आधुनिक केसरी न्यूज 

सांगली : शहरातील १४ वर्षीय वेदांत मारुती बंडगर खूनप्रकरणातील संशयित असलेल्या 'एन. जी. ग्रुप' या संघटित गुन्हेगारी टोळीविरुद्ध महाराष्ट्र संघटित गुन्हेगारी नियंत्रण अधिनियम (मोक्का) अंतर्गत कडक कारवाई करण्यात आली आहे. कोल्हापूर परिक्षेत्राचे विशेष पोलीस महानिरीक्षक रंजन कुमार शर्मा यांनी या प्रस्तावास मंजुरी दिली असून, टोळीप्रमुख निलेश गडदे याच्यासह एका विधीसंघर्षग्रस्त बालकासह एकूण नऊ संशयितांवर मोक्काची कारवाई करण्यात आली आहे. 

निलेश विठोबा गडदे (टोळीप्रमुख, रा. कुपवाड), किरण शंकर लोखंडे, विशाल बिरुदेव चौगुले, सागर ऊर्फ नानासो माणिक चौगुले, अतुल दादासो वायदंडे, संदेश ऊर्फ सँडी रामचंद्र घागरे, एक विधीसंघर्षग्रस्त बालक, मलिक सलीम शेख व कुख्यात गुंड महमंद जमाल नदाफ अशी मोक्का कायद्यांतर्गत कारवाई झालेल्यांची नावे आहेत. या टोळीविरुद्ध खून, खुनाचा प्रयत्न, अपहरण, खंडणी, विनयभंग, बेकायदेशीर अंमली पदार्थांची लागवड, घातक शस्त्रे बाळगणे अशा गंभीर स्वरूपाचे गुन्हे दाखल आहेत. सांगली, मिरज, कुपवाड, जत, मिरज ग्रामीण, कवठेमहांकाळ या पोलीस ठाण्यांच्या हद्दींसह कर्नाटकातील बेळगाव जिल्ह्यातील कागवाड आणि बागलकोट जिल्ह्यातील बनहट्टी परिसरातही या टोळीचे जाळे पसरले असल्याचे तपासात समोर आले आहे.

टोळीची वाढती गुन्हेगारी आणि दहशत लक्षात घेऊन मोक्का लागू करण्यासाठी सहाय्यक संचालक सरकारी अभियोक्ता श्रीमती ज्योती डाके यांचा कायदेशीर अभिप्राय घेण्यात आला. त्यानंतर एलसीबीचे पोलीस निरीक्षक संजीव झाडे यांनी प्रस्ताव पोलीस अधीक्षक तुषार दोशी यांच्याकडे सादर केला. पोलीस अधीक्षकांनी प्रस्तावाची छाननी करून अंतिम मंजुरीसाठी तो विशेष पोलीस महानिरीक्षक रंजन कुमार शर्मा यांच्याकडे पाठविला. शर्मा यांनी प्रस्तावास मंजुरी दिल्यानंतर आरोपींवर मोक्का अंतर्गत कारवाई करण्यात आली. या गुन्ह्याचा पुढील तपास शहर विभागाचे उपविभागीय पोलीस अधिकारी संदीप भागवत यांच्याकडे सोपविण्यात आला आहे.

चौकट : 

उजव्या डोळ्यात गोळी झाडून वेदांतचा खून

संजयनगर पोलीस ठाण्याच्या हद्दीत घडलेल्या वेदांत बंडगर खूनप्रकरणाचा तपास स्थानिक गुन्हे अन्वेषण शाखेचे (एलसीबी) पोलीस निरीक्षक संजीव झाडे करत होते. १४ वर्षीय वेदांतचा उजव्या डोळ्यात गोळी झाडून निर्दयीपणे खून करण्यात आला होता. पोलिस तपासादरम्यान निलेश विठोबा गडदे (रा. वाघमोडे नगर, कुपवाड) याने आपल्या साथीदारांसह 'एन. जी. ग्रुप' नावाची संघटित गुन्हेगारी टोळी स्थापन करून आर्थिक फायद्यासाठी आणि दहशत निर्माण करण्याच्या उद्देशाने विविध गंभीर गुन्हे केल्याचे निष्पन्न झाले आहे. वेदांतच्या खुनानंतर सांगलीतील राजकारण तापले होते. पालकमंत्री चंद्रकांतदादा पाटील यांनी संशयितांना मोक्का अंतर्गत कारवाई करू अशी ग्वाही दिली होती.

आधुनिक केसरी न्यूज 

लोहा : शहरातील शिक्षक कॉलनी परिसरात पत्नीवर कथितरित्या गावठी कट्ट्यातून गोळीबार करून तिचा खून करण्याचा प्रयत्न केल्याची धक्कादायक घटना घडली आहे. या प्रकरणी पतीविरुद्ध भारतीय न्याय संहिता (बीएनएस) आणि शस्त्र अधिनियमातील गंभीर कलमांखाली गुन्हा दाखल करण्यात आला असून, कथित गावठी कट्टा आरोपीकडे आला कुठून? याचा शोध पोलिसांनी सुरू केला आहे.

फिर्यादी अर्चना विशाल जाधव (वय १९, रा. शिक्षक कॉलनी, लोहा) यांनी दिलेल्या तक्रारीनुसार, ६ जुलै २०२६ रोजी रात्री १०.३० ते ११.०० वाजण्याच्या सुमारास आरोपी विशाल सुरेश जाधव (वय २२) याने चारित्र्यावर संशय घेत वाद घालत तिला थापडा, लाथा व बुक्क्यांनी मारहाण केली. त्यानंतर त्याच्याकडील कथित गावठी कट्ट्यातून तिच्यावर गोळीबार करून जीवे मारण्याचा प्रयत्न केल्याचा आरोप तक्रारीत करण्यात आला आहे. तक्रारीनुसार, आरोपीने फिर्यादीच्या वडिलांना दूरध्वनी करून, 'तुझ्या पोरीला गोळी घातली, आता तुझ्याकडे येतो,' अशी धमकीही दिल्याचा आरोप आहे. फिर्यादीच्या वैद्यकीय तपासणी (एमएलसी) अहवाल व जबाबाच्या आधारे लोहा पोलीस ठाण्यात गुन्हा दाखल करण्यात आला.

चारित्र्याच्या संशयावरून घटना घडल्याचा आरोप

प्राथमिक माहितीनुसार आरोपी विशाल जाधव हा मूळ गांधीनगर येथील रहिवासी असून लोह्यातील एका मद्यविक्री दुकानात माल पुरवठ्याचे काम करतो. त्याच्याविरुद्ध यापूर्वी चोरीसंदर्भातील काही गुन्हे नोंद असल्याची प्राथमिक माहिती असून त्याची अधिकृत पडताळणी सुरू आहे. या प्रकरणातील सर्वात महत्वाचा मुद्दा म्हणजे आरोपीकडे कथित गावठी कट्टा आला कुठून ? तो कोणी पुरविला ? त्यामागे आणखी कोणाचे जाळे आहे का? याचा तपास पोलिसांकडून केला जात आहे. घटनास्थळावरील फॉरेन्सिक पुरावे, न्यायवैद्यकीय अहवाल आणि शस्त्राच्या तपासणीनंतर पुढील कारवाईची दिशा स्पष्ट होणार आहे. या प्रकरणाचा तपास पोलीस निरीक्षक चंद्रकांत जाधव यांच्या मार्गदर्शनाखाली सहायक पोलीस निरीक्षक नुरशाहद पठाण करीत आहेत. तपासातून समोर येणाऱ्या पुराव्यांनुसार पुढील कारवाई करण्यात येईल, असे पोलिसांनी सांगितले.

आधुनिक केसरी न्यूज 

देगलूर माणिक सुर्यवंशी

नांदेड : जिल्ह्यातील अवैध धंद्यांविरुद्ध पोलीस प्रशासनाने मोठी मोहीम उघडली आहे. याच मोहिमेचा भाग म्हणून देगलूर पोलीस ठाण्याच्या पथकाने एका अवैध रेती वाहतूक करणाऱ्या हायवा टिप्परवर धडक कारवाई केली असून, एकूण २० लाख ४९ हजार रुपयांचा मुद्येमाल जप्त केला आहे.

गुप्त माहितीच्या आधारे रचला सापळा ६ जुलै २०२६ रोजी देगलूर पोलिसांना एका गुप्त माहितीदाराकडून अवैध रेती वाहतुकीबाबत खात्रीशीर माहिती मिळाली होती. या माहितीच्या आधारे पोलिसांनी देगलूर शहराजवळील खानापूर फाटा परिसरात तात्काळ सापळा रचला. संशयास्पद वाटणारा एक लाल रंगाचा हायवा टिप्पर (क्रमांक: TS-36-T-3865) या परिसरात आला असता पोलिसांनी तो अडवला.
२० लाख ४९ हजारांचा मुद्देमाल जप्त
पोलिसांनी वाहनाची बारकाईने तपासणी केली असता, त्यात कोणतीही वैध पावती किंवा परवाना नसताना अवैध रित्या लाल रेतीची वाहतूक केली जात असल्याचे उघड झाले. या कारवाईत पोलिसांनी खालील मुद्येमाल जप्त केला:
 ७ ब्रास लाल रेती(अंदाजे किंमत: ₹४९,०००/-)
 हायवा टिप्पर (अंदाजे किंमत: ₹२०,००,०००/-)
 एकूण जप्त मुद्देमाल: ₹२०,४९,०००/- (वीस लाख एकोणपन्नास हजार रुपये).

चालकावर गुन्हा दाखल 
याप्रकरणी पोलिसांनी हायवा चालक दीपक हणमंत लोणे (वय ४४ वर्षे, रा. मडगी, ता. देगलूर, जि. नांदेड) याला ताब्यात घेतले आहे. त्याच्याविरुद्ध देगलूर पोलीस ठाण्यात गु.र.नं. ३२६/२०२६ नुसार भारतीय न्याय संहिता कलम ३०३(२) तसेच महाराष्ट्र जमीन महसूल अधिनियम, १९६६ चे कलम ४८(७) व ४८(८) अन्वये गुन्हा नोंदवण्यात आला आहे. या प्रकरणाचा पुढील तपास देगलूर पोलीस करत आहेत. या अधिकाऱ्यांच्या मार्गदर्शनाखाली झाली कारवाई ही यशस्वी कारवाई नांदेडचे मा. पोलीस अधीक्षक डॉ. नीलाभ रोहन उपविभागीय पोलीस अधिकारी किरण पोपळघट यांच्या मार्गदर्शनाखाली पोलीस निरीक्षक सूर्यमोहन बोलमवाड, पोलीस उपनिरीक्षक हणमंत शिंदे आणि पोलीस अंमलदार बळीराम धुळे यांच्या पथकाने पार पाडली. नांदेड पोलिसांचे आवाहन जिल्ह्यातील जनतेला आवाहन करण्यात येते की, कुठेही अवैध गौण खनिज वाहतूक, साठवणूक किंवा बेकायदेशीर उत्खनन होत असल्याचे आढळल्यास तात्काळ जवळच्या पोलीस ठाण्याशी किंवा पोलीस नियंत्रण कक्षाशी संपर्क साधावा. अशा अवैध कृत्यांमध्ये सामील असलेल्यांवर कठोर कायदेशीर कारवाई केली जाईल, असा इशारा पोलीस प्रशासनाने दिला आहे.
>

आधुनिक केसरी न्यूज 

  दिलीप घाटे

बिलोली : पत्रकारितेच्या पवित्र ओळखीचा गैरवापर करून ‘प्रेस’चा फलक लावलेल्या दुचाकीवरून सुगंधित गुटखा आणि तंबाखूची बेकायदेशीर वाहतूक करणाऱ्या एका आरोपीला बिलोली पोलिसांनी रंगेहात पकडत मोठी कारवाई केली आहे. या कारवाईत सुमारे ५१ हजार रुपयांचा प्रतिबंधित गुटखा, तंबाखू आणि दुचाकी असा मुद्देमाल जप्त करण्यात आला असून, आरोपीविरुद्ध विविध कलमांन्वये गुन्हा दाखल करण्यात आला आहे.

नांदेड जिल्ह्याचे पोलीस अधीक्षक डॉ. निलभ रोहन, अपर पोलीस अधीक्षक सुरज गुरव आणि बिलोलीचे उपविभागीय पोलीस अधिकारी श्याम पानेगावकर यांच्या मार्गदर्शनाखाली पोलीस निरीक्षक बाळासाहेब रोकडे यांच्या नेतृत्वाखाली ही धडक कारवाई करण्यात आली.

मिळालेल्या माहितीनुसार, बिलोली पोलीस ठाण्याचे पथक खदगाव-मिनकी मार्गावर नियमित गस्त घालत असताना एमएच-२६-सीजे-६५५३ क्रमांकाची मोटारसायकल संशयास्पदरीत्या फिरताना आढळली. पोलिसांनी वाहन थांबवून तपासणी केली असता त्यामध्ये शासनाने प्रतिबंधित केलेला सागर पान मसाला, सुगंधित गुटखा आणि तंबाखूचा मोठा साठा आढळून आला. पोलिसांनी तत्काळ कारवाई करत संपूर्ण मुद्देमाल जप्त केला.

या प्रकरणातील सर्वात धक्कादायक बाब म्हणजे आरोपीने आपल्या मोटारसायकलवर मोठ्या अक्षरांत ‘PRESS’ असा फलक लावला होता. पोलिसांची दिशाभूल करून बेकायदेशीर धंद्यांना संरक्षण मिळविण्यासाठी पत्रकारितेच्या नावाचा वापर केला जात असल्याचे या घटनेतून समोर आले आहे.

या घटनेनंतर पोलीस निरीक्षक बाळासाहेब रोकडे यांनी कठोर भूमिका घेत शहरात आणि तालुक्यात ‘प्रेस’ लिहिलेल्या वाहनांची तसेच संबंधित व्यक्तींच्या प्रेस ओळखपत्रांची विशेष तपासणी करण्याचे संकेत दिले आहेत. “पत्रकारितेच्या नावाचा गैरवापर करून अवैध धंदे करणाऱ्यांची कोणतीही गय केली जाणार नाही. खोटे प्रेस कार्ड आणि बनावट ओळखीच्या माध्यमातून कायद्याला चकवा देणाऱ्यांविरोधात कठोर रकारवाई केली जाईल,” असा इशारा त्यांनी दिला. या प्रकरणी आरोपी शिवदर्शन नंदयप्पा स्वामी (वय ४४) याच्याविरुद्ध भारतीय न्याय संहिता  कायद्यानुसार संबंधितां वर गुन्हा दाखल करण्यात आला आहे.

ही यशस्वी कारवाई सहाय्यक पोलीस निरीक्षक जाधव, पोलीस उपनिरीक्षक एस. व्ही. देगलूरकर आणि पोलीस कॉन्स्टेबल निरंजन अंबुरे यांच्या पथकाने केली असून पुढील तपास पोलीस उपनिरीक्षक एस. व्ही. देगलूरकर करीत आहेत. दरम्यान, ‘प्रेस’ या नावाचा वापर करून सुरू असलेल्या अवैध कारवायांमुळे खऱ्या आणि प्रामाणिक पत्रकारांची प्रतिमा मलीन होत असल्याची प्रतिक्रिया नागरिकांतून व्यक्त होत आहे. या प्रकरणामुळे जिल्ह्यात बनावट प्रेस ओळखपत्रे आणि ‘प्रेस’ फलक लावून फिरणाऱ्या वाहनांची चौकशी करण्याची मागणी जोर धरू लागली आहे.

आधुनिक केसरी न्यूज 

नांदेड : जिल्ह्यात अंमली पदार्थांविरुद्ध सुरू असलेल्या विशेष मोहिमे अंतर्गत इतवारा पोलिसांनी प्रभावी कारवाई करण्यात आली असून इतवारा पोलिसांनी प्रतिबंधित ६ हजार ५०० गोळ्या व ७७१ ग्राम गांजा जप्त केला आहे. याबाबत इतवारा पोलिस ठाण्यात गुन्हा दाखल करण्यात आला आहे.

इतवारा पोलिसांनी केलेल्या कारवाईत  प्रिगालॅब-300
प्रतिबंधित औषधाचे 65 बॉक्स प्रत्येकी 10 गोळ्यांच्या स्ट्रिप प्रमाणे एकूण 6,500 गोळ्या,  771 ग्रॅम गांजा, एक तलवार जप्त करण्यात आली आहे. या प्रकरणात विनोद रामचंद्र जोंधळे याच्याविरुद्ध कायदेशीर कारवाई करण्यात आली असून, गुन्ह्याचा पुढील तपास सुरू आहे. सदर प्रकरणात इतर आरोपी अथवा अमली पदार्थांच्या पुरवठा साखळीचा शोध घेण्याचे काम सुरू आहे. तपासाच्या अनुषंगाने पुढील कायदेशीर कारवाई करण्यात येत आहे. सदरील कारवाई पोलिस अधिक्षक डॉ. नीलाभ रोहन, अप्पर पोलिस अधिक्षक सूरज गुरव, उपविभागीय पोलिस अधिकारी प्रशांत शिंदे, पोलिस निरीक्षक खनाळ, संजय शिंदे यांच्या मार्गदर्शनाखाली तपास अधिकारी पोलीस उपनिरीक्षक  देशमुख तसेच गुन्हे शोध पथकाचे पोलीस उपनिरीक्षक प्रवीण आगलावे, सहाय्यक पोलिस उपनिरीक्षक बैग, पोलीस अंमलदार जगताप, रिठेवाड, कोरनुळे, इस्राईल, सुखई, कदम, महिला अंमलदार कांबळे, शिंदे यांनी ही कारवाई यशस्वीरीत्या पार पाडली. नांदेड जिल्हा पोलीसांकडून अंमली पदार्थांची विक्री, साठवणूक व वाहतूक करणाऱ्यांविरुद्ध यापुढेही कठोर व प्रभावी कारवाई सुरू राहणार असून, नागरिकांनी अशा बेकायदेशीर कृत्यांची माहिती तात्काळ पोलीस प्रशासनास देऊन सहकार्य करावे, असे आवाहन करण्यात येत आहे.

आधुनिक केसरी न्यूज 

गोंदिया : रामनगर पोलीस ठाणे अतंर्गत ​सूर्याटोला येथील रेल्वे चौकीसमोर आज सकाळच्या सुमारास एका अज्ञात महिलेची धारदार शस्त्राने गळा चिरून निर्घृण हत्या करण्यात आल्याची धक्कादायक घटना उघडकीस आली आहे. या घटनेमुळे परिसरात प्रचंड खळबळ उडाली असून नागरिकांमध्ये भीतीचे वातावरण पसरले आहे. दोन्ही रेल्वे ट्रॅकच्या मध्यभागी हा रक्ताने माखलेला मृतदेह आढळून आला. ​घटनेची माहिती मिळताच स्थानिक पोलिसांनी तातडीने घटनास्थळ गाठले. गुन्ह्याचे गांभीर्य लक्षात घेता, पुरावे गोळा करण्यासाठी फॉरेन्सिक टीमला (Forensic Expert) पाचारण करण्यात आले होते. फॉरेन्सिक तज्ज्ञांनी घटनास्थळाची बारकाईने पाहणी करून काही महत्त्वाचे नमुने आणि पुरावे हस्तगत केले आहेत.

​ओळख पटवण्याचे आव्हान पोलिसांनी पंचनामा करून मृतदेह ताब्यात घेतला असून तो उत्तरिय तपासणीसाठी (Post-Mortem) रुग्णालयात पाठवला आहे. मृत महिला कोण आहे आणि ती कुठली रहिवासी आहे, याबाबत अद्याप कोणतीही माहिती मिळालेली नाही. महिलेची ओळख पटवण्याचे मोठे आव्हान सध्या पोलिसांसमोर आहे. या महिलेची हत्या कोणी आणि कोणत्या कारणासाठी केली, याचा शोध पोलीस घेत आहेत. परिसरात संशयास्पद हालचाली दिसल्या असल्यास किंवा मृत महिलेबाबत काही माहिती असल्यास पोलिसांशी संपर्क साधण्याचे आवाहन करण्यात आले आहे. पोलीस या प्रकरणाचा पुढील कसून तपास करत आहेत.

आधुनिक केसरी न्यूज 

किशोर जाधव 

खुलताबाद :  खुलताबाद तालुक्यातील बाजार सावंगी येथे दि.20 शनिवार रोजी दुपारी एक वाजेच्या सुमारास बाजार सावंगी येथील मुख्य रस्त्यावरून आरोपींची धिंड काढण्यात आली असून बाजार सावंगी येथील गजबजलेल्या मार्केट परिसरात चहाच्या हॉटेलमध्ये थुंकण्यास विरोध  केल्याने राग मनात धरून सहा जणांनी दोन सख्ख्या भावावर जीवघेणा हल्ला केल्याची धक्कादायक घटना ( दि.18) गुरुवारी घडली असून लाकडी दांडे व लोखंडी रॉडने करण्यात आलेल्या या हल्ल्यात दोघां भावांच्या डोक्याला गंभीर दुखापत झाली असून त्यांच्यावर छत्रपती संभाजीनगर येथील घाटी रुग्णालयात उपचार सुरू असून या घटनेमुळे बाजार सावंगी परिसरात एकच खळबळ उडाली  घटनेची माहिती मिळताच पोलीस निरीक्षक प्रशांत महाजन यांनी घटनास्थळी भेट देऊन पहाणी केली तपासा अधिकारी राजेश पाटील यांच्या मार्गदर्शनाखाली पुढील तपास सुरू असून फॉरेन्सिक लॅबच्या पथकाने ही घटनास्थळी भेट देत पुरावे संकलित केले याप्रकरणी संबंधित आरोपी अश्विन कारभारी नलावडे,अनिकेत गणेश नलावडे,मनोज अंकुश जाधव,आबाराव नलावडे,तसेच बबलू शेख व शुभम देविदास सराटे हे दोघे फरार असून पुढील तपास पोलीस निरीक्षक प्रशांत महाजन,तपास अधिकारी राजेश पाटील,यांच्या मार्गदर्शनाखाली बाजार सावंगी पोलीस चौकीचे मुख्य जमादार नवनाथ कोल्हे,हे करीत आहे  यादरम्यान पूर्वीही मुख्य आरोपीपैकी अनिकेत गणेश नलावडे,यांच्याविरूद्ध कलम १३७ (२) अंतर्गत दोन तसेच कलम ११८ (१) अंतर्गत एक गुन्हा दाखल असल्याची माहिती समोर आली आहे खुलताबाद पोलिसांनी या आरोपींना ताब्यात घेऊन कलम ( ३०७ ) अंतर्गत गुन्हा दाखल करण्यात आला आहे अशी माहिती पोलिसाकडून देण्यात आली आहे

आधुनिक केसरी न्यूज 

 गोंदिया : अर्जुनी मोरगाव तालुक्यातील परसटोला येथे शेतीच्या वादातून सख्ख्या भावानेच मोठ्या भावाचा कुर्‍हाडीने वार करून खून केल्याची धक्कादायक घटना बुधवारी (दि. १७ जून) सकाळी घडली. या प्रकरणी केशोरी पोलीस ठाण्यात खुनाचा गुन्हा दाखल करण्यात आला असून आरोपीला पोलिसांनी ताब्यात घेतले आहे. मृतक मोहन मंगरू कवडो (वय ४७) व आरोपी नारायण मंगरू कवडो (वय ४४) हे परसटोला (ता. अर्जुनी मोर, जि. गोंदिया) येथील सख्खे भाऊ आहेत. वडिलांनी दोन्ही भावांना शेतीची वाटणी करून दिली होती. मात्र वडिलांचा सांभाळ मृतक करत असल्याने त्यांच्या हिस्स्यातील चार बांद्या मृतक पेरत होता.

बुधवारी सकाळी सुमारे १० वाजताच्या सुमारास परसटोला शेतशिवारात दोघांमध्ये वडिलांच्या हिस्स्यातील शेतीवरून वाद झाला. वाद विकोपाला गेल्यानंतर आरोपी नारायण कवडो याने कुर्‍हाडीने मोहन कवडो यांच्या दोन्ही पायांवर वार केले. गंभीर जखमी झालेल्या मोहन कवडो यांचा घटनास्थळीच मृत्यू झाला.
या घटनेची फिर्याद मृतकाची पत्नी कविता मोहन कवडो (वय ४०) यांनी दिली. त्यांच्या तक्रारीवरून केशोरी पोलीस ठाण्यात अप.क्र. १०८/२०२६ अन्वये भारतीय न्याय संहिता (BNS) कलम १०३(१) अंतर्गत गुन्हा दाखल करण्यात आला आहे. पोलिसांनी आरोपीला ताब्यात घेतले असून पुढील तपास पोलीस निरीक्षक मंगेश काळे यांच्या मार्गदर्शनाखाली सुरू आहे. या घटनेमुळे परस्तोला परिसरात खळबळ उडाली असून नागरिकांमध्ये हळहळ व्यक्त होत आहे

आधुनिक केसरी न्यूज 

गोंदिया : तहसील कार्यालयातील महसूल सहाय्यक (वर्ग 3) यांना १० हजार रुपयांची लाच स्वीकारताना लाचलुचपत प्रतिबंधक विभागाने (एसीबी) रंगेहात पकडले. ही कारवाई बुधवार, १७ जून रोजी करण्यात आली. शालू कमलेश कावळे (वय ३८) अशी आरोपीची नावे आहेत. या कारवाईमुळे महसूल विभागात खळबळ उडाली आहे. मिळालेल्या माहितीनुसार, तक्रारदार हे भारतीय नौदलाचे माजी सैनिक तसेच पोलीस विभागातील सेवानिवृत्त वरिष्ठ लिपिक आहेत. माजी सैनिक असल्याने ग्राम तेढवा (ता. गोंदिया) येथील सिलिंगची जमीन त्यांच्या नावावर करून देण्यासाठी त्यांनी महाराष्ट्र कृषी जमीन कमाल धारणा अधिनियम १९६१ अंतर्गत तहसीलदार, गोंदिया यांच्याकडे अर्ज केला होता. सदर अर्जावर कार्यवाही करून जमीन नावावर करून देण्यासाठी महसूल सहाय्यक शालू कावळे यांनी ५० हजार रुपयांची लाच मागितल्याची तक्रार १६ जून रोजी एसीबीकडे करण्यात आली होती. तक्रारीची पडताळणी केल्यानंतर आरोपीने ५० हजार रुपयांपैकी १० हजार रुपये आगाऊ रक्कम म्हणून मागितल्याचे निष्पन्न झाले. उर्वरित ४० हजार रुपये काम पूर्ण झाल्यानंतर देण्याचे ठरविण्यात आले होते. परंतु, तक्रारकर्त्याला लाच देण्याची मुळीच इच्छा नव्हती. त्यामुळे त्यांनी याची तक्रार गोंदिया लाचलुचपत प्रतिबंधक विभागात केली. त्यानुसार १७ जून रोजी एसीबीने सापळा रचला. गोंदिया तहसील कार्यालयात तक्रारदारांकडून १० हजार रुपयांची लाच स्वीकारताना महसूल सहाय्यक शालू कावळे यांना रंगेहात पकडण्यात आले. आरोपीच्या अंगझडतीदरम्यान १० हजार रुपयांची लाच रक्कम जप्त करण्यात आली. तसेच त्यांच्या ताब्यातील व्हिवो कंपनीचा मोबाईल फोनही जप्त करण्यात आला असून घरझडतीची प्रक्रिया सुरू आहे. या प्रकरणी गोंदिया शहर पोलीस ठाण्यात भ्रष्टाचार प्रतिबंधक कायदा कलम ७ अंतर्गत गुन्हा दाखल करण्याची प्रक्रिया सुरू असून पुढील तपास लाचलुचपत प्रतिबंधक विभागाचे पोलीस निरीक्षक अरविंद राऊत करत आहेत.

यांनी केली कारवाई…
ही कारवाई ACB चे पोलीस उपअधीक्षक निलेश लोधी यांच्या नेतृत्वात पोलीस अधीक्षक डॉ. दिगंबर प्रधान, अपर पोलीस अधीक्षक माधुरी बाविस्कर आणि अपर पोलीस अधीक्षक विजय माहुलकर यांच्या मार्गदर्शनात ASI चंद्रकांत करपे, हेड कॉन्स्टेबल संजयकुमार बोहरे, मंगेश काहालकर, पोलिस नायक संतोष शेंडे, संतोष बोपचे, अशोक कापसे, प्रशांत सोनवणे, कैलास काटकर, दीपक बाटबर्वे, रोहिणी डांगे यांनी केली.

आधुनिक केसरी न्यूज 

नांदेड : भाग्यनगर पोलिस ठाण्यातील खुन प्रकरणात व उस्माननगर पोलिस ठाण्याच्या हद्दीतील दरोडा प्रकरणातील आरोपीला भाग्यनगर पोलिसांच्या गुन्हे शोध पथकाने परभणी येथे पकडले असून अटक करण्यात आली आहे.
भाग्यनगर पोलिस ठाण्याच्या हद्दीत ४ एप्रिल रोजी झालेल्या खून प्रकरणातील आरोपी सुरज सुनिल कदम हा गेल्या अनेक दिवसांपासून फरारा होता. सदरील आरोपी हा परभणी येथे असल्याची गुप्त माहिती भाग्यनगर पोलिस ठाण्याच्या गुन्हे शोध पथकाचे पोलिस उपनिरीक्षक नरेश वाडेवाले व पोलिस उपनिरीक्षक विनोद देशमुख यांना मिळाली. पोलिस उपनिरीक्षक विनोद देशमुख व नरेश वाडेवाले यांनी सदरील माहिती वरिष्ठांना कळवून आपल्या सहकाऱ्यांना सोबत घेऊन परभणी येथे पोहचले. आरोपी सुरज सुनिल कदम हा मानवत रेल्वे स्थानकावर असल्याचा सुगावा लागताच भाग्यनगर पोलिसांनी मानवत रेल्वे स्थानक येथे सापळा रचून आरोपी सुरज सुनिल कदम यास ताब्यात घेतले. सदरील आरोपीला भाग्यनगर पोलिस ठाण्यात आणून अधिक चौकशी केली असता त्यांने उस्माननगर पोलिस ठाण्याच्या हद्दीत २०२४ या वर्षात दरोड्याचा गुन्हा केल्याची कबुली दिली. दरोड्यांचा गुन्हा केला तेव्हापासून आरोपी सुरज सुनिल कदम हा फरार असल्याचे तपासात निष्पन्न झाले. सदरील कारवाई पोलिस अधिक्षक अबिनाश कुमार, अप्पर पोलिस अधिक्षक सुरज गुरव, उपविभागीय पोलिस अधिकारी रामेश्वर वैंजने यांच्या मार्गदर्शनाखाली पोलिस निरीक्षक संतोष तांबे, गुन्हे शोध पथकाचे पोलिस उपनिरीक्षक नरेश वाडेवाले, पोलिस उपनिरीक्षक विनोद देशमुख व त्यांचे सहकारी विशाल माळवे, विष्णुकांत मुंडे, राहुल लाठकर, नागनाथ चापके, राजीव घुले, पठाण, सुधाकर मलदोडे यांनी केली आहे.

आधुनिक केसरी न्यूज 

  श्रीकांत बरकते

कळंब : नायगाव-मुरुड रोडवरील रॉयल लॉजमध्ये अवैध वेश्या व्यवसाय सुरू असल्याच्या गोपनीय माहितीवरून शिराढोण पोलिसांनी आज 11/06/2026 रोजी छापा टाकला. डमी ग्राहक पाठवून केलेल्या कारवाईत 2 पिडीत महिलांची सुटका करून लॉज मॅनेजरला अटक करण्यात आली. पोलिस स्टेशन शिराढोणचे स.पो.नि. डी.बी. कोळेकर यांच्या पथकाने दोन पंच व महिला पंचांसह लॉजवर धाड टाकली. छाप्यात सांगली जिल्ह्यातील 2 महिला आढळून आल्या. त्यांना पैशाचे आमिष दाखवून नायगाव शिवारातील रॉयल लॉजमध्ये बोलावून वेश्या व्यवसाय करून घेतला जात होता. 

लॉज मॅनेजर अजय अच्युत रसाळ, रा. दत्तनगर मुरुड जि. लातूर याला ताब्यात घेण्यात आले. लॉज मालक अक्षय दादासाहेब घोगरे, रा. दत्तनगर मुरुड हा पळून गेला. दोघांविरुद्ध BNS कलम 143, 144(2), 3(5) सह अनैतिक व्यापार प्रतिबंध अधिनियम 1956 कलम 3,4,5,6 अन्वये गुन्हा रजि.नं. 141/2026 दाखल झाला आहे. पिडीत महिलांना वैद्यकीय तपासणीनंतर लातूर महिला सुधारगृहात दाखल केले आहे. पुढील तपास अनैतिक व्यापार प्रतिबंध कक्ष धाराशिवचे पो.नि. शेळके करत आहेत.ही कारवाई एसपी धाराशिव मा. खोखर मॅडम, अप्पर एसपी श्री. पांडकर यांच्या मार्गदर्शनाखाली व एसडीपीओ कळंब श्री. संजय पवार यांच्या देखरेखीखाली झाली.

आधुनिक केसरी न्यूज  

हनुमंत मस्तुद

माढा : राज्य उत्पादन शुल्क विभाग, सोलापूर यांनी जिल्ह्यात अवैध हातभट्टी निर्मिती, मद्य विक्री व वाहतुकीविरोधात विशेष मोहीम राबवत मोठी कारवाई केली आहे. या कारवाईत २३ लाख ५६ हजार ८४० रुपयांचा मुद्देमाल जप्त करण्यात आला असून ६४ गुन्हे दाखल करण्यात आले आहेत. विभागीय उपायुक्त पुणे विभाग सागर धोमकर  यांच्या निर्देशानुसार तसेच अधीक्षक राज्य उत्पादन शुल्क सोलापूर  भाग्यश्री पं. जाधव, आणि उपअधीक्षक सौरभ बा. अदाटे यांच्या मार्गदर्शनाखाली दि. २९ मे ते ३१ मे २०२६ या कालावधीत सोलापूर शहर व जिल्ह्यात धडक कारवाई करण्यात आली.

या कारवाईत ४३ हजार १७५ लिटर रसायन, ३ हजार ७८३ लिटर हातभट्टी दारू, १६.२ बल्क लिटर देशी मद्य, १५.६ बल्क लिटर बिअर आणि १२५ बल्क लिटर ताडी असा मोठा साठा जप्त करण्यात आला. तसेच ४७ जणांवर कारवाई करून ३ वाहनांसह एकूण २३.५६ लाख रुपयांचा मुद्देमाल जप्त करण्यात आला.
राज्य उत्पादन शुल्क विभागाने हातभट्टी निर्मितीचे समूळ उच्चाटन करण्यावर भर दिला असून पोलीस विभाग व इतर यंत्रणांच्या समन्वयाने संयुक्त कठोर कारवाया करण्यात येणार असल्याचे सांगण्यात आले आहे. अवैध मद्य विक्री, निर्मिती किंवा वाहतुकीसाठी जागा उपलब्ध करून देणाऱ्या मालकांनाही आरोपी करण्यात येत असल्याची माहिती विभागाने दिली.
दरम्यान, मिथेनॉलयुक्त बनावट दारूमुळे पुण्यात घडलेल्या दुर्घटनेचा संदर्भ देत नागरिकांना सतर्क राहण्याचे आवाहन करण्यात आले आहे. अशा विषारी दारूमुळे किडनी निकामी होणे, कायमस्वरूपीचा अंधत्व येणे व अकाली मृत्यू यांसारखे गंभीर परिणाम संभवतात, असे विभागाने स्पष्ट केले. गुन्हे अन्वेषणाच्या आकडेवारीनुसार, जानेवारी ते मे २०२५ या कालावधीत सोलापूर जिल्ह्यात १,१९७ गुन्हे, १,१०१ वारस, १,१२४ अटक आरोपी आणि ३ कोटी ३३ लाख २७ हजार १४९ रुपयांचा मुद्देमाल जप्त करण्यात आला होता. तर जानेवारी ते मे २०२६ या कालावधीत १,२९७ गुन्हे, १,२२१ वारस, १,२५४ अटक आरोपी आणि ५ कोटी ७३ लाख ३० हजार २०६ रुपयांचा मुद्देमाल जप्त करण्यात आला आहे. यामध्ये गुन्ह्यांमध्ये ८ टक्के, वारसांमध्ये ११ टक्के, अटक आरोपींमध्ये १२ टक्के आणि मुद्देमालाच्या किमतीत ७२ टक्के वाढ झाल्याचे दिसून आले आहे. अवैध मद्यनिर्मिती, विक्री, वाहतूक किंवा मिथेनॉल, क्लोरेल हायड्रेट यांसारख्या पदार्थांच्या वापराबाबत माहिती असल्यास नागरिकांनी टोल फ्री क्रमांक १८००२३३९९९  माहिती देणाऱ्याचे नाव गोपनीय ठेवण्यात येईल, असे राज्य उत्पादन शुल्क अधीक्षक श्रीमती भाग्यश्री जाधव यांनी सांगितले व अवैध मद्याबाबतची माहिती कळविण्याचे आवाहन केले आहे