यांच्या जनसंपर्क तथा भारतीय जनता पक्षाच्या नवीन कार्यालयाच्या लोकार्पण सोहळ्यात ते उदघाटक म्हणून बोलत होते.

याप्रसंगी मंचावर केंद्रीय माजी राज्यमंत्री हंसराज अहीर, आमदार करण देवतळे, जिल्हा भाजपा अध्यक्ष हरीश शर्मा, अशोक जीवतोडे, विजय देवतळे, आमदार महोदय यांच्या मातोश्री स्वेता देवतळे, भद्रावतीचे भाजपा नेते चंदू गुंडावार, जिल्हा युवा मोर्चाचे अध्यक्ष तनय देशकर,रघुवीर अहीर, बाबा भागडे, शहर भाजपा अध्यक्ष संतोष पवार, वंदना दाते, श्यामसुंदर उरकुडे, दयानंद जांभुळे,राजेंद्र सवई, डॉ. भगवान गायकवाड यांच्यासह पक्षाचे अनेक वरिष्ठ पदाधिकारी  उपस्थित होते. कार्यक्रमापूर्वी राज्याचे आदिवासी मंत्री व जिल्ह्याचे पालकमंत्री प्राध्यापक अशोक उईके यांच्या हस्ते भाजपचे भव्य कार्यालयाचे फीत कापून उद्घाटन झाले. याप्रसंगी राज्याचे माजी अर्थमंत्री सुधीरभाऊ मुनगंटीवार, माजी केंद्रीय गृहराज्यमंत्री हंसराज अहीर यांचेसह अनेक मान्यवर उपस्थित होते.
 पुढे बोलतांना डॉ. उईके यांनी कार्यकर्त्यांच्या भूमिकेवर विशेष भर दिला. ते म्हणाले, "पक्षाचा कार्यकर्ता हा आपला केंद्रबिंदू आहे. आज आपण जे काही आहोत, ते कार्यकर्त्यांच्या अहोरात्र कष्टांमुळेच आहोत. या कार्यालयात येणाऱ्या प्रत्येक कार्यकर्त्याचा आणि सर्वसामान्य नागरिकाचा योग्य सन्मान राखला गेला पाहिजे. एखाद्या वेळेस काम झाले नाही तरी चालेल, पण कोणाचाही अनादर होणार नाही याची काळजी नियोजनबद्ध रीतीने घेतली जावी. 

विकास निधी देणार वरोडा मतदारसंघाच्या विकासाचा उल्लेख करत पालकमंत्र्यांनी स्थानिक आमदार करण देवतळे यांच्या कार्यपद्धतीचे कौतुक केले. ते म्हणाले की, करण देवतळे हे अतिशय प्रामाणिकपणे आणि आक्रमकतेने जनतेचे प्रश्न विधानसभेत मांडत आहेत. तुमच्या परिवाराने या मतदारसंघासाठी मोठे योगदान दिले आहे. मी या जिल्ह्याचा पालकमंत्री म्हणून शब्द देतो की, वरोडा विधानसभा मतदारसंघाच्या सर्वपक्षीय आणि सर्वांगीण विकासासाठी निधी कधीही कमी पडू दिला जाणार नाही, अशी ग्वाही त्यांनी दिली.   तर पंतप्रधान नरेंद्र मोदी आणि महाराष्ट्राचे मुख्यमंत्री देवेंद्र फडणवीस यांच्या नेतृत्वाखाली संपूर्ण राज्यात विश्वासाचे वातावरण निर्माण झाले आहे, असे सांगत त्यांनी या कार्यालयाच्या माध्यमातून सेवा, संपर्क, समर्पण आणि संघटन या चार सूत्रांवर काम करण्याचे आवाहन केले.

आमदार देवतळे एक सुसंस्कृत व्यक्तिमत्व:अहीर

वरोडा भद्रावती विधानसभा क्षेत्रात देवतळे कुटुंबाबद्दल प्रेम असून त्यांचे निष्कलंक राजकारण ही त्यांची जमेची बाजू आहे. आमदार देवतळे एक सुसंस्कृत व्यक्तिमत्व असून चांगले संस्कार घेऊन ते जनसेवेसाठी सज्ज आहेत. या  जनसंपर्क कार्यालयाचा उपयोग जनसामान्यांचे प्रश्न सोडवण्यासाठी होईल. या कार्यालयातून सर्वांना सोबत घेऊन आपण अनुकरणीय काम कराल असा आशीर्वाद याप्रसंगी बोलताना माजी केंद्रीय राज्यमंत्री हंसराज अहिर यांनी यावेळी बोलताना आमदार करण देवतळे यांना दिला.
 त्यांनी पंतप्रधान नरेंद्र मोदी यांच्या बारा वर्षाच्या कार्यकालाचा आढावाही उपस्थितांसमोर मांडला आहे. याप्रसंगी भाजपाचे जिल्हाध्यक्ष हरीश शर्मा, भारतीय जनता युवा मोर्चाचे जिल्हाध्यक्ष तनय देशकर व ओबीसी महासंघाचे अशोक जीवतोडे यांनीही आपले विचार व्यक्त केले. कार्यक्रमाची सुरुवात दीप प्रज्वलन व भारत माता, स्वर्गीय दिनदयाल उपाध्याय व स्वर्गीय शामाप्रसाद मुखर्जी यांच्या प्रतिमेला पुष्पहार अर्पण करून झाली. या नेत्यदीपक सोहळ्याचे संचलन राजीव दोडके यांनी  तर गजानन राऊत यांनी उपस्थितांचे आभार मानले. या उदघाटन सोहळ्याला वरोरा भद्रावती तालुक्यातील नागरिक भाजप पदाधिकारी व कार्यकर्ते मोठ्या संख्येने उपस्थित होते.

आधुनिक केसरी न्यूज 

सागर झनके 

जळगाव जामोद : तालुक्यातील पिंपळगाव काळे येथील सरस्वती आश्रम शाळेतील इयत्ता पाचवीतील विद्यार्थी मोहित अनिल वाकुडकर (वय ११) रा. धानोरा महासिद्ध याचा शाळेशेजारी नदीत बुडून मृत्यू झाल्याची घटना शुक्रवारी (ता.३) सायंकाळी घडली. सदर विद्यार्थी हा सायंकाळी  शौचासाठी नदीकाठी गेला असता पाय घसरून  नदीपात्रात असलेल्या पाण्याच्या डबक्यामध्ये पडला.पाणी खोल असल्याने विद्यार्थ्यांला वाचविण्यासाठी शाळेतील शिक्षक व ग्रामस्थांनी तात्काळ घटनास्थळी धाव घेऊन विद्यार्थ्यांला वाचविण्याचा प्रयत्न केला‌.मुलाला पाण्यातून बाहेर काढून  पुढील उपचारासाठी नांदुरा येथील डॉ.बढे यांच्या दवाखान्यात नेले असता डॉक्टरांनी तपासून त्याला मृत असल्याचे घोषित केले.
 ‌

शाळेतील व्यवस्थापनाच्या बेजबाबदार पणामुळे मोहितला आपले प्राण गमवावे लागले.शाळेमध्ये विद्यार्थ्यांसाठी  सुख सुविधांची वानवा असल्याचे ग्रामस्थांनी सांगितले.शाळेचे शिक्षक मुख्यालयी राहत नाही.मुख्याध्यापक रेवस्कर सर हे सुद्धा मुख्यालयी राहत नाही.निवासी शाळेमध्ये शिक्षकांनी मुख्यालयी राहावे असे प्रशासनाचे आदेश असतानाही शाळेचे  शिक्षक मुख्यालयी राहत नाही.कदाचीत सरस्वती आश्रम शाळेतील शिक्षक मुख्यालयी राहत असते तर त्याचे शंभर टक्के लक्ष विद्यार्थ्यांवर राहिले असते.मोहितचा असा दुर्दैवी मृत्यू झाला नसता.शाळेतील व्यवस्थापनाच्या नाकर्तेपणामुळेच मोहितला आपला जीव गमवावा लागला. घटणेच्या दुसऱ्या दिवशी ४जुलै रोजी दुपारी धानोरा महासिद्ध येथे मुळ गावी शोकाकुल वातावरणात मोहितवर अंत्यसंस्कार करण्यात आले. यावेळी जळगाव जामोदचे पी.एस.आय.खाडे ,बिट जमदार आणि नांदुरा पोलिस स्टेशनचे पोलीस ठाणेदार सातव, ट्राफिक पोलीस वाघमारे व त्यांचे सहकारी हजर होते. "मोहित च्या मृत्यूस कारणीभूत असलेल्या  शाळेतील शिक्षकांना कायमस्वरूपी निलंबित करून त्यांच्यावर गुन्हे दाखल करण्यात यावे. शाळेचा परवाना रद्द करण्यात यावा. ज्या ठिकाणी अशा आदिवासी आश्रम शाळा आहेत त्यावर वरिष्ठ अधिकाऱ्यांनी  लक्ष द्यावे जेणेकरून अशा प्रकारचे दुर्दैवी घटना परत घडणार नाही. अशी मागणी ग्रामस्थ व नातेवाईंकडून केला जात आहे"

आधुनिक केसरी न्यूज   

त्रिसिंग जायभाये 

जालना : बीड महामार्गावरील अंबडजवळील शहापूर येथील गलाट नदीच्या पुलावर शनिवारी (दि. ४) सकाळी सुमारे १० वाजण्याच्या सुमारास दोन एसटी बसची समोरासमोर जोरदार धडक होऊन भीषण अपघात झाला. या अपघातात सुदैवाने कोणतीही जीवितहानी झाली नसली, तरी दोन्ही बसमधील अनेक विद्यार्थी व प्रवासी जखमी झाले आहेत.

मिळालेल्या माहितीनुसार, अंबड आगाराची प्रवासी बस भांबेरे येथून विद्यार्थ्यांसह अंबडकडे येत होती. त्याचवेळी अंबडहून बीडकडे जाणारी दुसरी एसटी बस गलाट नदीच्या पुलावर समोरून आली. पुलावरच दोन्ही बसची समोरासमोर जोरदार धडक झाली. धडकेचा आवाज परिसरात घुमताच जवळील शेतात काम करणाऱ्या शेतकऱ्यांनी आणि नागरिकांनी तात्काळ घटनास्थळी धाव घेतली. स्थानिकांनी तत्परता दाखवत जखमी प्रवासी व विद्यार्थ्यांना बसमधून बाहेर काढून रुग्णवाहिका आणि अन्य वाहनांच्या मदतीने अंबड येथील उपजिल्हा रुग्णालयात दाखल केले. काही गंभीर जखमींना पुढील उपचारासाठी जालना येथील शासकीय रुग्णालयात हलविण्यात आले.

जालना येथे उपचारासाठी दाखल करण्यात आलेल्या जखमींमध्ये बस चालक सारंगकर, काकासाहेब ठोके, शिवकन्या चंद्रकांत गाडगे (रा. धाकलगाव), निलेश चंद्रकांत देशमुख आणि शेख चांद शेख हाफीस यांचा समावेश असल्याची माहिती मिळाली आहे. अन्य काही प्रवाशांवर अंबड येथील उपजिल्हा रुग्णालयात उपचार सुरू आहेत. अपघाताची माहिती मिळताच पोलीस आणि संबंधित यंत्रणा घटनास्थळी दाखल झाली. अपघातामुळे काही काळ जालना–बीड महामार्गावरील वाहतूक विस्कळीत झाली होती. पोलिसांनी वाहतूक सुरळीत करत अपघाताचे कारण शोधण्यास सुरुवात केली आहे.या अपघातात कोणतीही जीवितहानी झाली नसल्याने मोठी दुर्घटना टळली असली, तरी अनेक विद्यार्थी व प्रवासी जखमी झाल्याने परिसरात हळहळ व्यक्त होत आहे.

आधुनिक केसरी न्यूज 

त्रिसिंग जायभाये 

वडीगोद्री :नालेवाडी येथील सरपंच तसेच अंबड कृषी उत्पन्न बाजार समितीचे उपसभापती अरुण घुगे यांनी शनिवारी (दि. ४) सकाळी मॉर्निंग वॉकसाठी गेल्यानंतर लिंबाच्या झाडाला गळफास घेऊन आत्महत्या केल्याची धक्कादायक घटना घडली. या घटनेमुळे नालेवाडीसह परिसरात हळहळ व्यक्त होत असून सर्वत्र शोककळा पसरली आहे.

मिळालेल्या माहितीनुसार, अरुण घुगे हे नेहमीप्रमाणे सकाळी फिरण्यासाठी गेले होते. याच दरम्यान त्यांनी लिंबाच्या झाडाला गळफास घेऊन जीवन संपविले. आत्महत्येचे नेमके कारण अद्याप समजू शकले नसून, पोलिसांकडून या प्रकरणाचा अधिक तपास सुरू आहे. घटनेची माहिती मिळताच परिसरातील नागरिकांनी घटनास्थळी धाव घेतली. त्यानंतर त्यांचा मृतदेह उत्तरीय तपासणीसाठी ग्रामीण रुग्णालय, पाचोड येथे आणण्यात आला. आवश्यक पंचनामा व इतर कायदेशीर प्रक्रिया पूर्ण करण्यात येत असून संबंधित यंत्रणेकडून पुढील तपास सुरू आहे.

अरुण घुगे यांच्या पश्चात आई, पत्नी, दोन मुले, दोन भाऊ – गणेश घुगे व गजानन घुगे, तसेच भावजया असा मोठा परिवार आहे. त्यांच्या अकाली निधनाने कुटुंबीयांवर दुःखाचा डोंगर कोसळला असून नालेवाडी गावासह राजकीय, सामाजिक व कृषी क्षेत्रात शोक व्यक्त केला जात आहे. त्यांच्यावर आज दि ४ रोजी दुपारी ३ वाजता नालेवाडी येथे शोकाकुल वातावरणात अंत्यसंस्कार करण्यात येणार आहेत.

आधुनिक केसरी न्यूज 

 केदार शर्मा

परतूर : भाजपचे ज्येष्ठ नेते किरीट सोमय्या यांनी आज परतूर येथील एका वादग्रस्त इंग्रजी शाळेला भेट देऊन पाहणी केली. या भेटीनंतर त्यांनी स्थानिक प्रशासन, पोलीस अधिकारी आणि राजकीय कार्यकर्त्यांसमोर विविध मुद्द्यांवरून जोरदार हल्लाबोल केला.

अनधिकृत शाळेवर प्रशासकीय कारवाईची मागणी

शाळेची पाहणी केल्यानंतर पत्रकारांशी बोलताना किरीट सोमय्या यांनी प्रशासनाला धारेवर धरले. "सदरील शाळेला कोणतीही मान्यता नसताना आणि शाळेच्या इमारतीला परिसराची कोणतीही परवानगी नसताना ही शाळा अद्याप पर्यंत उभीच कशी आहे?" असा सवाल त्यांनी उपस्थित अधिकारी व पोलिसांना केला. "तुम्ही आरोपींना पाठीशी घालत आहात," असा स्पष्ट आरोप करत त्यांनी संबंधित पोलीस अधिकारी व मुख्याधिकारी यांच्यावर प्रशासकीय कारवाई का करण्यात येऊ नये, अशी विचारणा केली. हा संपूर्ण प्रकार आपण शासन स्तरावर मांडणार असून यातील दोषी अधिकाऱ्यांना सोडणार नाही, असा इशाराही त्यांनी पत्रकारांशी बोलताना दिला. तत्पूर्वी, सोमय्या यांनी येथील उपविभागीय कार्यालयात तब्बल तासभर या शाळेच्या बाबतीत चौकशी केली व तक्रार दाखल केली.

'एसआयआर' (SIR) बाबत कार्यकर्त्यांना मार्गदर्शन

शाळेला भेट दिल्यानंतर किरीट सोमय्या यांनी भाजप प्रदेश सचिव राहुल भैय्या लोणीकर यांच्या संपर्क कार्यालयात कार्यकर्त्यांची बैठक घेतली. या बैठकीत त्यांनी 'एसआयआर' (मतदार यादी शुद्धीकरण) मोहिमेबाबत कार्यकर्त्यांना सविस्तर मार्गदर्शन केले.

"घुसखोरांना हुसकावून लावण्यासाठी सज्ज"

आपल्या भाषणात हिंदुत्वाचा आणि राष्ट्रीयत्वाचा मुद्दा उपस्थित करत किरीट सोमय्या म्हणाले की, मेट्रो शहरांपासून थेट गाव पातळीपर्यंत बांगलादेशी घुसखोरांना हुसकावून लावण्यासाठी आम्ही सज्ज आहोत. यासाठी गावपातळीवरील लोकांनी सतर्क राहणे गरजेचे आहे. ज्यांचा येथे जन्म झालेला नाही, अशा संशयास्पद आणि अवैध लोकांच्या नावांची मतदार यादीतून वगळणी करण्यासाठी नागरिकांनी पुढाकार घ्यावा, असे आवाहन त्यांनी केले. त्यांनी पुढे सांगितले की, "मोदीजींच्या नेतृत्वात देशात मोठे बदल होत आहेत. राम मंदिराचे निर्माण झाले आहे, काश्मीरमधून कलम ३७० रद्द झाले आहे. आता वेळ आली आहे मतदार यादी शुद्धीकरणाची. पश्चिम बंगाल आणि बिहारमध्ये लाखो अवैध नावे कापली गेली आहेत, आता महाराष्ट्रातील मतदार यादीतूनही सुमारे ५० लाख बांगलादेशी घुसखोर मुस्लिमांची नावे हटवण्याचा आमचा संकल्प आहे."

अनधिकृत इमारत पाडणारच: राहुल लोणीकर

तत्पूर्वी, भाजपचे प्रदेश सचिव राहुल भैय्या लोणीकर यांनीही याप्रसंगी आपले मत मांडले. सदरील वादग्रस्त शाळेबाबत प्रशासकीय पातळीवर आपण पूर्ण पाठपुरावा करणार असून, ही अनधिकृत इमारत पाडणारच, असा ठाम निर्धार त्यांनी व्यक्त केला.
या कार्यक्रमाला भाजपचे स्थानिक लोकप्रतिनिधी, अनेक प्रमुख पदाधिकारी, पक्ष कार्यकर्ते आणि नागरिक मोठ्या संख्येने उपस्थित होते. किरीट सोमय्या यांनी कार्यकर्त्यांना मतदार यादीतील प्रत्येक अवैध नाव शोधून काढण्यासाठी 'स्पेशल सेल'च्या माध्यमातून काम करण्याचे आवाहन करत आगामी ५० वर्षे देश आणि राज्यात केवळ भाजपचेच संघटन मजबूत राहील, असा विश्वास व्यक्त केला. यावेळी भाजपाचे लोकप्रतिनिधी पदाधिकारी व कार्यकर्ते मोठ्या संख्येने उपस्थित होते.