आधुनिक केसरी

छत्रपती संभाजीनगर : मॅजिक  (Marathwada Accelerator for Growth and Incubation Council) या इनक्युबेशन केंद्राच्या पहिल्या स्टार्टअपपैकी एक असलेल्या नियो फार्मटेकने ‘ग्रीनोव्हेशन एनर्जी चॅलेंज’मध्ये टॉप १० मध्ये स्थान मिळवले. विशेष म्हणजे, त्यांच्या नाविन्यपूर्ण पेस्टिसाइड स्प्रे पंपला जागतिक टेक उद्योजक बिल गेट्स यांनी दखल घेतली. भारतीय कृषी संशोधन संस्था (IARI) येथे आयोजित कार्यक्रमात नियो सोलर स्प्रेअर आणि नियो बाहुबली स्प्रेअर या अत्याधुनिक तंत्रज्ञानाचा त्यांनी स्वतः अनुभव घेतला.

बिल गेट्स यांनी केवळ निरीक्षण न करता स्वतः नियो सोलर स्प्रेअर वापरून त्याच्या कार्यक्षमतेचा थेट अनुभव घेतला. हे सोलर-चालित स्प्रेअर पारंपरिक इंधन-आधारित स्प्रेअर्सच्या तुलनेत अधिक किफायतशीर आणि पर्यावरणपूरक पर्याय उपलब्ध करून देते. त्यांनी नियो बाहुबली स्प्रेअर देखील चाचणी केली, जे मोठ्या प्रमाणावर शेती करणाऱ्या शेतकऱ्यांसाठी अधिक कार्यक्षमतेचे आणि मजूर खर्च वाचवणारे तंत्रज्ञान आहे आणि परदेशात देखील उत्पादनाला मोठी मागणी आहे. 

नियो फार्मटेकचा प्रवास २०१८ मध्ये सुरू झाली, जेव्हा संस्थापक योगेश गवांदे अभियांत्रिकीच्या तिसऱ्या वर्षात होते. त्यांचा कॉलेज प्रोजेक्ट मॅजिक च्या मार्गदर्शनाखाली संपूर्ण उत्पादनामध्ये विकसित झाला. मिलिंद कंक, सुनील रायथत्ता, प्रसाद कोकिळ, रितेश मिश्रा आणि आशिष गर्दे यांनी त्याला व्यवसायिक दृष्टिकोनातून मार्गदर्शन, आर्थिक मदत, बाजारपेठेतील प्रवेश आणि औद्योगिक जोडणी मिळवून दिली.

यावेळी बोलतांना मॅजिक संचालक प्रसाद कोकीळ म्हणाले की, विद्यार्थी दशेतून महाविद्यालयीन प्रोजेक्ट ला प्रत्यक्ष प्रोडक्ट मध्ये रूपांतर करण्यात आले, मध्ये मॅजिक संस्थेने उत्पादन विकासात मोलाची भूमिका निभावली. मॅजिक च्या सहकार्याने, नियो फार्मटेकला Social Alpha आणि CoE FASAL (STPI, IIT Kanpur, IIMCIP) यांसारख्या महत्त्वाच्या संस्थांशी संपर्क झाली, ज्यामुळे स्टार्टअपला वेगाने वाढता आला. आज नियो परदेशात आपले निर्यात करत आहे. 

आज, नियो फार्मटेकने ५०००+ युनिट्सची विक्री, १००+ रोजगार निर्मिती आणि ₹३ कोटींहून अधिक महसूल मिळवला आहे. संस्थापक योगेश गावंडे यांनी मॅजिकच्या अमूल्य योगदानाबद्दल कृतज्ञता व्यक्त केली. तो म्हणाला की मॅजिकचे मार्गदर्शन आणि मदतीशिवाय हे यश शक्य झाले नसते. गेल्या दोन वर्षांत, गेट्स फाउंडेशनच्या मदतीने नियो फार्मटेक ने उत्तर प्रदेश आणि ओडिशा येथे आपले उत्पादन मोठ्या प्रमाणावर पोहोचवले आणि हजारो शेतकऱ्यांना नाविन्यपूर्ण कृषी उपाय उपलब्ध करून दिले. या संपूर्ण प्रवासात महाराष्ट्र स्टेट इंनोव्हेशन सोसायटीने मौलाची मदत केली, असे तो म्हणाला.

यावेळी बोलतांना मॅजिक संचालक रितेश मिश्रा म्हणाले की नियो फार्मटेकचा हा प्रवास मेक इन इंडिया उपक्रमातील नवसंशोधनाचे सशक्त उदाहरण आहे. एका कॉलेज प्रोजेक्टपासून ते बिल गेट्स यांच्या दखलीपर्यंत, या स्टार्टअपने तंत्रज्ञानाच्या मदतीने भारतीय शेतीमध्ये परिवर्तन घडवण्याची क्षमता दाखवली आहे.

आधुनिक केसरी न्यूज 

छत्रपती संभाजीनगर : व्यवसायाचे बारकावे समजावून सांगण्याच्या उद्देशाने मराठवाडा एक्सीलरेटर फॉर ग्रोथ अँड इनक्युबेशन कौन्सिल (MAGIC) ने आपल्या बिझनेस एंटरप्राइझ एज्युकेशनल जर्नी (बीज -BEEJ) कार्यक्रमाची आयोजन करण्यात आले आहे. स्टार्टअप, कार्यरत व्यावसायिक आणि उद्योजकतेच्या जगात प्रवेश करण्यास उत्सुक असलेल्या विद्यार्थ्यांसाठी डिझाइन केलेला हा कोर्स सहभागींना स्पर्धात्मक व्यवसायामध्ये भरभराट करण्यासाठी आवश्यक कौशल्ये आणि ज्ञानाने सुसज्ज करणार आहे. 15 जून 2024 रोजी या उपक्रमाची सुरवात झाली असून, बीज उपक्रम मॅजिकशी संलग्न अनुभवी तज्ञ आणि मार्गदर्शकांनी तयार केलेला सर्वसमावेशक शिक्षण अनुभव प्रदान करेल. 

या उपक्रमाबद्दल माहिती देतांना मॅजिकचे संचालक प्रसाद कोकीळ म्हणाले की आपला व्यवसाय सुरू करू इछिनार्‍या स्टार्टअप्स, व्यावसायिक आणि उद्योजक यांना ४० तासाच्या या उपक्रमामध्ये व्यवसायाचे सर्व बारकाव्याचे मार्गदर्शन येणार आहे. 

कोर्सची वैशिष्ट्ये

कंपनीची नोंदणी आणि स्टार्टअप नोंदणी प्रक्रिया, स्टार्ट-अप आवश्यकता आणि प्रमाणीकरण, विक्री आणि विपणन, प्राईस आणि व्हॅल्यू अधोरेखित करणे, वार्षिक व्यवसाय योजना, व्यवसाय योजना सादरीकरण, वेळेचे मॅनेजमेंट, मीटिंगला कसे सामोरे जावे, व्यवसायातील वचनबद्धता, बिझनेस सायकल, आणि व्यवसाय शाश्वत कसा राहावा याचे बारकावे शिकवले जाणार असल्याचे, प्रसाद कोकीळ यांनी सांगितले. कार्यक्रमाचे संचालन केतकी तुपे यांनी केले. या उपक्रमामध्ये राज्यातील पुणे, राहुरी, जळगाव, मुक्ताईनगर, कोल्हापूर, छत्रपती संभाजीनगर येथील स्टार्टअप्सनी सहभाग घेतला.

या उपक्रमाचे उदघाटन सीएमआयए संस्थेचे अध्यक्ष दुष्यंत पाटील यांच्या प्रमुख उपस्थितीत झाले.  यावेळी बोलतांना ते म्हणाले की, व्यवसायाच्या सुरवातीच्या टप्यात स्टार्टअप्सना मेंटोरिंगची सर्वात जास्त गरज असते. मॅजिक संस्था या करिता मोठी भूमिका निभावत आहे, त्यांच्या या प्रयत्नांमुळे मराठवाडा विभागात स्टार्टअप इकोसिस्टिम मजबूत होत आहे, असे त्यांनी सांगितले.

आधुनिक केसरी न्यूज 

 मुंबई, : भारत निवडणूक आयोगाने लोकसभा सार्वत्रिक निवडणुकीच्या तारखा जाहीर केल्या आहेत. या निवडणुका एकूण सात टप्प्यात होणार असून त्यासाठी मागच्या शनिवारपासून देशभरात आदर्श आचारसंहिता लागू झाली आहे. या निवडणूक कालावधीत आचारसंहितेचे उल्लंघन होत असल्यास सर्वसामान्य मतदार नागरिकांना आता थेट निवडणूक आयोगाकडे तक्रार करता येणार आहे. त्यासाठी भारत निवडणूक आयोगाने सीव्हिजिल सिटीझन ॲप विकसित केले आहे. या ॲपवर दाखल होणाऱ्या तक्रारींवर पहिल्या १०० मिनिटांत पहिली कार्यवाही केली जात आहे.

            आचारसंहिता कालावधीत काय करावे आणि काय करु नये याविषयी निवडणूक उमेदवार, प्रशासन आणि राजकीय पक्षांना माहिती दिली जाते. पण, काहीवेळेला या आदर्श आचारसंहितेचे उल्लंघन होते. त्याची तक्रार करणे आता पूर्वीपेक्षा अधिक सुलभ झाले आहे. आचारसंहिता उल्लंघनाची तक्रार किंवा माहिती निवडणूक आयोग आणि जिल्हा प्रशासनापर्यंत पोहोचवण्यासाठी भारत निवडणूक आयोगाने सीव्हिजिल ॲप विकसित केले आहे. या मोबाईल ॲपद्वारे मतदारांना आता थेट आयोगाकडे तक्रार करता येणार आहे. या सीव्हिजिल ॲपवर तक्रार प्राप्त होताच तातडीने त्यावर कारवाई केली जाते. तक्रारदाराचे नाव गोपनीय ठेवले जाते.

            हा सीव्हिजिल ॲप अँड्रॉइड आणि आयओएस डिव्हाइसवर डाऊनलोड करण्यासाठी उपलब्ध आहे. उल्लंघनाची तक्रार करण्यासाठी, वापरकर्त्यांनी फक्त ॲप उघडणे, उल्लंघनाचा प्रकार निवडणे आणि घटनेचे तपशिल, स्थान, वेळ आणि छायाचित्रे किंवा व्हिडिओ प्रदान करणे आवश्यक आहे. ॲप वापरकर्त्यांना त्यांच्या तक्रारींच्या प्रगतीचा मागोवा घेता येणार आहे.

वैशिष्ट्य

            सीव्हिजिल ॲप हा वापरकर्त्यांना आदर्श आचारसंहिताच्या उल्लंघनाची तक्रार करण्याची अनुमती देतो. नागरिकांना निवडणूक प्रक्रियेत सहभागी होण्यासाठी व्यासपीठ उपलब्ध करून देतो. उल्लंघनाचे स्थान ट्रॅक करण्यासाठी जीपीएस वापरतो. वापरकर्त्यांना केवळ थेट घटना चित्रित करण्याची अनुमती देतो. तक्रारीच्या प्रगतीचा मागोवा घेतो.

वापर कसा करायचा

            एन्ड्रॅाईड मोबाईलमधील गुगल प्ले स्टोर आणि आयफोनमधील ॲप स्टोर या ॲपमध्ये जावून सीव्हिजिल (cVIGIL) सर्च करावे.त्यानंतर ॲप डाऊनलोड करा. त्यानंतर ॲप उघडून मोबाईल क्रमांक, पत्ता, मतदारसंघ समाविष्ट करुन खाते तयार करा. तुम्हाला ज्या उल्लंघनाची तक्रार करायची आहे ते निवडा आणि स्थळ, वेळ आणि छायाचित्रे किंवा व्हिडिओंसह घटनेचे तपशील टाका. त्यानंतर तक्रार सबमिट करा.

अचूक कृती व देखरेख

            या ॲप्लिकेशनचा वापर करून, निवडणूक निर्णय अधिकारी कार्यालयात न जाताही काही मिनिटांतच नागरिक राजकीय गैरव्यवहाराच्या घटनांची तक्रार नोंदवू शकतात. हा सीव्हिजिल ॲप जिल्हा नियंत्रण कक्ष, निवडणूक निर्णय अधिकारी आणि भरारी पथकाशी जागरूक नागरिकांना जोडतो. ज्यामुळे एक जलद आणि अचूक कृती, देखरेख आणि अहवाल प्रणाली तयार होते.

लाईव्ह फोटो, व्हिडिओ

            या ॲपच्या अचूकतेसाठी ॲपमधून फक्त लाईव्ह लोकेशनवर आधारित फोटो, व्हिडिओ घेतले जातात. जेणेकरुन भरारी पथक, स्थिर संनिरीक्षण चमुंना वेळेत कार्यवाही करणे शक्य होईल.

तातडीने होते कारवाई

            या ॲपवर तक्रार दाखल होताच भारत निवडणूक आयोग तुमच्या तक्रारीची चौकशी करेल आणि योग्य ती कार्रवाई करेल.

डाटा सुरक्षा

            या ॲपवरील डाटा हा सुरक्षित ठेवला जातो. हा डाटा इतर कोणत्याही थर्ड पार्टीला दिला जात नाही. याशिवाय हा डाटा एन्ड टू एन्ड इन्क्रिप्टेड ठेवला जातो.

आधुनिक केसरी न्यूज

राजरत्न भोजने

श्रीहरिकोटा : चंद्राच्या पृष्ठभागावर चांद्रयान-३ च्या यशस्वी लँडिंगनंतर आता देशासह संपूर्ण जगाच्या नजरा इस्रोच्या सूर्य मोहिमेवर म्हणजेच आदित्य-एल-१ वर लागल्या आहेत.आदित्य एल-१ मिशन आज सकाळी ११.५० वाजता श्रीहरिकोटाच्या प्रक्षेपण केंद्रातून प्रक्षेपित करण्यात आले.पृथ्वी आणि सूर्य यांच्यातील एक टक्का अंतर कापल्यानंतर आदित्य एल -१ या अंतराळयानाला एल-१बिंदूवर घेऊन जाईल. इस्रो ची पहिली सूर्य मोहीम आदित्य एल-१ श्रीहरिकोटा येथून प्रक्षेपित करण्यात आले.

 चंद्राच्या दक्षिण ध्रुवावर चांद्रयान ३ च्या ऐतिहासिक लँडिंगनंतर भारतीय अंतराळ संशोधन संस्था (इस्रो) पुन्हा एकदा इतिहास रचण्याच्या उंबरठ्यावर आहे.  आता देशासह जगाच्या नजरा इस्रोच्या सूर्या मिशनवर म्हणजेच आदित्य-एल१ वर खिळल्या आहेत.पृथ्वी आणि सूर्यामधील अंतराच्या एक टक्का अंतर कापून आदित्य एल-१ या अवकाशयानाला एल-१ बिंदूवर घेऊन जाईल.  लॉन्च झाल्यानंतर १२७ दिवसांनी ते त्याच्या पॉइंट L-१ वर पोहोचेल.या टप्प्यावर पोहोचल्यानंतर आदित्य-एल१ अतिशय महत्त्वाचा डेटा पाठवण्यास सुरुवात करेल.

 आदित्य-एल-१ अवकाशात सोडणार आहे. हे रॉकेट आदित्य-एल1 पृथ्वीच्या खालच्या कक्षेत सोडणार आहे.  त्याची पेरीजी २३५ किमी आणि अपोजी १९५००, किमी असेल. पेरीजी म्हणजे पृथ्वीपासून सर्वात जवळचे अंतर आणि अपोजी म्हणजे कमाल अंतर. आदित्य-एल-१ चे वजन १४८०.७ किलो आहे. प्रक्षेपणानंतर सुमारे ६३ मिनिटांनी आदित्य-एल१ अंतराळयान रॉकेटपासून वेगळे होईल.

आधुनिक केसरी न्यूज 

छत्रपती संभाजीनगर : भारताच्या चांद्रयाननं इतिहास रचला आहे. चंद्राच्या दक्षिण ध्रुव्रावर पोहोचणारा भारत पहिला देश ठरला आहे. यासोबतच भारताच्या शिरपेचात मानाचा तुरा रोवला आहे. इस्रोचं चांद्रयान-3 आज 23 ऑगस्ट रोजी 06 वाजून 04 मिनिटांनी चंद्राच्या पृष्ठभागावर यशस्वीरित्या उतरलं.

चंद्रयान मोहिमेमुळे भारताच्या मानाच्या शिरपेचाध्ये तुरा रोवला गेला आहे.केंद्रीय अर्थ राज्यमंत्री डॉ. भागवत कराड यांच्या उपस्थितीमध्ये जय भवानीनगर हनुमान चौक येथे आनंद उत्सव साजरा करण्यात आला. 
यावेळी भारतीय जनता पार्टीच्या पदाधिकाऱ्यांनी "भारत माता की जय "अशा घोषणा दिल्या आणि  पेढे वाटून आनंद उत्सव सहभागी झाले.
 यावेळी भाजपा जिल्हाध्यक्ष श्री.संजय खंबायते,भाजपा सचिव श्री.अशोक दामले,श्री.मारुती आगलावे,माजी नगरसेवक श्री.महेश माळवतकर,श्री.प्रविण खैरे, श्रीमती.कांता चौधरी,श्री.दिलीप जोशी,श्री.बाबू आगळे ,श्री.धोंडीराम उचित,श्री.ज्ञानेश्वर लुटे,श्री.शहाजी बरडे,श्री.सदाशिव राजगुरू,श्री.अशोक गोरे,श्री.किशोर कानडे आदी उपस्थित होते.

आधुनिक केसरी न्यूज 

टोकियो  : जपान दौऱ्याच्या आजच्या तिसऱ्या दिवशी उपमुख्यमंत्री देवेंद्र फडणवीस यांनी अनेक मान्यवरांच्या भेटी घेतल्या आणि दिवसभराच्या घडामोडी संपत असताना भारताने चंद्रावर पाऊल ठेवले, तो क्षण जपानमधील भारतीयांसोबत आनंदाने साजरा केला. वंदे मातरम् आणि भारत माता की जयच्या घोषणांनी आज संपूर्ण जपान निनादले होते. या आनंदाच्या आणि ऐतिहासिक क्षणाला संपूर्ण वातावरण भारावून गेले होते.

उपमुख्यमंत्री देवेंद्र फडणवीस यांच्या जपान दौऱ्याच्या आजच्या तिसऱ्या दिवशी पहिली बैठक इस्ट जपान रेल्वे कंपनी, जेआर इस्टचे अध्यक्ष आणि सीईओ यूजी फुकासावा यांच्यासमवेत झाली. कंपनीचे अन्य अधिकारी इकुजू असामी आणि तकेशी त्सुयोशी हे सुद्धा यावेळी उपस्थित होते. यावेळी उपमुख्यमंत्री देवेंद्र फडणवीस म्हणाले की, जेआर इस्टच्या मुख्यालयाला भेटीमुळे आम्ही उत्साहित आहोत. जपानचे माजी पंतप्रधान स्व. शिंझो ॲबे आणि भारताचे पंतप्रधान नरेंद्र मोदीजी यांनी भारतात बुलेट ट्रेनची पायाभरणी केली आणि भारत-जपान मैत्रीचा एक नवा अध्याय लिहिला गेला. अतिशय गतीने हे काम सुरू असून टाईमलाईन्स पाळल्या जात आहेत. 2020 नंतर ज्या अडचणी आल्या, त्या आता सोडविल्या गेल्या आहेत आणि संपूर्ण गतीने काम केले जात आहे. पंतप्रधान नरेंद्र मोदीजी यांच्या नेतृत्वात भारतात रस्ते, रेल्वेचे काम मोठ्या प्रमाणात  होत असून 500 रेल्वे स्थानकांचे आधुनिकीकरण करण्यात येत आहे. भारतात वंदे भारत रेल्वेचे जाळे सुद्धा आता निर्माण झाले असून त्याला अतिशय चांगला प्रतिसाद मिळतो आहे. प्रवासाची गती विकास आणि अर्थव्यवस्थेची गती वाढविते. बुलेट ट्रेन माध्यमातून महाराष्ट्र आणि गुजरातच्या अर्थकारणाला मोठी गती प्राप्त होणार आहे. भारतात केवळ एक बुलेट ट्रेन करून थांबू नये, तर अधिक बुलेट ट्रेन सुरु व्हाव्यात,  अशी आमची इच्छा आहे.

शिनकॅन्सेन नियंत्रण कक्षाला भेट
जपानचे बुलेट ट्रेनचे जाळे शिनकॅन्सेन नावाने ओळखले जाते. या सेवेबद्दल जपानच्या नागरिकांमध्ये विशेष भावना आहेत. उपमुख्यमंत्री देवेंद्र फडणवीस यांनी आज या शिनकॅन्सेन नियंत्रण कक्षाला भेट दिली. या ठिकाणी एकूण 7 विभाग असून 190 लोक 24*7 या सेवेवर देखरेख ठेवत असतात. भारतात मुंबई ते अहमदाबाद बुलेट ट्रेन धावणार असून त्याची प्रवासी क्षमता बोईंगपेक्षा तिप्पट असणार आहे. 

जपानचे मंत्री निशिदा शोजी यांच्यासमवेत भेट
जपानचे लॅंड, पायाभूत सुविधा, वाहतूक उपमंत्री निशिदा शोजी यांचीही आज उपमुख्यमंत्री देवेंद्र फडणवीस यांनी भेट घेतली. बुलेट ट्रेन स्थानकाबाहेर होणाऱ्या विकास प्रकल्पांना जायकाच्या माध्यमातून वित्तसहाय्य करण्याची तयारी त्यांनी दर्शविली. मुंबई ट्रान्सहार्बर लिंक प्रकल्प लवकरच पूर्णत्वास जातोय, याबद्दल त्यांनी आनंद व्यक्त केला. महामार्ग आणि स्टील पॅनल रोड संदर्भातील तंत्रज्ञान देण्याची तयारीही त्यांनी दर्शविली.
उपमुख्यमंत्री देवेंद्र फडणवीस यावेळी त्यांच्याशी चर्चा करताना म्हणाले की, डेडीकेटेड फ्रेट कॉरिडोर कॉर्पोरेशन (डीएफसी) माध्यमातून औद्योगिक पार्क आणि बंदरे यांची एक नवी इकोसिस्टम तयार होते आहे, तर हायस्पीड रेल्वेच्या माध्यमातून अनेक नवीन संधी निर्माण होत आहेत. सुपा येथे जापनीज इंडस्ट्रियल टाऊनशिप तयार होते आहे. मुंबई ट्रान्सहार्बर लिंक प्रकल्पाच्या माध्यमातून सुद्धा आर्थिक विकासाचे एक मोठे क्षेत्र निर्माण होणार आहे. 

जपानचे मंत्री टकागी केई यांची भेट
जपानचे परराष्ट्र व्यवहार उपमंत्री टकागी केई यांची सुद्धा आज उपमुख्यमंत्री देवेंद्र फडणवीस यांनी भेट घेतली. केई यांनी अलीकडेच जी-20 परिषदेसाठी महाराष्ट्र आणि गोव्याच्या प्रवासाचे अनुभव कथन केले. भारताने आर्थिक आणि विशेषतः ऊर्जा क्षेत्रात उल्लेखनीय कामगिरी केली आहे, याचा गौरवपूर्ण उल्लेख त्यांनी केला. गेल्या दौऱ्यात कमी वेळ मिळाल्याने येणाऱ्या काळात मुंबईला भेट देणार आहे. मुंबई हे भारताच्या अर्थव्यवस्थेचे केंद्र आहे. येणाऱ्या काळात महाराष्ट्रासोबत आणखी सहकार्य वाढविण्याचा मनोदय त्यांनी व्यक्त केला.
यावेळी बोलताना उपमुख्यमंत्री देवेंद्र फडणवीस यांनी सांगितले की, महाराष्ट्र हे भारतीय अर्थव्यवस्थेचे इंजिन आहे. देशाची आर्थिक, व्यावसायिक आणि करमणूक राजधानी आहे. भारत आणि जपान अधिक सहकार्याने मोठा बदल घडून येऊ शकतो. राज्यातील अनेक प्रकल्पांना जायका अर्थसहाय्य करीत आहे. वर्सोवा-विरार सी-लिंक प्रकल्पाला सुद्धा अर्थसहाय्य मिळण्यासाठी भारत आणि जपान सरकार चर्चा करीत आहेत. परराष्ट्र व्यवहार मंत्रालयाकडून त्याला लवकरच मंजुरी मिळेल, अशी पूर्ण आशा आहे.

*जेट्रोसमवेत भेट आणि चर्चा*
जेट्रोचे अध्यक्ष नोरिहिको इशिगुरो यांची आज उपमुख्यमंत्री देवेंद्र फडणवीस यांनी भेट घेतली. यावेळी कार्यकारी उपाध्यक्ष काझुया नाकाजो आणि संचालक मुनेनोरी मात्सुंगा हे सुद्धा उपस्थित होते. जपानमधील स्टार्टअपला मदत करतानाच भारतातील स्टार्टअपला मदत करण्याची तयारी त्यांनी दर्शविली. सुपा येथे जपानमधील 4 गुंतवणूकदार येणार असल्याची माहिती त्यांनी यावेळी दिली. यावेळी बोलताना उपमुख्यमंत्री देवेंद्र फडणवीस म्हणाले की, 2015 पासून आम्ही जेट्रोच्या संपर्कात आहोत. जपानच्या अधिकाधिक कंपन्यांनी महाराष्ट्रात यावे, ही आमची इच्छा आहे. महाराष्ट्रात येणाऱ्या गुंतवणूकदारांसाठी सर्व सुविधा राज्य सरकार उपलब्ध करून देत आहे. यासाठीची प्रक्रिया पारदर्शी करण्यात आली आहे. जपानमधील नवनवीन तंत्रज्ञानाचे महाराष्ट्रात स्वागत आहे.

निप्पॅान लाईफ इन्शुरन्ससोबत चर्चा
निप्पॅान लाईफ इन्शुरन्सचे संचालक मिनोरू किमुरा, महाव्यवस्थापक हिरोकी यामाऊचि, संदीप सिक्का यांच्याशी सुद्धा उपमुख्यमंत्री देवेंद्र फडणवीस यांनी आज चर्चा केली. निप्पॅान लाईफ इन्शुरन्स ही भारतातील सर्वात मोठी वित्तीय व्यवस्थापन आणि विमा सेवा देणारी कंपनी आहे. सुमारे 12,000 कोटी रुपये विदेशी गुंतवणूक त्यांनी भारतात केली आहे. यावेळी बोलताना उपमुख्यमंत्री देवेंद्र फडणवीस म्हणाले की, एमएमआरडीए जेव्हा निप्पॅान लाईफ इन्शुरन्सकडून निधी घेईल, तेव्हा त्याला राज्य सरकारची हमी असेल. किमान 2 ते 3 प्रकल्प आम्ही निप्पॅान लाईफ इन्शुरन्ससोबत करणार आहोत.

*टोकियोतील दूतावासात भारतीयांशी संवाद *
टोकियोतील दूतावासात उपमुख्यमंत्री देवेंद्र फडणवीस यांनी आज भारतीयांशी संवाद साधला. जपानमध्ये सुमारे 1500 भारतीय व्यावसायिक आहेत. देवेंद्र फडणवीस यावेळी बोलताना म्हणाले की, मराठी समुदायाने ज्या पद्धतीने स्वागत केले, त्यामुळे आम्ही भारावून गेलो आहोत. आज महाराष्ट्र भारताचे ग्रोथ इंजिन म्हणून काम करीत आहे. 15% जीडीपी, 20% निर्यात आणि सुमारे 30% विदेशी गुंतवणूक ही महाराष्ट्राची बलस्थानं आहेत. देशातील सर्वाधिक स्टार्टअप महाराष्ट्रात आहेत. अनेक पायाभूत सुविधा प्रकल्प महाराष्ट्रात आज होत आहेत. त्यात समृद्धी महामार्ग सुद्धा आहे. मा. पंतप्रधान नरेंद्र मोदीजी हे ठामपणे महाराष्ट्राच्या मागे उभे आहेत. बुलेट ट्रेन प्रकल्प जरी 2028 पर्यंत पूर्ण होणार असला तरी 2027 पर्यंत त्याचे उदघाटन करण्याचा आमचा प्रयत्न आहे. जेव्हा तुम्ही भारतात याल, तेव्हा वंदे भारत रेल्वेने प्रवास निश्चितपणे करा. आज भारत चंद्रावर पाऊल ठेवत आहे, ही आपल्या सर्वांसाठी अत्यंत अभिमानाची बाब आहे.

आधुनिक केसरी न्यूज 

छ्त्रपती संभाजीनगर : मानवाची अंतराळातील झेप ही अलौकिक ठरलेली आहे. भारताचे चांद्रयान मोहीम मधिल चांद्रयान -३ हे चंद्रावर दक्षिण ध्रुवावर हे विक्रम लॅंडर यशस्वीपणे उतरले.आदरणीय पंतप्रधान नरेंद्र मोदीजींनी दक्षिण आफ्रिकेच्या मधून सगळ्या भारतीयांचे कौतुक केले.इस्त्रोच्या  सर्व शास्त्रज्ञानांचे मनापासून कौतुक केले.

सुधीर कोर्टीकर हे छत्रपती संभाजी नगर मधील मोठे टपाल तिकीट व नाणेसंग्राहक आहेत.त्यांच्या टपाल तिकीटाच्या माध्यमातून त्यांनी *मानवाची अंतराळीत झेप* या माध्यमातून
जगातील असंख्य राष्ट्रांनी टपाल तिकीटांतून ज्या मोहिमा झाल्या त्यांची अगणित टपाल काढली नी साऱ्या जगाला त्याची माहिती करून दिलेली आहे....

सुधीर कोर्टीकरांनी आपल्या टपाल तिकीटाच्या माध्यमातून ही माहिती ४ लाख लोकांना आपल्या प्रदर्शनातून करुन दिली आहे.त्यासाठी सुधीर कोर्टीकरांना 
एक सुवर्ण दोन रौप्य दोन कांस्यपदकांनी गौरवण्यात आलेलं आहे...
दैनिक आधुनिक केसरीच्या माध्यमातून आपल्या सर्व रसिक वाचकांना माहिती साठी पाठविलेले आहे....

आधुनिक केसरी न्यूज 

मुंबई : भारतीय दूरसंचार (बीएसएनएल) च्या प्लॅटफॉर्म वरून एओन प्ले च्या ओटीटी सेवांचा शुभारंभ सुपर संगणक निर्माते पद्मश्री डॉक्टर विजय भटकर यांच्या उपस्थितीत स्वातंत्र्य दिनी झाला. भारतात पहिल्यांदा बीएसएनएल बरोबर एओन प्ले ने ओटीटी सेवांची सुरुवात केली असून मनोरंजन, शिक्षण, आरोग्य ई-कॉमर्स सेवा उपलब्ध होत आहे. महाराष्ट्र राज्य पत्रकार संघाचे प्रदेशाध्यक्ष वसंत मुंडे यांनी देशातील डिजीटल, प्रिंट, दुरचित्रवाहिन्या एका क्लिकवर आणून रोजगार निर्माण करण्याच्या कल्पनेला मूर्त रुप आणल्याने डिजिटल सेवांमध्ये क्रांतिकारी पाऊल ठरले आहे. 
    भारतामधील डिजिटल सेवांची वाढती मागणी लक्षात घेऊन भारत सरकारच्या बीएसएनएल विभागाने व्हॅल्यू एडिट सेवेअंतर्गत एओन प्ले बरोबर ओटीटी सेवा सुरू करण्याचा निर्णय घेतला. सुपर संगणक निर्मितीचे जनक पद्मश्री पद्मभूषण डॉक्टर विजय भटकर यांच्या मार्गदर्शनाखाली नामांकित डिजिटल संशोधक डॉ. अतुल नाईक यांनी सर्वसामान्य वापरकर्त्यांना उपयुक्त अशी प्रणाली विकसित केली असून एका क्लिकवर विविध प्रकारच्या सेवा उपलब्ध होणार आहेत. महाराष्ट्र राज्य पत्रकार संघाचे प्रदेशाध्यक्ष वसंत मुंडे यांनी देशभरातील डिजिटल, प्रिंट, दूरचित्रवाहिनी मिडिया एका प्लॅटफॉर्मवर आणून त्यातून रोजगार निर्माण करण्याच्या कल्पनेला मूर्त रूप आणले आहे. लोकल टू ग्लोबल अंतर्गत गावातील सामान्य माणसालाही या ओटीटी प्लॅटफॉर्मवरून जगाच्या पाठीवर पोहोचता येणार आहे. माहिती न्यूज मनोरंजन आरोग्य ई-कॉमर्स या विविध प्रकारच्या सेवा एका क्लिकवर उपलब्ध होणार आहेत. पंतप्रधान नरेंद्र मोदी यांच्या धोरणानुसार पूर्ण भारतीय बनावटीचे एओन प्ले अ‍ॅप बीएसएनएलच्या कोट्यावधी युजरसाठी सहज उपलब्ध होणार आहे. बीएसएनएलच्या प्लॅटफॉर्मवर ओटीटी सेवांचा शुभारंभ स्वातंत्र्यदिनी डॉक्टर विजय भटकर यांच्या उपस्थित झाला यावेळी उद्योजक श्री मोहन बोरोले, डॉ. विजय नाईक, डॉ.भास्कर सानप यांच्यासह अनेक मान्यवर ऑनलाईन पद्धतीने सहभागी झाले होते.

आधुनिक केसरी न्यूज 

इंडिगोचे विमान चेन्नईहून ढाक्याला जात होते. योगायोगाने चांद्रयान-३ च्या प्रक्षेपणाच्या वेळी ते श्रीहरिकोटाजवळून जात होते. पायलटने घोषणा केली की प्रवासी एका ऐतिहासिक घटनेचे साक्षीदार होऊ शकतात 'चांद्रयान-3 चे प्रक्षेपण'. 
खिडकीच्या सीटवर बसलेल्या एका प्रवाशाने त्याच्या मोबाईलवर व्हिडिओ रेकॉर्ड केला आणि अंतराळातून अंतराळयानाचा हा पहिलाच व्हिडिओ आहे. इस्रो मटेरिअल्स आणि रॉकेट मॅन्युफॅक्चरिंगचे संचालक (निवृत्त) डॉ पी व्ही वेंकीटाकृष्णन यांनी हा व्हिडिओ ट्विट केला आहे. (प्रत्यक्षात सांगायचे तर, प्रक्षेपणाच्या वेळी श्रीहरिकोटाच्या आसपासचे हवाई क्षेत्र नो फ्लाय झोन असायला हवे होते आणि विमान नो फ्लाय झोनच्या बाहेर होते.)

विमानविद्या अंतराळविज्ञानाला भेटते तेव्हा...! हा वेगळा मथळा एका ट्विटर यूझरने या व्हिडिओला सुचवला आहे.

आधुनिक केसरी न्यूज

नवी दिल्ली : सर्व देशवासीयांचे लक्ष लागलेल्या चंद्रयान-३च्या प्रक्षेपणासाठी बाहुबली रॉकेट म्हणजेच लॉन्च व्हेईकल मार्क-३ (एलव्हीएम-३) आंध्र प्रदेशातील श्रीहरिकोटा केंद्रावर सज्ज झाले आहे. आज दुपारी २.३५ वाजता चंद्रयान अवकाशात झेपावणार असून, आतापर्यंत या रॉकेटने १०० टक्के यशस्वी प्रक्षेपण केले आहे. प्रक्षेपण तर यशस्वी होणारच; पण पुढे चंद्रावर ऐतिहासिक लॅण्डिंगच्या यशाबद्दलही शास्त्रज्ञ आशावादी आहेत. 

चंद्रावर यशस्वी लॅण्डिंग झाल्यास भारत हा अमेरिका, रशिया आणि चीननंतर अशी कामगिरी करणारा जगातील चौथा देश ठरेल. २३ ऑगस्टनंतर कधीही हे यान चंद्रावर उतरू शकते. चांद्रयान -३ च्या उड्डाणासाठी इस्रोने एलव्हीएम ३ प्रक्षेपक विकसित केले आहे. देशातील आतापर्यंतचे हे सर्वात अवजड आणि अद्ययावत प्रक्षेपक आहे. त्याचे वजन ६४० टन इतके आहे. 'रॉकेट वुमन' म्हणून ओळखल्या जाणार्‍या अंतराळ शास्त्रज्ञ रितू करिधाल श्रीवास्तव या मोहिमेचे नेतृत्व करत आहेत. जाणून घ्या कोण आहे रितू करिधाल, ज्यांच्यावर या महत्त्वाच्या मिशनची जबाबदारी सोपवण्यात आली आहे.

चंद्रयान ३च्या मिशन डायरेक्टरच्या भूमिकेत रितू करिधाल दिसणार आहे. मंगळयान मोहिमेत आपले कौशल्य दाखविणाऱ्या रितू या चंद्रयान-३ सह यशाचे आणखी एक उड्डाण घेणार आहे. रितू करिधाल श्रीवास्तव यांच्या याआधीच्या मिशनमधील भूमिका लक्षात घेऊन ही जबाबदारी देण्यात आली आहे. रितू या मंगळयान मिशनच्या डेप्युटी ऑपरेशन डायरेक्टर होत्या. त्यावेळी त्या प्रकाशझोतात आल्या होत्या. रितू करिधाल लखनौमध्ये वाढल्या. त्यांनी लखनौ विद्यापीठातून भौतिकशास्त्रात एमएससी केले आहे. विज्ञान आणि अवकाशातील आवड पाहून रितू यांनी बंगळुरूच्या इंडियन इन्स्टिट्यूट ऑफ सायन्समध्ये प्रवेश घेतला. यानंतर रितूने इस्रोमध्ये नोकरीला सुरुवात केली. एरोस्पेसमध्ये पारंगत असलेल्या रितू यांचे करिअर यशांनी भरलेले आहे. रितू यांना २००७ मध्ये यंग सायंटिस्ट अवॉर्डही मिळाला आहे. वेगवेगळ्या मोहिमांमध्ये त्यांच्या भूमिकेसाठी देशातील आघाडीच्या अवकाश शास्त्रज्ञांमध्ये त्यांचे नाव समाविष्ट आहे. रितू यांना 'रॉकेट वुमन' या नावानेही ओळखले जाते.

रितू करिधाल यांनी मिशन मंगलयान आणि मिशन चांद्रयान-२ मध्ये महत्त्वाची भूमिका बजावली आहे. रितू करिधल यांना लहानपणापासूनच अंतराळ आणि अवकाश शास्त्रात रस होता. रितू यांना मिळालेल्या पुरस्कारांची यादी तिच्या कामगिरीइतकीच मोठी आहे. डॉ. एपीजे अब्दुल कलाम यंग सायंटिस्ट अवॉर्ड, मार्स आर्बिटर मिशनसाठी इस्रो टीम अवॉर्ड, एएसआय टीम अवॉर्ड, सोसायटी ऑफ इंडियन एरोस्पेस टेक्नॉलॉजी अँड इंडस्ट्रीजचा एरोस्पेस वुमन अचिव्हमेंट अवॉर्ड, रितू या समर्पण आणि कामाप्रती आवड यासाठी तिच्या समवयस्कांमध्ये ओळखले जातात.

चंद्रयान-३ मध्ये ऑर्बिटर पाठवले जात नाही. यावेळी स्वदेशी प्रोपल्शन मॉड्यूल पाठवले जात आहे. ते लँडर आणि रोव्हरला चंद्राच्या कक्षेत घेऊन जाईल. यानंतर ते चंद्राभोवती १०० किमीच्या वर्तुळाकार कक्षेत फिरत राहील. त्याचे वजन २१४५.०१ किलोग्रॅम असेल, त्यापैकी १६९६.३९ किलो इंधन असेल. म्हणजेच, मॉड्यूलचे वास्तविक वजन ४४८.६२ किलो आहे.